Փաստ ինֆո

Ղարաբաղի խնդիրը կարող է լուծվել միայն ու միայն այն պարագայում, եթե Ադրբեջանի ղեկավարությունը սթափվի և հրաժարվի իր անիրատեսական սպասելիքներից, բանակցությունների արդյունքի վերաբերյալ ակնկալիքներից: Մյունխենում հայտարարել է ՀՀ նախագահը՝ արձագանքելով Գերմանիայում Ադրբեջանի դեսպանության առաջին քարտուղարի հարցին։ 

«Ղարաբաղի խնդիրը կարող է լուծվել միայն ու միայն այն պարագայում, եթե ձեր երկրի ղեկավարությունը սթափվի  և հրաժարվի իր անիրատեսական սպասելիքներից, բանակցությունների արդյունքի վերաբերյալ ակնկալիքներից: Դուք ուզում եք ազատ ապրել, Դուք ուզում եք ապրել Ղարաբաղում: Հավատացեք, որ ղարաբաղցիներն էլ են ուզում ազատ ապրել և ուզում են, որպեսզի իրենք ապրեն իրենց պատմական հողի վրա, որտեղ ունեն հազարամյակների խորքից եղած ժառանգություն, և իրենք չեն ուզում, որ դուք ոչնչացնեք այդ ժառանգությունը»,- ասել է երկրի ղեկավարը:

Նախագահը հիշեցրել է, որ ղարաբաղցիները ընդամենը քաղաքակիրթ ձևով անցկացրել են հանրաքվե, դիմել  Սովետական միության Գերագույն խորհրդին. դա էր պահանջում Սովետական միության գործող օրենքը, որպեսզի Լեռնային Ղարաբաղի ինքնավար մարզը Ադրբեջանի կազմից տեղափոխվի Հայաստանի կազմ: Փոխարենը` Ադրբեջանի այն ժամանակվա իշխանությունները փորձեցին զենքով խեղդել ղարաբաղցիների այդ օրինական պահանջն ու ցանկությունը: «Իմիջիայլոց, պետք է ասեմ, որ այդ ժամանակ բոլոր եվրոպական կառույցները շատ դրական մոտեցում ցուցաբերեցին և ասացին՝ այո՛, Լեռնային Ղարաբաղը պետք է ինքորոշվի: Բայց պատերազմում փլավ չեն բաժանում, ցավոք սրտի: Ես ատում եմ պատերազմը: Սակայն այնպես ստացվեց, որ մենք մեզ պաշտպանելու համար ստիպված էինք ստեղծել անվտանգության գոտի»,- ընդգծել է ՀՀ նախագահ Սերժ Սարգսյանը եւ վստահեցրել, որ հայկական կողմը պատրաստ է Լեռնային Ղարաբաղի հարցի խաղաղ կարգավորմանը, եթե Ադրբեջանի ղեկավարությունը ցուցաբերի ողջախոհություն և իրականում նստի բանակցային սեղանի շուրջ ու հասկանա, որ այս խնդիրը կարող է լուծվել միայն ու միայն փոխզիջումների հիման վրա:

Նախագահ Սարգսյանն անդրադարձել է նաեւ Ալեւի՝ Երեւանի վերաբերյալ վերջերս հնչեցրած հայտարարությանը եւ նշել «ձեր երկրի նախագահը տարածքային նկրտումներ է հանդես բերում Երևանի նկատմամբ, որի հիմնադրման 2800-ամյակը մենք նշելու ենք հոկտեմբեր ամսին, ինչպե՞ս կարող է Ղարաբաղի խնդիրը լուծվել:  Երևանը ունի 2800 տարվա պատմություն, հայ ժողովուրդը առնվազն 5000 տարի ապրում է իր պատմական տարածքներում, և Ադրբեջանը կամ այլ ժողովուրդներ, ովքեր, Աստված գիտի, երբ են սկսել իրենք իրենց ինքնաճանաչել, չեն կարող կոտրել հայ ժողովրդի կամքը»:

ՀՀ նախագահը Մյունխենում մասնակցել է Անվտանգության համաժողովին

Աղբյուր` Փաստինֆո