Փաստ ինֆո

ՀՀ Ազգային ժողովի փոխնախագահ Արփինե Հովհաննիսյանը կարծում է, որ որեւէ նոր սահմանադրական մարմին ձեւավորելիս անչափ կարեւոր է չունենալ չափազանցված ակնկալիքներ, որպեսզի հետագայում, չարդարացնելու իրականությանը չհամապատասխանելու դեպքում այդ մարմնին դժգոհություններ չներկայացվեն:

«Արմենպրես»-ի հաղորդմամբ՝ նա այս մասին ասաց Ազգային ժողովում փետրվարի 27-ին մեկնարկած խորհրդարանական հերթական քառօրյա նիստի ընթացքում, որտեղ քննարկվում է Բարձրագույն դատական խորհրդի անդամների ընտրության հարցը:

«Չափազանց կարեւոր հարց ենք քննարկում, եւ տրամաբանական են հնչող գնահատականներն ու կարծիքները, դահլիճում տիրող մթնոլորտը: Այն մարմինը, որի անդամների ընտրության հարցն ենք քննարկում, ունի չափազանց կարեւոր առաքելություն՝ դատավորի լիազորությունների դադարեցումից մինչեւ կարգապահական պատասխանատվության ենթարկելը: Ոչ ոք, այդ թվում՝ իմ պատգամավոր գործընկերները, նրանք, ովքեր ընդհանրապես խոսում են դատական համակարգի մասին, ցավոք, երբեք չեն նշում այն հարցը, թե մենք իրականում հասել ենք այդ համակարգի կայացվածության այն կետին, որին ուզում ենք, կամ դատավորների անկախության այն ուղենշին, որին ձգտում ենք:

Փաստերի հետ պետք է հաշվի նստել, իսկ փաստն այն է, որ մենք ունենք դատավորներ, որոնք օր ու գիշեր անխոնջ աշխատում են դատական համակարգի պատիվը բարձր պահելու համար, բայց նաեւ կան դատական համակարգի այնպիսի ներկայացուցիչներ, ովքեր այդ պատվաբեր առաքելությունը այդքան էլ լավ չեն իրականացնում»,-նշեց նա:

Նրա խոսքով՝ Արդարադատության խորհուրդը, որը Դատական խորհրդի իրավանախորդն է, իր կազմավորման հիմքերով չէր կարող ապահովել դատական համակարգի անկախությունը, քանի որ ինքնին այն անկախ չէր: Եվ քանի մենք ունենք այնպիսի դատավորներ, որոնք կարող են խնդրահարույց լինել իրավական, կոռուպցիոն եւ այլ հարցերով, բնականաբար, Արդարադատության խորհուրդը նախկինում պետք է ունենար խնդիրներ»,- ասաց Արփինե Հովհաննիսյանը՝ ընդգծելով, որ դատական համակարգի բարեփոխման առումով Դատական բարձրագույն խորհուրդը ունի հստակ առաքելությունը:

Անդրադառնալով խորհրդի անդաﬓերի թեկնածուներին՝ Արփինե Հովհաննիսյանն իր դրական կարծիքը հայտնեց բոլորի մասին:

«Ես չէ, որ պետք է գնահատական հնչեցնեմ, բայց կարող եմ կարծիքս ասել: Գագիկ Հարությունյանը պետականաշինության ակունքներում կանգնած անձանցից է, ում հետ հնարավորություն եմ ունեցել շփվելու, եւ ինձ զարմացրել է հարցը մշտապես խորքային կերպով դիտարկելու նրա ունակությունը: Գեւորգ Դանիելյանի հետ կարճ ժամանակ եմ աշխատել, նա նաեւ ինձ դասավանդել է: Նրա հանրային ընկալման եւ պրոֆեսիոնալիզմի եւ պարկեշտության մասին կարելի է երկար խոսել: Իմ գիտական գործունեության ընկերներ Լիպարիտ Մելիքջանյանը եւ Սերգեյ Մեղրյանը… Ամեն օր իրավաբանական ֆակուլտետ աշխատանքի գնալիս ես այս մարդկանց հետ եմ առնչվում, փոխանակում գիտական մտքեր: Նրանք իրական գիտնականներ են, ովքեր իրենց գործը լավ գիտեն եւ գիտեն՝ ուր են գնում: Հայկ Հովհաննիսյանը եւս մասնագիտական բարձր ունակություններ ունեցող անձ է, ով պահպանում է քաղաքական չեզոքություն, ինչը այդ մարմնի համար չափազանց կարեւոր է»,-եզրափակեց ՀՀ ԱԺ փոխնախագահը:

Աղբյուր` Փաստինֆո