Փաստ ինֆո

Լոս Անջելեսում տեղի Է ունեցել «Օսկարի» թվով 90-րդ հոբելյանական մրցանակաբաշխությունը: Հոլիվուդյան «Դոբի» թատրոնից ուղիղ հեռարձակումը վարում Էր ABC հեռուստաալիքը, տեղեկացնում Է «Արմենպրես»-ը:

Միջոցառումը երկրորդ անգամ անընդմեջ վարել Է կատակերգու Ջիմի Քիմելը: Նա արարողությունն սկսել Է անցյալ տարի տեղի ունեցած սկանդալի վերաբերյալ կատակով, երբ «լավագույն ֆիլմի» համար մրցանակի դափնեկիրներին հայտարարած դերասանները շփոթել Էին ծրարները:

«Լավագույն ֆիլմ» գլխավոր անվանակարգում հաղթանակ Է տարել «Ջրի կերպը» կինոնկարը: Լավագույն ռեժիսոր Է դարձել Գիլիերմո դել Տորոն՝ նույն այդ ֆիլմի համար: Լավագույն դերասանուհի Է ճանաչվել Ֆրենսիս Մաքդորմանդը «Երեք բիլբորդ Էբինգի սահմանին, Միսսուրի» ժապավենում կատարած աշխատանքի համար: «Լավագույն դերասանուհի» անվանակարգում հաղթել Է Գերի Օլդմենը՝ «Մութ ժամանակներ» ֆիլմում խաղացած դերի համար: Կնոջ երկրորդ պլանի լավագույն դերի համար պարգեւն ստացել Է Էլիսոն Ջեննին «Տոնյան՝ ընդդեմ բոլորի» ֆիլմի համար:

«Երկրորդ պլանի լավագույն դերասան» կատեգորիայում մրցանակը շահել Է Սեմ Ռոքուելը՝ «Երեք բիլբորդ Էբինգի սահմանին, Միսսուրի» կինոնկարին մասնակցելու համար: Լավագույն ադապտացված սցենարի համար մրցանակը բաժին Է հասել Ջեյմս Այվորիին («Ինձ կոչիր քո անունով»), օրիգինալ սցենարի համար՝ Ջորդան Փիլին («Հեռացի՛ր»): «Լավագույն վավերագրական ֆիլմ» անվանակարգում «Օսկարն» ստացել Է «Իկար» ամերիկյան նախագիծը, որը նվիրված Է Ռուսաստանում տեղ գտած դոպինգային սկանդալին:

«Օտար լեզվով լավագույն ֆիլմ» անվանակարգում «Օսկարը» բաժին Է հասել Սեբաստիան Լելիոյի (Չիլի) «Ֆանտաստիկ կինը» ժապավենը: ԱՄՆ-ի կինեմատոգրաֆիական արվեստների եւ գիտությունների ակադեմիայի մրցանակը, որը 1940-ական թվականներից հայտնի Է որպես «Օսկար», հիմնվել Է 1929 թվականին եւ ավանդաբար հանձնվում Է կինոարվեստի գործիչներին ֆիլմերի ստեղծման գործում ներդրած նրանց ավանդի համար: Պարգեւատրման արարողությունն ամեն տարի անցկացվում Է Լոս Անջելեսում:

Աղբյուր` Փաստինֆո