Փաստ ինֆո

Հայաստանի ծանրամարտի ֆեդերացիայի գլխավոր քարտուղար, հավաքականի գլխավոր մարզիչ Փաշիկ Ալավերդյանը «Արմենպրես» լրատվական գործակալության մամուլի սրահում հանդիպել է լրագրողների հետ և ամփոփել է Հայաստանի առաջնության արդյունքները և խոսել առաջիկա անելիքների մասին: Այս մասին հայտնում է armsport.am-ը:

- Պարոն Ալավերդյան, Հայաստանի առաջնությունում գրանցված արդյունքներից գո՞հ եք:  

- Ես գոհ եմ առաջնությունից, քանի որ այս պահի դրությամբ այդ մարզիկները չէին կարող գտնվել իրենց լավագույն մարզավիճակում:

Առաջիկա մրցումն անցկացվելու է հուլիս ամսին՝ երիտասարդների աշխարհի և պատանիների Եվրոպայի առաջնությունը: Դեռ 4 ամիս կա, ու 4 ամիս չի կարող մարզիկը պահպանել իր լավագույն մարզավիճակը:

Օգոստոսի 20-ից հետո մեծահասակները կկարողանան մասնակցել միջազգային ֆեդերացիայի կողմից կազմակերպվող բոլոր մրցաշարերին: Սեպտեմբերին կմասնակցեն Ուսանողական խաղերին, միայն Ռուբենը, հավանաբար, չի մասնակցի տարիքի պատճառով: Եթե 28 տարեկան մարզիկներին թույլ տան, նա էլ կմասնակցի: Դա փորձամրցում կլինի: Մեր նպատակն աշխարհի առաջնությանը պատրաստվելն է, որը մեզ օլիմպիական վարկանիշներ կտա: Ի տարբերություն մյուս Օլիմպիական խաղերի վարկանիշ ձեռքբերելուց, այժմ անհատական է լինելու: 

- Խոսեցիք, որ արդյունքներից գոհ եք: Ամեն դեպքում, ի՞նչ խնդիրներ կան, որոնք պետք է շտկվեն:

- Հիմա նախևառաջ գոհ ենք, քանի որ ֆիզիկապես պատրաստ են մարզիկները: Սրանից հետո ՝ մարտի 2-ին, այդ նույն հավաքականը՝ նոր տղաներով համալրված, ուսումնամարզական հավաք կանցկացնի: Ոչ ոք դուրս չի մնա: Տղաները կատարել են իրենց առջև դրված խնդիրները: Մի քանի մարզումների ընթացքում էլ տեխնիկական վարժություններ ենք շտկել: 

Բացթողումները հիմնականում տեխնիկական վարժությունների կատարման հետ են կապված: Թիմն Ուկրաինայում 20-օրյա մարզումներ կանցկացնի: Այնպիսի տղաներ են ընդգրկված երիտասարդների և պատանիների թիմում, որոնք կարող են դառնալ ազգային հավաքականի անդամ, և կարող են պայքարել Տոկիոյի Օիլիմպիական խաղերին մասնակցելու համար: Անուններ չեմ ցանկանա նշել:

- Պարոն Ալավերդյան, խոսեք Անդրանիկ Կարապետյանի մասին: 

- Մարզիկի զրո ստանալուց ոչ ոք ապահովագրված չէ: Այնպիսի լեգենդար մարզիկներ են զրո ստացել, ինչպես օրինակ Յուրի Վարդանյան, Դավիդ Ռիգերտը, Վասիլի Ալեքսեևը: Դա անպուսափելի է: Բայց Անդրանիկն իրավունք չուներ զրո  ստանալու այդ քաշից: Դժգոհ եմ նրանից: Մեկ տարի առաջ 194 կգ արդյունք է գրանցել հրում վարժությունում, իսկ հիմա ընդամենը 184 կգ:  Եթե այն ժամանակ վնասվածքը զգացնել տալիս էր, դեռ մեկ տարի էր անցել վնասվածքից, իսկ հիմա 2 տարի է անցել, հիմա է՞լ է զգացնել տալիս: Նրա ուղեղի հետ կապված հարցեր կան, որը մենք անպայման կլուծենք:

- Նազիկ Ավդալյանի մասին ի՞նչ կարող եք ասել:

- Նազիկն այլևս չի մարզվում: Այդ մասին հայտարարությամբ էլ է հանդես եկել: Ադամսի ցուցակներից էլ ենք նրան հանել: Հայտնել է, որ զբաղված է իր ընտանիքով, իրեն խնդրել է չանհանգստացնել, այլևս չի մարզվելու և մրցումների չի մասնակցելու:

- Առաջիկա անելիքների մասին ավելի մանրամասն կխոսե՞ք:

- Տղամարդիկ առաջիկա ուսումնամարզական հավաքը կանցկացնեն Ուկրաինայում մարտի 2-ից մինչև 22-ը: Աղջիկները՝ Օլիմպավանում ապրիլի 11-ից 24-ը: 24-ին կա պատանիների առաջնություն, իսկ մենք աղջիկների հավաքականում աշխատում ենք բոլորին ընդգրկել՝ պատանիներ, երիտասարդներ, մեծահասակներ, քանի որ ունենք մեկ ընդհանուր հավաքական: Նրանց չենք առանձնացնում: Հավաքականը ճշտվելու է: Երիտասարդ տղաները մարտի 31-ից մինչև ապրիլի 10-ը կգնան Աբովյան՝ հավաքի, իսկ աղջիկներին այդ ընթացքում կփորձենք ուղարկել Ծաղկաձոր:

Դրանից հետո նորից ուսումնամարզական հավաքներ կկազմակերպենք պատանիների և երիտասարդների համար: Եվրոպայի առաջնությունը պատանիներին Օլիմպիական ուղեգիր կարող է տալ: Պատանի տղաների համար ունենք մեկ Օլիմպիական ուղեգիր՝ թիմային, իսկ աղջիկների համար մենք դեռ Օլիմպիական վարկանիշ չունենք: Դա մեզ կտա մայրցամաքային առաջնությունը. մեզ համար դա կլինի Եվրոպայի առաջնությունը: Թիմային հաշվարկով պետք է զբաղեցնենք 1-6-րդ հորիզոնականները, որպեսզի ունենանք մեկ ուղեգիր: Սկզբունքորեն մեզ համար դա խնդիր չէ:

Դրանից հետո, օգոստոսին մենք ուսումնամարզական հավաքներ կկազմակերպենք կա'մ Ռուսաստանում, կա'մ Ուկրաինայում, որպեսզի պատրաստվենք Ուսանողական խաղերին: Դրան զուգահեռ կնախապատրաստվենք Եվրոպայի երիտասարդական առաջնությանը, որը կանցկացվի հոկտեմբերի 23-ից Իսպանիայում: Դրանից հետո՝ նոյեմբերին վերջին, Աշխաբադում կմասնակցենք աշխարհի առաջնությանը, որն Օլիմպիական վարկանիշ է տալիս: Այդպես կավարտենք տարին:

Այլևս մենք մրցումներ բաց չենք թողնելու: Դեռ փաստացի չենք ստացել այն փաստաթուղթը, որը մեզ թույլ կտա մասնակցելու մրցաշարերին, բայց մարտի 26-ին միջազգային ֆեդերացիան մեծ նիստ կհրավիրի, որտեղ կորոշեն՝ մի քանի պետությունների մեկամյա որակազրկումը կրճատել և դարձնել 8 կամ 10 ամիս. 8 ամիս զրկված կլինեն երիտասարդները և պատանիները, իսկ 10 ամիս  մեծահասակները:  Հունիսի 20-ից հետո երիտասարդները և պատանիները կկարողանան մասնակցել ֆեդերացիայի կողմից կազմակերպվելիք բոլոր մրցաշարերին, իսկ օգոստոսին 20-ին՝ մեծահասակները կկարողանան մասնակցել բոլոր մրցաշարերին: Դա կանխատեսվում է:

Եթե հանկարծ ունեցանք դոպինգ-թեստի դրական արդյունք, խոստանում եմ՝ օրերս խորհրդարան կներկայացնեմ մի առաջարկ, որտեղ գրված կլինի՝ խախտումներ կատարող և արգելված դեղամիջոցներ օգտագործող մարզիկը, նրա մարզիչը պետք է 2 տարվա ազատազրկման դատապարտվեն: Չգիտեմ՝ արդյոք այդ առաջարկը կընդունվի՞, թե՞ ոչ: Դա ուշացած առաջարկ կլինի: Բազում երկրներում դա ընդունված կարգ է: 

- Խոսեցիք Հայաստանի առաջնության մասին, նշեցիք, որ տեխնիկական խնդիրներ ունեն մարզիկները: Արդյոք հոգեբանորեն և՞ս խնդիր կա:

- Այո, պետք է անպայման մրցահարթակ տեսնեն: Այն մարզիկները, որոնց հանդեպ կասկածներ կունենանք, կմասնակցեն երիտասարդների առաջնությանը, որպեսզի այդ հոգեբանական խնդիրները լուծվեն, հաղթեն,և հաղթողի կարգավիճակով վերադառնան հայրենիք:

- Նշեցիք, որ երկու տարվա ազատազրկման առաջարկ կանեք: Մարզական դաշտում դրա մասին տեղյա՞կ են, արձագանքողներ կան:

- Հնարավոր է՝ ես եմ թերացել որպես ֆեդերացիայի գլխավոր քարտուղար, որ մինչև հիմա մեզ մոտ չի եղել նման բան: Բայց հիմա այլընտրանք չունենք: Ամբողջ աշխարհում դա ընդունված բան է:

Եթե ստուգողները մարզիկին 2 ժամ չեն գտնում, նա համարվում է բռնված: Օրինակ, մեր մարզիկներից մեկը հավաքի ընթացքում Կապան էր գնացել, մենք ստիպված էինք սեփական միջոցներով տաքսի վարձել, որպեսզի ժամանակին գա և դոպինգ-թեստ հանձնի: 

Միջազգային ֆեդերացիայի հետ մեր կապը ժամանակավորապես դադարեցվել է, մենք զրկված չենք: Կարող ենք մասնակցել հանրապետական առաջնություններին: Ես հույս ունեմ, որ արդարությունը պետք է հաղթի: Ես միայն կցանկանամ, որ հաջորդ անգամ, երբ հավաքվենք, տխուր թեմաների մասին չխոսենք:

Պետք է ինձ նեցուկ կանգնի ծանրամարտի ամբողջ աշխարհը: 50 հազար դոլար տուգանքը ՀԱՕԿ նախագահի հետ կարողացանք վճարել: Դա ահռելի գումար է: Ընդհանուր առմամբ. 22 կետ է: Շատ հարցեր կան:

Աղբյուր` Փաստինֆո