Փաստ ինֆո

ԱՄՆ հատուկ դատախազ Ռոբերտ Մյուլլերը, ով զբաղվում է Ռուսաստանին վերագրվող՝ ամերիկյան ընտրություններին միջամտության հետաքննությամբ, կարողացել է Դոնալդ Թրամփի թիմի կողմից Կրեմլի հետ կապի կանալ հաջողեցնելու փորձերի ապացույցներ հավաքել: Այդ մասին հաղորդել է The Washington Post-ը՝ հղելով աղբյուրներին:

Ըստ lenta.ru-ի, խոսքը գնում է Blackwater ամերիկյան մասնավոր ռազմական ընկերության հիմնադիր Էրիկ Պրինսի և Ուղղակի ներդրումների ռուսաստանյան հիմնադրամի ղեկավար Կիրիլ Դմիտրիևի գաղտնի հանդիպման մասին, որը տեղի է ունեցել Սեյշելյան կղզիներում Թրամփի երդմնակալությունից մեկ շաբաթ առաջ: Մյուլլերի կարծիքով, հանդիպումը Վաշինգտոնում իշխանության եկող վարչակազմի և Մոսկվայի միջև կապի կանալը հաջողեցնելու առաջին փորձերից մեկն է եղել, նշում է թերթը:

Իր հերթին Պրինսը՝ հետաքննության շրջանակներում 2017թ. աշնանը Կոնգրեսում ցուցմունքներ տալիս պնդել է, որ հանդիպումը պատահական է եղել: The Washington Post-ի տեղեկություններով, նա ընդգծել է, որ Սեյշելներում եղել է որպես մասնավոր ձեռնարկատեր, այլ ոչ թե որպես Թրամփի ու նրա թիմի ներկայացուցիչ:

Տեղեկատվությունը հերքել է Պրինսի գործնական գործընկեր Ջորջ Նադերն, ով պնդում է, որ հանդիպումը կազմակերպված է եղել իր օգնությամբ և որ ինքը մասնակցել է դրան: Գործարարը հայտարարել է, որ այն կազմակերպվել է Թրամփի թիմի ու Մոսկվայի ներկայացուցիչների միջև կողմերի ապագա հարաբերությունների քննարկման նպատակով: Թերթի աղբյուրների տվյալներով, այդ ցուցմունքները հիմնական, սակայն միակ ապացույցները չեն առ այն, թե ինչ է տեղի ունեցել այն ժամանակ Սեյշելներում:

Մյուլլերի օֆիսը փետրվարի 16-ին հրապարակել է ռուսաստանցիների ցուցակը, որոնք ամերիկյան կողմի հետաքննության կարծիքով, մասնակցել են ԱՄՆ ընտրությունների միջամտությանը: Ցուցակում ընդգրկված է 13 մարդ ու կազմակերպություն, այդ թվում են՝ գործարար Եվգենի Պրիգոժինը և Սանկտ Պետերբուրգում գտնվող Ինտերնետ հետազոտությունների գործակալությունը:

Վաշինգտոնը նախկինում էլ բազմիցս մեղադրել է Ռուսաստանին ամերիկյան ընտրություններին միջամտելու համար, սակայն ռուսաստանյան կողմը հերքում է այդ մեղադրանքները:

Աղբյուր` Փաստինֆո