Փաստ ինֆո

ՀՀ վերաքննիչ դատարանը բեկանել ու փոփոխել է Մաշտոցի պողոտայում աղմկահարույց ծեծկռտուքի գործով նիստի ժամանակ խուլիգանության դեպքի գործով երկու ամբաստանյալների վերաբերյալ կայացված դատավճիռը:

Ինչպես «Փաստինֆո»-ի լրագրողի հետ զրույցում հայտնեց ամբաստանյալներից մեկի՝ Գարիկ Բաբախանյանի, պաշտպան Վարդան Զուռնաչյանը, Վերաքննիչ դատարանը ամբաստանյալներ Գարիկ Բաբախանյանին ու Հակոբ Բոյաջյանին առաջադրված՝ ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով մեղադրանքը վերաորակել է նույն հոդվածի առաջին մասի և ամբաստանյալներին դատապարտել համապատասխանաբար 15-օրյա և մեկ-ամսյա ազատազրկման:

Հիշեցնենք, որ առաջին ատյանի դատարանը՝ դատավոր Արմեն Բեկթաշյանի նախագահությամբ, Գարիկ Բաբախանյանին ու Հակոբ Բոյաջյանին մեղավոր էր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով՝ խուլիգանություն, որը կատարվել է մի խումբ անձանց կամ կազմակերպված խմբի կողմից, զուգորդվել իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով, և դատապարտել համապատասխանաբար՝ 1 տարվա ու 3 տարի 9 ամսվա ազատազրկման:

Ըստ մեղադրանքի, Հակոբ Բոյաջյանը 2016թ. մայիսի 24-ին դատարանի դահլիճում ընթացող հիշյալ աղմկահարույց գործով դատական նիստի ընթացքում, Գարիկ Բաբախանյանի հետ` խմբի կազմում կատարել են խուլիգանություն, որը զուգորդվել է գույքի վնասմամբ և հասարակական կարգի խախտումը խափանող անձին դիմադրություն ցույց տալով:

Աղբյուր` Փաստինֆո