Փաստ ինֆո

ՀՀ Վերաքննիչ քրեական դատարանը, նախագահությամբ դատավոր՝ Մ.Պետրոսյանի, դատավորներ՝ Մ.Պապոյանի և Ս.Համբարձումյանի, բավարարել է փաստաբան Ռաֆայել Ամիրխանյանի կողմի ներկայացված վերաքննիչ բողոքները՝ կայացնելով արդարացի, օբյեկտիվ և մարդասիրական որոշում:

Այդ մասին իր ֆեյսբուքյան էջում գրառել է փաստաբան Ռաֆայել Ամիրխանյանը:

Գրառման մեջ նաև ասվում է, որ Վերաքննիչ դատարանը բեկանել և փոփոխել ՀՀ Սյունիքի մարզի ընդհանուր իրավասության դատարանի՝ 31.03.2017թ. դատավճիռը և Պավել Վարդիկյանի նկատմամբ ՀՀ քրեական օրենսգրքի 359-րդ հոդվածի 2-րդ մասի 1-ին և 2-րդ կետերով (Զինծառայողների փոխհարաբերությունների կանոնագրքային կանոնները խախտելը նրանց միջև ստորադասության հարաբերությունների բացակայության դեպքում) նախատեսված հանցավոր արարքի կատարման համար 1 տարի 5 ամիս 27 օր ժամկետով ազատազրկման ձևով նշանակված պատիժը պայմանականորեն չի կիրառել՝ սահմանելով փորձաշրջան՝ 2 տարի ժամկետով:

«Պետք է նշեմ, որ չնայած վերաքննիչ բողոքս բավարարվեց մասնակի, Վերաքննիչ դատարանը չբավարարեց պաշտպանյալիս մեղսագրվող` ՀՀ քրեական օրենսգրքի 359-րդ հոդվածի 2-րդ մասի 2-րդ կետով նախատեսված հանցավոր արարքը վերաորակելու պահանջը, սակայն, այնուամենայնիվ, փոփոխելով ազատազրկման ձևով նրա նկատմամբ սահմանված պատիժը և այն պայմանականորեն չկիրառելով՝ կայացրեց որոշում, որը համաչափ է պաշտպանյալիս անձը բնութագրող տվյալներին, ինչպես նաև՝ պատասխանատվությունը և պատիժը մեղմացնող հանգամանքներին:

Ցանկանում եմ հատուկ շնորհակալություն հայտնել դատավորներ՝ Մ.Պետրոսյանին Մ.Պապոյանին և Ս.Համբարձումյանին արդարացի որոշում կայացնելու համար»,- ասվում է գրառման մեջ:

Աղբյուր` Փաստինֆո