Փաստ ինֆո

ԼՂՀ պաշտպանության բանակի նախկին հրամանատար Սամվել Բաբայանի և մյուսների գործով քիչ առաջ հրապարակվեց Վերաքննիչ դատարանի որոշումը:

Վերաքննիչ դատարանը որոշեց անփոփոխ թողնել առաջին ատյանի դատարանի դատավճիռը և մերժեց ներկայացված բողոքները:

Սամվել Բաբայանի պաշտպան Քալաշյանը լրագրողների հետ զրույցում ասաց, որ ակնակալում էր արդար որոշում, քանի որ, ըստ նրա, բողոքը հիմնավոր էր՝ հիմնված փաստերի վրա:
Պաշտպանը նշեց, որ պատրաստվում են Վճռաբեկ բողոք ներկայացնել:

Հիշեցնենք, որ ատյանի դատարանի դատավճիռը բողոքարկել էր 6 տարի ժամկետով ազատազրկման դատապարտված Սամվել Բաբայանը, 3 տարի ժամկետով ազատազրկման դատապարտված գործարար Սանասար Գաբրիելյանը և 2 տարի ժամկետով ազատազրկման դատապարտված Արմեն Պողոսյանը:

Հիշեցնենք նաև, որ Կենտրոն և Նորք-Մարաշ վարչական շրջանների ընդհանուր իրավասության դատարանի դատավճռով Կարեն Քոչարյանը դատապարտվել է 2 տարի 6 ամիս ժամկետով ազատազրկման, սակայն նրա նկատմամբ նշանակված պատիժը պայմանականորեն չի կիրառվի՝ սահմանվել է փորձաշրջան՝ 2 տարի ժամկետով:

Անդրանիկ Քոչարյանը դատապարտվել էր 2 տարի ժամկետով ազատազրկման, նրա նկատմամբ ևս պատիժը պայմանականորեն չի կիրառվի՝ սահմանվել է 2 տարի ժամկետով փորձաշրջան:

Իսկ Ժորա Զաքարյանը և Դավիթ Հարությունյանը դատապարտվել են 2 տարվա ազատազրկման՝ նրանց նկատմամբ ևս նշանակված պատիժը պայմանականորեն չի կիրառվի, քանի որ սահմանվել է 2 տարի ժամկետով փորձաշրջան:

Ըստ մեղադրանքի՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահռթիռային համալիր ձեռք բերելուն, փոխադրելուն և պահելուն, ինչպես նաև փոխարկման արդյունքում ձեռք է բերել հանցավոր ճանապարհով ստացված գույք:

Ըստ Սանասար Գաբրիելյանին և Արմեն Պողոսյանին առաջադրված մեղադրանքի՝ նրանք մի խումբ անձանց հետ` նախնական համաձայնությամբ ապօրինի կերպով ձեռք է բերել, փոխադրել և պահել ռազմամթերք հանդիսացող «Իգլա» տեսակի դյուրակիր զենիթահռթիռային համալիր:

Կարեն և Անդրանիկ Քոչարյաններին, Ժորա Զաքարյանին և Դավիթ Հարությունյանին էլ մեղադրանք է առաջադրվել այն բանի համար, որ նրանք օժանդակել են հանցավոր ճանապարհով ստացված գույքը` դրա հանցավոր ծագումը և իրական բնույթը խեղաթյուրելու և օրինական շրջանառության մեջ մտցնելու նպատակով ձեռք բերելուն:

Այսպիսով, հանցավոր ճանապարհով ստացված գույքն օրինականացնելու (փողերի լվացում), ինչպես նաև ապօրինի կերպով ռազմամթերք ձեռք բերելու, պահելու և փոխադրելու գործով անցնում են 7 մեղադրյալ, որոնցից երեքը՝ Սամվել Բաբայանը, Սանասար Գաբրիելյանը և Արմեն Պողոսյանը գտնվում են կալանքի տակ, իսկ մյուս չորսի նկատմամբ որպես խափանման միջոց է ընտրված չհեռանալու մասին ստորագրությունը:

Լուսանկարը՝ Ֆոտոլուրի

Աղբյուր` Փաստինֆո