Փաստ ինֆո

«Անելիք» բանկի իրավաբանական վարչության պետ Հովհաննես Աթանյանի սպանության գործով այսօրվա դատական նիստում անցկացվեց գործի իրեղեն ապացույցների հետազոտումը: 

Գործով ամբաստանյալ Մկրտիչ Պողոսյանի պաշտպան Ալեքսանդր Սիրունյանը հայտարարեց, որ ըստ տուժողի հագուստների առգրավման արձանագրության, գործողությանը ներկա է գտնվել ընթերակա Արսեն Դավոյանը, մինչդեռ այդպիսի անուն-ազգանունով մարդ ՀՀ-ում գոյություն չունի:

Ըստ պաշտպանի, ընթերակայի հետ կապված իր փաստաբանական հարցմանն Անձնագրային և վիզաների վարչությունից պատասխանել են, որ ընտրողների ցուցակում չկա նման քաղաքացի: Ա.Սիրունյանն ընդգծեց, որ ընթերակա կարող է լինել միայն Հայաստանի Հանրապետության չափահաս քաղաքացի:

Ըստ պաշտպանի, նույնպիսի խնդիր կա նաև զենքի առգրավման գործողության հետ. էլի կա գոյություն չունեցող ընթերակա:

Այսօրվա դատական նիստում չհաջողվեց հետազոտել դեպքի վայրի մերձակա տեսահսկող սարքերի տեսագրությունները՝ տեխնիկական պատճառներով: Այն կհետազոտվի տեխնիկական խնդրի լուծումից հետո:

Հիշեցնենք, որ 2015թ. նոյեմբերի 24-ին` ժամը 20:40-ի սահմաններում, Վարդանանց փողոցում որսորդական հրացանից արձակված կրակոցով սպանվել էր «Անելիք» բանկի իրավաբանական վարչության պետ Հովհաննես Աթանյանը， ում հայրը երկար տարիներ աշխատել է որպես դատավոր։

Սպանությունը կատարելու մեջ մեղադրվում է տաքսու վարորդ Մկրտիչ Պողոսյանը, ով բանկի հետ ունեցել է գույքային վեճ, ինչի կապակցությամբ նախկինում մի քանի անգամ հանդիպել է բանկի իրավաբանական վարչության պետին: Վերջին հանդիպումը տեղի է ունեցել դեպքի օրը՝ բանկում, որից ժամեր անց տեղի է ունեցել սպանությունը։

Աղբյուր` Փաստինֆո