Փաստ ինֆո

Ապստամբների հսկողության ներքո գտնվող Դամասկոսի արվարձանում՝ Արևելյան Գուտայում, մի քանի օրվա ավիահարվածների ընթացքում զոհվել է 70-ից ոչ պակաս մարդ: Ըստ BBC-ի ռուսական ծառայության, հաղորդում են սիրիացի ակտիվիստները:

Ռուսաստանյան զինվորականները հաստատել են, որ Արևելյան Գուտայում սրվել է իրադրությունը, սակայն զոհվածների թիվ չեն նշել:

Մարդու իրավունքների պահպանության նկատմամբ մոնիթորինգի սիրիական կենտրոնի (որը տեղաբաշխված է Լոնդոնում) տվյալներով, գնդակոծությունների հետևանքով զոհվել է առնվազն 77 մարդ, որոնցից 20-ը երեխաներ են:

Այդ տվյալների հաստատում այլ աղբյուրներից առայժմ չկա: Սիրիական իշխանությունները, որոնք պնդում են, որ հարվածում են միայն արվարձանում գործող գրոհայինների նպատակակետերին, մեղադրում են վերջիններիս Դամասկոսի գնդակոծության համար:

Սիրիական պետական գործակալությունը՝ SANA-ն, հաղորդել է Դամասկոսի գնդակոծության հետևանքով մեկ զոհի մասին: Որոշ տվյալներով, սիրական կառավարական զորքերը մտադիր են ցամաքում շարունակել Արևելյան Գուտայի վրա գրոհը:

Ռուսաստանյան ԱԳՆ ղեկավար Սերգեյ Լավրովը կրկնել է սիրիական իշխանությունների պաշտոնական վարկածը, երկուշաբթի օրն ասելով, որ սիրիական գնդակոծությունների նպատակակետը «Ջեբհաթ ան-Նուսրա» ռադիկալ խմբավորման գրոհայիններն են:

««Ջեբհաթ ան-Նուսրայի» գրոհայինները չեն դադարեցնում սադրանքները: Մասնավորապես, Արևելյան Գուտայից գնդակոծվում են Դամասկոսի բնակելի թաղամասերը՝ ներառյալ ռուսաստանյան դեսպանությունն ու առևտրական ներկայացուցչությունը: Մեր արևմտյան գործընկերները չգիտես ինչու նախընտրում են աղմուկ բարձրացնել հենց այս երկու շրջանների՝ Իդլիբի ու Արևելյան Գուտայի, շուրջ, ուղղակի չնշելով այնտեղ տեղի ունեցողի պատճառների մասին: Իսկ պատճառը «Ջեբհաթ ան-Նուսրայի» զինված սադրանքներն են»,- ասել է Լավրովը:

Աղբյուր` Փաստինֆո