Փաստ ինֆո

Մարմնամարզիկ Ժորա Սմբատյանը չի կարողանա մասնակցել Բաքվի մրցաշարին, որը կկայանա մայիսին և համարվում է Բուենոս Այրեսի Օլիմպիական խաղերի միակ վարկանիշային մրցաշարը:

ՀՀ մարմնամարզության հավաքականի գլխավոր մարզիչ Հակոբ Սերոբյանն Armsport.am-ի հետ զրույցում պատմել է, որ ֆեդերացիան մտադիր է պայքարել պատանեկան Օլիմպիական խաղերի մասնակցության «սպիտակ քարտ» ստանալու համար:

Այդ նպատակով ֆեդերացիան նամակ կուղարկի ՀԱՕԿ-ին, որն էլ իր հերթին պետք է դիմի ՄՕԿ-ին.

«Շաբաթ օրը մեր ֆեդերացիան նիստ գումարեց և որոշեցինք, որ անպայաման պետք է դիմենք Օլիմպիական խաղերի մասնակցության «սպիտակ քարտ» ստանալու համար:

Առաջին անգամ ենք նման հարցով դիմելու, չեմ կարող ասել, թե ինչ կլինի: Գրության մեջ նշելու ենք, որ օգոստոսին կայանալիք Եվրոպայի առաջնության ժամանակ մենք ցույց կտանք, որ Ժորա Սմբատյանն ունի բոլոր որակներն օլիմպիական վարկանիշ ձեռք բերելու համար, պարզապես Բաքվի մրցաշարը վարկանիշային միակ մրցաշարն է լինելու, ու մենք չենք կարողանա դրան մասնակցել հասկանալի պատճառներով:

Կներկայացնենք իրավիճակը. եթե ստացվի, ակնկալում ենք Միջազգային օլիմպիական կոմիտեի պատասխանը ստանալ մինչև օգոստոս:

Հաշվի առնելով Ժորայի որակները` կարող եմ ասել, որ եթե մեկ այլ երկրում անցկացվեր մրցաշարը, 90 տոկոսով մեր մարզիկը վարկանիշ ձեռք կբերեր: Ընդհանուր առմամբ հատկացվում է 16 տեղ, յուրաքանչյուր երկրին մեկ տեղ: Ես վստահ եմ, որ տասնյակի մեջ կլինեինք»,- մեզ հետ զրույցում նշեց Հակոբ Սերոբյանը:

Հիշեցնենք` Բուենոս Այրեսի պատանեկան Օլիմպիական խաղերը կկայանան հոկտեմբերի 6-18-ը:

Նարե Հովհաննիսյան

Աղբյուր` Փաստինֆո