Փաստ ինֆո

Էրեբունի և Նուբարաշեն վարչական շրջանների քննչական բաժնի ավագ քննիչ Միքայել Զադոյանի, փաստաբան Գայանե Գալոյանի և Բաբկեն Գասպարյանի վերաբերյալ գործով այսօրվա դատական նիստը հետաձգվեց:

Միքայել Զադոյանի պաշտպան Սիմոն Ամիրխանյանի առողջական վիճակը կտրուկ վատացել էր և նա ի վիճակի չէր եղել դատարան ներկայանալու: Զադոյանի մյուս պաշտպան Հրանտ Անանյանը դատարանին խնդրեց նիստը հետաձգել և հնարավորություն տալ Ամիրխանյանին ևս գործով հարցաքննվող վկաներին հարցեր ուղղել:

Պաշտպանական կողմը չառարկեց, իսկ դատախազ Մնացականյանը գտավ, որ պաշտպանի բացակայությունը խոչընդոտ չէ՝ դատական նիստն անցկացնելու համար, քանի որ Զադոյանի մյուս պաշտպանը ներկա է նիստին: Դատարանը որոշեց նիստը հետաձգել և նշանակեց մարտի 23-ին:

Հիշեցնենք, որ ըստ մեղադրանքի՝ Բաբկեն Գասպարյանը ՀՀ քննչական կոմիտեի Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 112-րդ հոդվածի հատկանիշներով հարուցված և քննվող քրեական գործով որդու՝ Սոս Գասպարյանի օգտին իրենց լիազորությունների շրջանակում գործողություններ կատարելու դիմաց, նշված քննչական բաժնի ավագ քննիչ Միքայել Զադոյանին և բաժնի պետի տեղակալ Բունիաթ Եղիազարյանին՝ ՀՀ Փաստաբանների պալատի փաստաբան Գայանե Գալոյանի օժանդակությամբ և միջոցով տվել է առանձնապես խոշոր չափերով կաշառք:

Ըստ Գայանե Գալոյանին առաջադրված մեղադրանքի՝ նա օժանդակել է Սոս Գասպարյանի օգտին իրենց լիազորությունների շրջանակում գործողություններ կատարելու դիմաց նախնական համաձայնությամբ առանձնապես խոշոր չափերով կաշառք ստացող վերը նշված քննչական բաժնի ավագ քննիչ Միքայել Զադոյանին և նույն բաժնի պետի տեղակալ Բունիաթ Եղիազարյանին:
Միքայել Զադոյանին էլ մեղադրանք է առաջադրվել իր վարույթում քննվող քրեական գործով նույն բաժնի պետի տեղակալ Բունիաթ Եղիազարյանի հետ նախնական համաձայնությամբ Բաբկեն Գասպարյանի որդու՝ Սոս Գասպարյանի օգտին իրենց լիազորությունների շրջանակում գործողություններ կատարելու դիմաց ՀՀ Փաստաբանների պալատի փաստաբան Գայանե Գալոյանի օժանդակությամբ և միջոցով Բաբկեն Գասպարյանից ստացել են առանձնապես խոշոր չափերով կաշառք:

Խոսքը գնում է 3000 ԱՄՆ դոլար կաշառքի մասին:

Միքայել Զադոյանին մեղադրանք է առաջադրվել 311-րդ հոդվածի 4-րդ մասի 2-րդ կետով, Գայանե Գալոյանին՝ 38-311-րդ հոդվածի 4-րդ մասի 2-րդ կետով, իսկ Բաբկեն Գասպարյանին՝ 312-րդ հոդվածի 3-րդ մասի 1ին կետով:

Միքայել Զադոյանի և Գայանե Գալոյանի նկատմամբ որպես խափանման միջոց է ընտրվել կալանավորումը, իսկ Գասպարյանի նկատմամբ՝ չհեռանալու մասին ստորագրությունը:

Նշենք նաև, որ բաժնի պետի տեղակալ Բունիաթ Եղիազարյանին ևս մեղադրանք է առաջադրվել 311-րդ հոդվածի 4-րդ մասի 2-րդ կետով, սակայն գործով նրա մասն անջատվել է և դեռևս նախաքննություն է ընթանում:

Քննչական բաժնի պետի տեղակալի նկատմամբ դատարանը որպես խափանման միջոց է ընտրել չհեռանալու մասին ստորագրությունը:

Աղբյուր` Փաստինֆո