Փաստ ինֆո

Ընդամենը օրեր անց՝ մարտի 1-ին,  Հայաստանի բնակիչները դեղորայք ձեռք բերելու համար դեղատուն կմտնեն դեղատոմսը ձեռքներին: Առաջին հայացքից թվում է, թե Առողջապահության նախարարության այս քայլը պետք է, որ հանրության կողմից դրական գնահատականի արժանանար, քանի որ պարզ տրամաբանություն է՝ քաղաքացին դեղորայք պետք է ընդունի բժշկի կողմից հետազոտվելուց հետո և ոչ թե ինքնաբուժությամբ զբաղվի, բայց դա միայն առաջին հայացքից, քանի որ այստեղ խնդիրն ավելի խորքային է: Ավելին՝ կոռուպցիոն դրսեւորումների պարարտ հող կստեղծի։

Արդյո՞ք Առողջապահության նախարարությունը նման քայլի գնալուց առաջ հանրությանը նախապես չպետք է տեղեկացներ, թե՞ այստեղ էլ առաջնորդվում ենք՝ մենք որոշում ենք՝ հանրությունը ուզի-չուզի պետք է համակերպվի սկզբունքով:

Մեր համաքաղաքացիների շրջանում կատարված հարցումները ցույց տվեցին, որ  Առողջապահության նախարարության այս որոշումը տագնապի և մտահոգությունների մեծ ալիք է բարձրացրել, իսկ դեղատների աշխատակիցները փաստում են՝ այս օրերին մեր համաքաղաքացիները սկսել են մեծ քանակությամբ դեղեր գնել, հատկապես անտիբիոտիկներ, ցավազրկողներ և ճնշման հետ կապված դեղորայքներ:

Համաձայնեք, Հայաստանում բժշկի դիմելու, պրոֆիլակտիկ հետազոտություններ անցնելու մշակույթը մեղմ ասած ձևավորված չէ,  և Առողջապահության նախարարության այս որոշումն առողջ հասարակություն ունենալու ճանապարհ է բացում, սակայն մի երկրում, որտեղ գործազրկությունը մեծ ցուցանիշ ունի,  իսկ նվազագույն  աշխատավարձը կազմում է 55 000 դրամ, մի երկիր, որը ըստ միջազգային դասակարգման համարվում է ծերացող երկիր, ասել է, թե բնակչության շրջանում ծերերը գնալով ավելի շատ են, քան երիտասարդությունը, ինչպե՞ս ենք նման որոշում ընդունում և ստիպում մարդկանց ամեն մի գանգատի դեպքում շտապել պոլիկլինիկա և ժամերով հերթեր կանգնել՝ ցավազրկող կամ որևէ անտիբիոտիկ գնելու դեղատոմսի համար:

Մայրաքաղաքի դեղատներում մեր շրջայցի ժամանակ նկատեցինք, որ ավելի շատ դեղորայք են գնում տարեցները: «Դուք պատկերացնում եք պոլիկլինիկաներում ի՞նչ հերթեր են գոյանալու, արդյոք մենք՝ ծերերս, ի վիճակի ենք այդքան հաճախակի ժամերով հերթերում կանգնել՝ դեղատոմսի համար»,- «Փաստինֆո»-ի թղթակցի հետ զրույցում իր վրդովվմունքն արտահայտեց  տիկին Կարինեն,  ով նշեց, որ թոշակառու է,  բարձր ճնշում ունի եւ ամեն օր դեղորայք է ընդունում:

Մեկ այլ դեղատան այցելու էլ նշեց՝ որոշումը հնարավորություն կտա հսկողության տակ պահել առողջական խնդիրներ ունեցող մեր համաքաղաքացիներին՝ ի վերջո ինքնաբուժությամբ չեն զբաղվի:

Տիկին Սուսաննա Սահակյանը, ով այդ պահին ցավազրկող քսուք էր գնում դեղատնից ասաց՝ հաճախակի անտիբիոտիկներ է գնում, ցավազրկողներ, նոշպա: Որոշակիորեն ճիշտ մոտեցում է դեղատոմսով դեղ գնելը,  սակայն դրա հետ մեկտեղ այլ բարդություններ են առաջ գալու, եթե աշխատանքի ես ինչպես կարող ես ժամերով պոլիկլինիկաներում հերթ կանգնել դեղատոմսի համար, սա խնդիր է առաջացնելու գործատուի և աշխատողի միջև: «Բժշկի հսկողությունը պետք է, բայց այս մոտեցումը ճիշտ չէ, մեր ժողովուրդը մեղք է »:

«Այսօր մի բժշկի մոտ մտնելու համար ժամերով հերթ ենք կանգնում, դեղատոմսի համար ի՞նչ կկատարվի, ոչ ոք չի մտածում ժողովրդի մասին»,- զայրացած ասաց շաքարային դիաբետով  հիվանդ տարեց մի տղամարդ:

Դեղատան աշխատակիցներն էլ մեկ այլ հարց բարձրացրեցին, հաճախ մեր համաքաղաքացիները,  ովքեր կանոնավոր դեղորայք են ընդունում սոցիալական խնդիրների պատճառով դեղերը գնում են 2-3 օրվա համար, իսկ դեղատոմսը գրվում է ամբողջ տուփի համար, եթե քաղաքացին գումար չունի ինչպես են պարտադրելու ամբողջ տուփը գնել կամ ինչպես են իրենք հրաժարվելու հատով  դեղորայք վաճառելուց:

«Մարդը սրտի վիրահատություն է տարել և բժշկի նշանակմամբ Կոպլավիքս է խմում, որն արժի 9000 դրամ և գումար չունենալու պատճառով ամբողջությամբ չի կարողանում տուփը գնել, ինչպես այդ մարդու դեղը չվաճառել հատիկով  և ուղարկել դեղատոմսի հետևից »,-նշեց դեղատան աշխատակցուհին:

Ինչ վերաբերում է հոգեմետ դեղերին, և այն դեղերին որոնք նոր են ընդգրկվել այդ շարքում, ապա դեղատան աշխատակիցները միանշանակ կողմ են,  որ դրանք բաց թողնվեն միմիայն դեղատոմսով, նույնիկ առաջարկեցին «Դիմեդրոլը»  մտցնել այդ դեղերի ցանկում։ Պարզվում է՝ երիտասարդների շրջանում այդ դեղի պահանջը շատ է՝ մտահոգվելու պատճառներ կան այս առումով, իսկ մյուս դեղերը դեղատոմսով դարձնելու կարիքը կարծում են չկա:

Մեր համաքաղաքացիների շրջանում հաճախ գնվող դեղերի ցանկում են ցավազրկողներից, Իբուպրոֆենի խումբը, Միգը, Նուրոֆենը, Անալգինը, Տեմպալգինը,  և անտիբիոտիկները,  որոնք գնում ենք վիրուսային հիվանդությունների ժամանակ:

Աղբյուր` Փաստինֆո