Փաստ ինֆո

«Ղ-Տելեկոմ» ՓԲԸ-ում առանձնապես խոշոր չափերի յուրացման գործով դատավճռի դեմ վերաքննիչ բողոքների գործով այսօրվա դատական նիստում մեղադրողն առարկեց Սյունիքի մարզում՝ Կապանում, «Ղ-Տելեկոմ» ՓԲԸ նախկին պատասխանատու Աշոտ Կույումջյանի պաշտպան Կարեն Մեժլումյանի բողոքի դեմ: Պաշտպանը միջնորդում է բեկանել ու փոփոխել առաջին ատյանի դատարանի դատավճիռը, որով իր պաշտպանյալը դատապարտվել է վեց տարվա ազատազրկման, և արդարացնել իր պաշտպանյալին:

Մեղադրողը նշեց, որ նույն փաստարկները պաշտպանն առաջ է քաշել նաև առաջին ատյանի դատարանում իր պաշտպանական ճառում, դատարանը, սակայն, դատավճռով հերքել է այդ փաստարկները:

Առաջին ատյանի դատարանի կողմից արդարացված մյուս ամբաստանյալ Սարգիս Արշակյանի պաշտպան Սամվել Միրզոյանն այսօր սկսեց ներկայացնել մեղադրողի վերաքննիչ բողոքի դեմ իր 33-էջանոց առարկությունները: Նա նշեց, որ առաջին ատյանի դատարանը միայն իր պաշտպանյալի մասով իրականացրել է բազմակողմանի, լրիվ ու օբյեկտիվ դատական քննություն՝ արդյունքում ճանաչելով և հռչակելով Սարգիս Արշակյանի անմեղությունը ՀՀ քրեական օրենսգրքի 38-179-րդ հոդվածի 3-րդ մասի 1-ին կետով՝ առանձնապես խոշոր չափերի յուրացմանն օժանդակելը, մեղադրանքում՝ մեղսագրված հանցանքի կատարմանը նրա մասնակցությունն ապացուցված չլինելու հիմքով:

Ըստ պաշտպանի, իր պաշտպանյալի նկատմամբ արդարացման դատավճռի դեմ մեղադրողի բողոքը, որում վերջինս միջնորդում է բեկանել և փոփոխել առաջին ատյանի դատարանի դատավճիռը, Սարգիս Արշակյանին մեղավոր ճանաչել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով և նրա նկատմամբ նշանակել համաչափ պատիժ, պաշտպանական կողմի գնահատմամբ, ունի բացահայտ ձևական բնույթ: Նա ընդգծեց, որ դատարանը արդարացման դատավճիռը կայացնելիս ղեկավարվել է ոչ թե ենթադրություններով, քրեական գործով հարմարեցված ու շինծու ապացույցներով, այլ ղեկավարվել է Քրեական դատավարության ու Քրեական օրենսգրքերի համապատասխան հոդվածներով ու պահանջներով, ինչպես նաև Վճռաբեկ դատարանի ու Մարդու իրավունքների եվրոպական դատարանի որոշումներում արտահայտված դիրքորոշումներով, որոնց հիման վրա էլ կայացրել է «միանգամայն հիմնավոր և արդար դատավճիռ»: Պաշտպանը մեղադրողի բողոքի դեմ իր առարկությունները կշարունակի ներկայացնել արդեն հաջորդ դատական նիստում:

«Փաստինֆո»-ի խնդրանքով մեկնաբանելով իր բողոքի դեմ մեղադրողի առարկությունները՝ ամբաստանյալ Աշոտ Կույումջյանի պաշտպան Կարեն Մեժլումյանը դրանք որակեց որպես անհիմն ու տեղի ունեցածը խեղաթյուրող:

Պաշտպանը, մասնավորապես, նշեց, որ ընկերության սպասարկման այլ գրասենյակների ղեկավարներ ու աշխատակիցներ ցուցմունքներում հստակ նշել են, որ միշտ վաճառքը չձևակերպված քարտի լիցքավորվելու դեպքում պարզաբանման համար նամակներ էին ստանում: Այժմ Աշոտ Կույումջյանի պաշտոնում աշխատող վկան էլ ասել է, որ միշտ այդպիսի նամակներ են ստացել: Իսկ երբ պաշտպանական կողմը հարց է տվել՝ դրանք կներկայացնե՞ք, վկան պատասխանել է՝ այո, եթե ղեկավարությունը ցուցում տա: Դատարանը որոշում է կայացրել, որպեսզի դրանք ներկայացվեն, սակայն վկան այլևս չի եկել, ընկերության ներկայացուցիչը բերել է նման նամակ 2014թ. նոյեմբերի 19-ի ամսաթվով, երբ Աշոտ Կույումջյանի դեմ անգամ հաղորդում չէր տրվել հանցագործության մասին, որ մի այդպիսի քարտի վերաբերյալ ստացել է այդպիսի նամակ: «Եվ նշեցին, որ պահպանված է սա, չնշեցին, որ նախկինում նման կարգ չի եղել», ընդգծեց Կ.Մեժլումյանը: Դա, ըստ պաշտպանի, վկայում է, որ այդ ժամանակ նման նամակներ ստացվում էին: «Եվ ընդհանրապես, եթե իրենից հետո են այդ համակարգը տեղադրել, Աշոտ Կույումջյանը չէր կարող իմանալ այդ համակարգի մասին, իսկ ինքը պնդել ու պնդում էր, և մնացած վկաներն էլ էին պնդում, որ կա այդ համակարգը»:

Կարեն Մեժլումյանը հաստատեց, որ լիցքավորման քարտերի բեռնագրերի մի մասի վրա կա Աշոտ Կույումջյանի ստորագրությունը, բայց այնտեղ չի գրված, ասենք, հիսուն հազար հատ քարտ, նշված է մի նիշից մյուս նիշը, չի երևում քանի քարտ է, պետք է ուշադիր նայել ու հաշվել:

Եթե 700 հազար քարտ է յուրացվել, 700 հազար լիցքավորվել, ուրեմն 700 հազար հատ նամակ պետք է ստացվեր, դա չէր կարող չերևալ, նման բան տեղի չի ունեցել, ասաց պաշտպանը:

Կարեն Մեժլումյանը ներկայացրեց նաև ՎիվաՍելի տված վիճակագրությունը, որը հնարավոր չէ փոխել: Մասնավորապես, չի կարող ամբողջ հանրապետությունում լիցքավորման քարտերի վաճառքի երկուսուկես անգամ անկում լինել, իսկ Սյունիքի մարզում՝ աճ: «Այսինքն՝ սա այն պարզ ապացույցներն են, այն վիճակագրությունն է, որով հերքվում է այն լեգենդը, որ կառուցել է մեղադրանքի կողմը: Մենք պնդում ենք, որ դատարանը դրա վրա էլ հատկապես պետք է ուշադրություն դարձնի, որպեսզի ճիշտ եզրահանգման գա»,- ասաց Կ.Մեժլումյանը:

Լուսանկարում՝ փաստաբան Կարեն Մեժլումյանը

Լուսանկարը՝ Ֆոտոլուրի

Աղբյուր` Փաստինֆո