Փաստ ինֆո

Ազգային ժողովի ՀՀԿ խմբակցության պատգամավոր Գևորգ Կոստանյանը կարծում է, որ Բարձրագույն դատական խորհրդի ձևավորումը Հայաստանի դատական համակարգի բարեփոխուների լուրջ սկիզբ կարելի է համարել:

Ազգային ժողովում Բարձրագույն դատական խորհրդի անդամների ընտրության հարցի քննարկմանը Գևորգ Կոստանյանն ընդգծեց, որ այդ խորհրդի ձևավորմամբ դատական համակարգի լուրջ բարեփոխումների սկիզբն են դնելու:

«Մենք բոլորս հասկանում ենք, որ շատ կարևոր է, որ ունենանք լավ օրենքներ, շատ կարևոր է հասկանալ, որ մենք պետք է ունենանք օրենքներ, որոնք համապատասխանում են մարդու հիմնարար իրավունքների ճանաչմանը, հռչակմանը և պաշտպանությանը: Միաժամանակ մենք հասկանում ենք, որ ցանկացած պետության պայմաններում խոսել սոցիալական, տնտեսական զարգացման մասին ավելորդ է, եթե մենք չունենք պատշաճ դատական համակարգ: Եվ հիմա Բարձրագույն դատական խորհրդի ձևավորմամբ մենք սկիզբ ենք դնում իրականում դատական բարեփոխումները կյանքի կոչելուն»,- «Արմենպրես»-ի հաղորդմամբ՝ ասաց Կոստանյանը:

Նա շեշտեց, որ կարող ենք ունենալ ակնկալիքները բավարարող դատական համակարգ երկու դեպքում՝ կադրային ճիշտ քաղաքականություն, դատավորների պատասխանատվություն:

«Եվ այս մարմնի դերը, որը մենք ձևավորում ենք, հիմնականում այս երկու գործառույթների մեջ է: Այսինքն, և դատական կորպուսի ձևավորման կադրային ընտրությունը և այդ դատավորների պատասխանատվության ենթարկելու հարցում այս մարմինը միակ պատասխանատու սուբյեկտն է: Ես ցանկանում եմ շնորհավորել բոլորիս, քանի որ մենք սկիզբ ենք դնում տրամագծորեն նոր գործընթացի: Ես համոզված եմ, որ արդյունքները մեզ երկար սպասեցնել չեն տալու»,- նշեց Գևորգ Կոստանյանը: Գևորգ Կոստանյանը կարևորեց այն հանգամանքը, որ Բարձրագույն դատական խորհրդի անդամները խորհրդարանում պատգամավորների հարցերին պատասխանելու ընթացքում զերծ են մնացել քաղաքական հարցադրումներին պատասխանելուց:

«Մեր ընդդիմադիր գործընկերների հարցադրումները հիմնականում քաղաքական բնույթի էին: Եվ սա լավ է, քանի որ թեկնածուների ոչ մասնագիտական, ոչ անձնական որակները որևէ մեկի մոտ կասկած չեն հարուցում: Իսկ մեր թեկնածուների պատասխաններն այդ քաղաքական հարցադրումներին ապացուցեցին այն, որ հենց իրենք էլ պետք է լինեն այդ խորհրդի անդամները, որովհետև մեր ընդդիմադիրները հետևողականորեն փորձում էին նրանց ներքաշել քաղաքական գործընթացների մեջ, նրանք սկզբունքորեն ձեռնպահ մնացին որևէ ձևով քաղաքական բնույթի հարցադրումների մեջ ներքաշվելուց: Դա իսկապես նշանակում է, որ մեզ հաջողվել է ներկայացնել թեկնածուների, ովքեր առնվազն քաղաքական չեզոքության պահպանման տեսանկյունից բացարձակ անխոցելի են, ինչը մեզ անհրաժեշտ է»,- ասաց պատգամավորը:

Գևորգ Կոստանյանը հաջողություն մաղթեց Բարձրագույն դատական խորհրդի անդամության թեկնածուներին՝ համոզմունք հայտնելով, որ սպասելիքներն ավելին են, քան կարողանում են արտահայտել: Նրա խոսքով՝ անցած տարիների ընթացքում տեսել են դատական համակարգում առկա խնդիրները: Որպես ՄԻԵԴ-ում ՀՀ ներկայացուցիչ՝ Գևորգ Կոստանյանը շեշտեց, որ արդարադատության որակի բարելավումը և եվրոպական չափանիշներին համապատասխանեցնելը լինելու է գերխնդիր:

Աղբյուր` Փաստինֆո