Փաստ ինֆո

Նովոսիբիրսկում կանանց սերիական սպանությունների գործով դատական վիճաբանությունների ժամանակ դատախազը ամբաստանյալ, նախկին միլիցիոներ Եվգենի Չուպլինսկու համար խնդրել է ցմահ ազատազրկում: Չուպլինսկին մեղադրվում է 19 կանանց սպանության մեջ:

Փետրվարի 28-ին ատենակալների կոլեգիան արտագերատեսչական պահպանության 52-ամյա նախկին աշխատակցին միաձայն մեղավոր է ճանաչել կանանց սերիական սպանությունների մեջ: Ամբաստանյալի դատավճիռը կհրապարակվի մարտի 6-ին:

Քննության ընթացքում պարզվել էր, որ 1998-ից մինչև 2005թ.-ն ընկած ժամանակահատվածում Եվգենի Չուպլինսկին Նովոսիբիրսկի փողոցներում ակտիվորեն ծանոթանում էր երիտասարդ կանանց հետ: Տղամարդը առաջարկում էր նրանց միասին ուրախ ժամանակ անցկացնել: Եթե կինը համաձայնում էր, նա նրան նստեցնում էր իր ավտոմեքենան, որից հետո ամայի վայր տանում ու սպանում: Հանցագործությունների հետքերը վերացնելու համար նա անդամատում էր դիակները և մնացորդները գցում տարբեր տեղեր: Մոլագարի զոհեր էին դառնում 18- 31 տարեկան երիտասարդ կանայք, այդ թվում՝ մարմնավաճառությամբ զբաղվողներ: 2005թ. սպանությունները կտրուկ դադարել էին:

Ըստ crimerussia.com-ի, գործի քննության վրա շատ ժամանակ է ծախսվել, մարդասպանին երկար տարիների ընթացքում որոնում էին: Ստուգվել էին հինգ հազարից ավելի տղամարդիկ, հարցման ենթարկվել մոտ ութ հազար վկաներ ու անցկացվել 300-ից ավելի փորձաքննություններ:

Փորձաքննությունների շնորհիվ հաջողվել էր պարզել հանցագործի գենոտիպը և միայն 2016թ. կարողացել էին նրան ձերբակալել: Չուպլինսկին ձերբակալվելուց հետո տվել էր խոստովանական ցուցմունքներ, սակայն հետո դրանցից հրաժարվել էր, հայտարարելով, որ ինքնազրպարտչական ցուցմունքներ է տվել՝ քննիչի ճնշման տակ: Դատաբժշկական փորձաքննության արդյունքներով տղամարդը լիովին մեղսունակ է ճանաչվել:

Աղբյուր` Փաստինֆո