Փաստ ինֆո

Իսրայելը Ռուսաստանի հետ քննարկում է երաշխիքները, որոնք կարող է տալ Մոսկվան Գոլանի բարձունքներին իրանական ստորաբաժանումների չմոտենալու մասին, ըստ ՌԻԱ Նովոստիի, հայտարարել է երկրի ԱԳՆ գլխավոր տնօրենի տեղակալ Ալեքսանդր Բեն-Ցվին:

Նա ընդգծել է, որ Մոսկվան «միանշանակ» հասկանում է Իսրայելի մտահոգությունը Սիրիայում շիիթական ստորաբաժանումների ներկայության հետ կապված:

Ըստ Բեն-Ցվիի, այդ հարցերը քննարկվել են Ռուսաստանի և Իսրայելի ԱԳՆ-ների միջև խորհրդատվությունների ժամանակ:

«Այն, որ մենք տարաձայնություններ ունենք Ռուսաստանի հետ Իրանի հետ կապված, դա բնավ գաղտնիք չէ, դա հասկանալի է: Մեր դիրքորոշումն այդ իրավիճակում պարզ է, մենք արդեն շատ անգամ ենք մեր ռուսաստանյան գործընկերներին կրկնել այն, թե մենք ինչպես ենք տեսնում իրավիճակը, և որ ամեն դեպքում Սիրիայում կարգավորումը կարող է տեղի ունենալ միայն այն ժամանակ, եթե այնտեղ չլինի Իրանը, «Հեզբոլլահ» և շիիթական ստորաբաժանումները», - հավելել է դիվանագետը: Նա ընդգծել է, որ Իսրայելի տեսանկյունից Սիրիայում իրանական ներկայությունը կհանգեցնի միայն իրավիճակի բորբոքմանը:

«Այդ պատճառով մենք ջանում ենք լուծել այդ հարցը: Կան մի քանի առաջարկություններ: Ես չեմ մանրամասնի ի՛նչ է հաջողվել կամ չի հաջողվել համաձայնեցնել, դրանք այնուամենայնիվ ներքին հարցեր են, սակայն ես ձեզ հաստատ կասեմ, որ ըմբռնում կա: Կողմերն ինչպիսի շահեր ունեն հարցը մենք ինչ-որ կերպ ջանում ենք քննարկել»,- նշել է Բեն-Ցվին:

Ռուսաստանյան լրատվամիջոցը նշում է, որ իսրայելական իշխանությունները մեղադրում են Իրանին Սիրիան շիիթական միլիցիաների տասնյակ հազարավոր մարտիկներով, սեփական օդային ու ծովային բազաներով «թշնամական ֆորպոստի» վերածելու ձգտման համար: Սիրիայում իրանական մշտական ռազմական ներկայությունը Թել Ավիվը որակում է անընդունելի և խոստանում է հակազդել դրան ուժային միջոցներով, եթե դա չկատարի դիվանագիտությունը:

Աղբյուր` Փաստինֆո