Փաստ ինֆո

Գեղարքունիքի մարզի ընդհանուր իրավասության դատարանի դատավոր Ավագ Գաբրիելյանի «Պորշ Կայեն» մակնիշի ավտոմեքենայից գողության դեպքով «Փաստինֆո»-ին նոր տեղեկություններ է հայտնի դարձել: 

Պարզվում է, որ Գաբրիելյանի «Պորշ Կայեն»-ից առաջին անգամը չէ որ գողություն է կատարվում, իսկ թե ինչու դատավորին չի մտահոգում այս հանգամանքը և միջոցներ չի ձեռնարկում, թերևս փոքր ինչ անհասկանալի է:

Հայտնի է նաև, որ «Պորշ Կայեն»-ից գողությունները կատարվել են Կենտրոն վարչական շրջանում՝ դատավորի բնակության վայրի շենքի բակից: Առնվազն տարակուսելի է, որ նման թանկարժեք ավտոմեքենա ունեցող դատավորը, ով մի քանի անգամ հանցագործների թիրախում է հայտնվել, այս ընթացքում ավտոտնակ ձեռք բերելու ուղղությամբ միջոցներ չի ձեռնարկել կամ գոնե տեսախցիկներ չի տեղադրել տարածքում, ինչը հնարավորություն կտար կանխելու իր մեքենայից գողության հերթական դեպքը կամ հանցագործությունները կատարած անձի կամ անձանց ինքնությունը պարզելու հարցում լույս կսփռեր շատ հանգամանքների վրա:

Դատավորի ավտոմեքենայի լուսարձակի գողության, այսպես կոչված, 2 դեպքով մեղադրվում է Արթուր Հարությունյանը, ով 1 տարի 10-ը ամիս է կալանքի տակ է:

Արթուր Հարությունյանի պաշտպան Արսեն Մկրտչյանը «Փաստինֆո»-ի թղթակցի հետ զրույցում նշեց, որ իր պաշտպանյալը չի ընդունել առաջադրված մեղադրանքը և հայտարարել է, որ որևէ կապ չունի այդ գողությունների հետ, ավելին՝ իր պաշտպանյալը շուտով 2 տարի կլինի՝ կալանքի տակ է, իսկ դատավորի ավտոմեքենայից գողության դեպքերը շարունակվում են:

Նշենք, որ Արթուր Հարությունյանի վերաբերյալ քրեական գործը մուտք է եղել Կենտրոն և Նորք-Մարաշ վարչական շրջանների դատարան դեռևս 2017թ. մարտին: Նույն քրեական գործով ամբաստանվում է նաև Ժորա Սարգսյանը: Ի տարբերություն Հարությունյանի՝ նրա նկատմամբ ի սկզբանե խափանման միջոց է ընտրված եղել չհեռանալու մասին ստորագրությունը:

Պաշտպան Արսեն Մկրտչյանի խոսքով՝ իր պաշտպանյալին նախաքննության ընթացքում 45 դրվագով մեղադրանք է առաջադրվել, սակայն գործը դատարան է մտել 12 դրվագով՝ ՀՀ քրեական օրենսգրքի 177-րդ հոդվածի 2-րդ մասի 1-ին և 2-րդ կետերով, 38-34-177 –րդ հոդվածի 2-րդ մասի 1-ին և 2-րդ կետերով և 38-177-րդ հոդվածի 1-ին մասով:

Ըստ Մկրտչյանի՝ Ժորա Սարգսյանը հայտարարել է, որ դատավորի ավտոմեքենայից գողություններն ինքն է կատարել, իսկ ոստիկանությունում Հարությունյանի անունն է տվել, որպեսզի ինքն ազատության մեջ մնա: Այդպես էլ եղել է՝ նա ազատության մեջ է եղել, և այս ընթացքում այլ գործերով հասցրել է 2 անգամ դատապարտվել:

Արթուր Հարությունյանի պաշտպանը նշում է, որ ինչ է թե ենթադրյալ հանցագործությունը կատարվել է դատավորի ավտոմեքենայից, իր պաշտպանյալի նկատմամբ ընտրված խափանման միջոց կալանավորումը չի փոխվում, մերժվում են նաև գրավի միջնորդությունները այն դեպքում, երբ Գլխավոր դատախազին ուղղված ՀՀ Նախագահի խոսքում ասվում էր, որ կալանքները պետք է հիմնավորված լինեն: Բացի այս, օրենսդրական փոփոխություններ են եղել կալանավորման հիմքերի վերաբերյալ, որն ուժի մեջ է մտել փետրվարի 10-ին, սակայն նման պայմաններում ոչ մեծ ծանրության հանցագործություն գործած անձը մնում է կալանքի տակ՝ ենթադրյալ տուժողի՝ դատավոր լինելու պատճառով:

Հիշեցնենք, որ փետրվարի 6-ին՝ ժամը 20.00-ից մինչև փետրվարի 7-ի ժամը 08.00-ն ընկած ժամանակահատվածում գողացել էին դատավորի՝ շենքի բակում կայանված «Պորշ Կայեն» մակնիշի ավտոմեքենայի լուսարձակը:

Դատավորի ավտոմեքենայից հերթական գողության դեպքի մասին լրատվամիջոցները գերեցին նաև այսօր: Դատավոր Գաբրիելյանը կրկին ահազանգել է, թե փետրվարի 17-ի ուշ երեկոյից մինչև 18-ը առավոտը՝ գողացել են իր ավտոմեքենայի լուսարձակը:

Աղբյուր` Փաստինֆո