Փաստ ինֆո

Հայ Յեղափոխական Դաշնակցությունը ողջունում է Հայաստան-Թուրքիա արձանագրությունների կընքման գործընթացի դադարեցնելու մասին ՀՀ նախագահի որոշումը։ 

ՀՅԴ գերագույն մարմնի տարածած հայտարարության մեջ, մասնավորապես, ասվում է. «2009 թվականի հոկտեմբերի 10-ին ստորագրված արձանագրություններն առ ոչինչ հայտարարելը վաղուց սպասված քայլ էր։

Ի սկզբանե Հ.Յ.Դաշնակցությունը վճռականորեն հանդես է եկել այդ արձանագրությունների դեմ՝ նկատի ունենալով դրանցում առկա մի շարք անընդունելի դրույթները եւ շահարկման տեղիք տվող ձեւակերպումները։ Ժամանակը ցույց տվեց, որ մեր մտահոգությունները տեղին էին: Թուրքիան Հայոց Ցեղասպանության 100-ամյակի նախաշեմին ընդամենը մարտավարական խնդիր էր լուծում՝ միաժամանակ փորձելով նախապայմաններ առաջադրել։

Աներկբա է, որ Հայաստան-Թուրքիա հարաբերությունների կարգավորման գործընթացն առաջ մղելու ջանքերը ձախողվել են նախապայմանների լեզվով խոսելու Թուրքիայի գործելաոճի պատճառով։ Այլեւս ակնհայտ է թուրքական դիվանագիտության ողջ սնանկությունը եւ Թուրքիայի՝ անվստահելի գործընկեր լինելու իրողությունը։ Հարկ է արձանագրել, որ Թուրքիայի ներկայիս իշխանությունները դեռեւս պատրաստ չեն պատմության հետ առերեսվելու եւ առանց նախապայմանների հարաբերություններ հաստատելու։

Ողջունելի է, որ նախընթաց տարիներին հայ քաղաքական հավաքական միտքը կարողացավ ճիշտ գնահատել իրավիճակը եւ համարժեք քայլեր ձեռնարկել Թուրքիայի մտադրությունների չեզոքացման ուղղությամբ։ Արձանագրությունների կնքման գործընթացի դադարեցումը նաեւ մեր համահայկական պայքարի, այդ պայքարին միացած քաղաքական եւ հասարակական կազմակերպությունների, մեր ողջ ժողովրդի ձեռքբերումն է։

Հավատացած ենք, որ հայ-թուրքական հարաբերությունների կարգավորումը անհրաժեշտություն է, սակայն այն պետք է տեղի ունենա քաղաքակիրթ աշխարհի արժեհամակարգին համապատասխան եւ որեւէ պարագայում չպետք է վտանգի մեր ազգային-պետական շահերը եւ հայ ժողովրդի անժամանցելի իրավունքները»:

Հիշեցնենք, որ նախօրեին ՀՀ նախագահ Սերժ Սարգսյանի հրամանգրով դադարեցվել է հայ-թուրքական արձանագրությունների կընքման ընթացակարգը:

Աղբյուր` Փաստինֆո