Փաստ ինֆո

Առանձնապես խոշոր չափերով կաշառք ստանալու, կաշառքի միջնորդության և կաշառք տալու գործով այսօր շարունակվեց վկաների հարցաքննությունը. հարցաքննվեցին ամբաստանյալ Բաբկեն Գասպարյանի որդիները:

Ամբաստանյալ Բաբկեն Գասպարյանի որդին՝ վկա Հովհաննես Գասպարյանը, հայտնեց, որ 2016թ. դեկտեմբերի 20-ին մի խումբ երիտասարդներ իրեն և եղբորը հետևել են, վիճաբանություն է ծագել, ապա իրեն և եղբորը ծեծել են, իսկ եղբայրը իրենց փրկելու համար նրանցից մեկին դանակահարել է: Այդ դեպքից հետո Գասպարյանների տանն իրավապահների կողմից խուզարկություն է կատարվել, և քննիչ Զադոյանը ծանուցագիր է թողել, որպեսզի Գասպարյան եղբայրները ներկայանան Էրեբունու քննչական բաժին, Հովհաննեսը՝ որպես վկա, իսկ Սոսը՝ կասկածյալ:

Ըստ վկայի՝ ընտանիքի 4 անդամներով՝ հայրը, մայրը, ինքը և եղբայրը, գնացել են քննչական բաժին, իրենք շենքի դիմաց կանգնել են, իսկ հայրը բարձրացել է քննիչի մոտ, վերադառնալով էլ հայտնել, թե փաստաբան Գալոյանի հեռախոսահամարն են տվել:

Թե ով էր փաստաբան Գալոյանի համարը տվել հորը, վկան կոնկրետ պատասխան չտվեց. մտածել է քննչական բաժնում են տվել: Հայրը նաև ասել է, որ 3000 դոլար են ուզել, որպեսզի եղբորը չձերբակալեն և մեղադրանքը վերաորակեն 112-րդ հոդվածից ինքնապաշտպանության:

Վկայի խոսքով՝ նշված օրն ինքը փաստաբան Գալոյանի հետ գնացել է քննիչ Զադոյանի մոտ՝ իր իրավունքների ու պարտականությունների մասին ծանուցվելուց հետո մերձավոր ազգականի դեմ հրաժարվել է ցուցմունք տալ, մտածել է, որ եղբոր համար այդպես լավ է:

Թեև եղբայրը որպես կասկածյալ ծանուցված է եղել, սակայն այդ օրը քննիչի մոտ չի ներկայացել, փաստաբան Գալոյանը թույլ չի տվել, ասել է, որ կձերբակալեն:

Ինչ վերաբերում է ենթադրյալ կաշառքին, ապա վկան նշեց, որ երբ հայրը Գալոյանին այդ գումարը տվել է վերջինիս աշխատասենյակում եղել է փաստաբան Գալոյանը, հայրը, եղբայրը՝ Սոսը, և ինքը, իսկ գումարը տալուց հետո Գալոյանը դուրս է եկել սենյակից՝ «ասելով տանեմ տամ գամ»:

Վկան նշեց, որ ինքը մտածել է, թե քննչական բաժին է գնում՝ գումարը տալու համար:

Ասվածի վերաբերյալ ամբաստանյալի կարգավիճակ ունեցող փաստաբանը հայտարարեց, թե վկան ստում է, և իր խոսքերն ամբողջությամբ չի ներկայացնում՝ ինքը դիմում է տարել ներկայացրել քննչական բաժին այն մասին, որ Սոս Գասպարյանը վատառողջ է և չի կարող ներկայանալ քննիչին:

Եղբոր առողջական վիճակի վերաբերյալ դիմումի մասին վկան հայտարարեց, որ ոչինչ չի հիշում:

Թե ի վերջո հայրը ու՞մ էր գումար առաջարկել, այդ գումարը փաստաբանն ու՞մ է փոխանցել կամ ինչու՞ այդ գումարը, որը, վկայի խոսքով, փաստաբանին են տվել, հետ չեն պահանջել, եթե օրեր անց կալանավորել են իր եղբորը, վկան կոնկրետ պատասխան չտվեց, ավելին՝ դատավարության մասնակիցներին փորձում էր համոզել, որ իրենց տանն անգամ այդ հարցերի վերաբերյալ քննարկում չի եղել, ապա նաև նշեց, որ այդ ընթացքում պաշտպան Գալոյանը, և մյուսները հուսադրում էին, որ ազատ կարձակեն եղբորը, կօգնեն:

Վկայի խոսքով, սակայն, իր ներկայությամբ փաստաբան Գալոյանի և քննիչ Զադոյանի հետ գումարային խոսակցություն տեղի չի ունեցել, գումարային խոսակցությունը ինքը բացառապես լսել է հորից:

Հաջորդիվ հարցաքննվեց Բաբկեն Գասպարյանի մյուս որդին՝ Սոս Գասպարյանը, ում վերաբերյալ գործի շրջանակներում էլ բացահայտվել է ենթադրյալ կաշառքի գործը:

Ըստ վկայի՝ ինքը հորից տեղեկացել է, որ 3000 ԱՄՆ դոլար են ուզել, որպեսզի իրեն չձերբակալեն և վերաորակեն արարքը, հայրն էլ վճարել է: Բայց իրեն կալանավորել են:

Նրա խոսքով՝ կալանավայրում գտնվելու ժամանակ փաստաբան Գալոյանը և քննիչ Զադոյանը մի քանի անգամ իրեն այցելել են և հուսադրել, որ լավ կլինի, բայց ոչ մի բան էլ լավ չի եղել:

Վկայի ցուցմունքն անավարտ մնաց, և այն կշարունակվի մարտի 6-ին կայանալիք նիստում:

Աղբյուր` Փաստինֆո