Փաստ ինֆո

ՀՀ գլխավոր դատախազության հատկապես կարևոր գործերով քննության վարչության պետի տեղակալ Կարեն Բիշարյանը պարզաբանեց, թե ինչի համար է 2014թ. որոշում կայացվել 2008թ. մարտի 1-ի իրադարձությունների ընթացքում արձանագրված մահվան յուրաքանչյուր դեպքով առանձին քրեական գործ հարուցելու վերաբերյալ:

Ազգային ժողովում մարտի 1-ի իրադարձությունների վերաբերյալ խորհրդարանական լսումների ընթացքում, պատասխանելով ՀՀԿ խմբակցության պատգամավոր Շուշան Սարդարյանի հարցին, Կարեն Բիշարյանն ընդգծեց, որ 2014թ. հսկող դատախազի կողմից ցուցում է տրվել անջատել քրեական գործերը, մահվան յուրաքանչյուր դեպքով առանձին գործ հարուցել, ինչի անհրաժեշտությունը պայմանավորված էր նրանով, որ իրականացվի առավելագույնս արդյունավետ քննություն, ինչպես նաև արդյունավետ դատախազական հսկողություն:

«Թե ինչու հենց այդ ժամանակահատվածում նման որոշում կայացվեց, որևէ փաստի հետ կապված չէ: Մենք այդ փուլում ունեինք հսկայական ծավալի քրեական գործ՝ 370 հատորն անցնող, իրավական խնդիրներ ունեինք կապված նրա հետ, որ համատեղ քննչական խմբեր էին իրականացնում, սակայն օրենքը հնարավորություն չէր տալիս միանգամից մի քանի դատախազների կողﬕց հսկողություն իրականացնել: Դրա համար նման որոշում կայացվեց, որպեսզի նաև արդյունավետ դատախազական վերահսկողություն իրականացվի»,- «Արմենպրես»-ի փոխանցմամբ՝ նշեց Բիշարյանը:

Նա հավելեց, որ մահվան յուրաքանչյուր դեպքով առանձին քրեական գործ հարուցելու որոշումը պայմանավորված էր նրանով, որպեսզի յուրաքանչյուր դեպքով արդյունավետ քննություն իրականացվի:

Աղբյուր` Փաստինֆո