Փաստ ինֆո

Լույս է տեսել արձակագիր Մուշեղ Բաբայանի երկրորդ գիրքը՝ «Հորիզոնին չհասած» պատմվածքների ժողովածուն:

Բաբայանական ոճին հատուկ՝ պատմվածքների առանցքում հայ մարդու կյանքն է, հասարակ գյուղացուց մինչև բարձր պաշտոնյա, հայրենիքը ցավով թողած հայի և հայրենիքում նրա կարոտից տանջվող մարդկանց պատմությունը, ծանր կյանքից չարացած մարդկանց փոխարաբերություններն էլ ներկայացված են հումորային ներբերանգներով:

«Փաստինֆո»-ի թղթակցի հետ զրույցում արձակագիրը նշեց, որ «Հորիզոնին չհասած» պատմվածքների ժողովածուն օրգանապես կապված է իր առաջին՝ «Ծխացող կարոտ» գրքի հետ: Այս պատմվածքներում ևս իր ընթերցողը կբացահայտի մարդկային բնավորության կարևոր հատկանիշները՝ հայրենասիրություն, նվիրվածություն, պատասխանատվություն, ընկերասիրություն, կարոտ, հողի կանչ, նաև բացասական գծեր՝ նենգություն, փողի մոլուցք, վրեժխնդրություն, դավաճանություն:

Հեղինակը նշում է՝ պատմվածքների հիմքում կարևորվում է «Աշխարհի բոլոր ճամփաներից ամենալավը՝ տուն տանող ճանապարհի» գաղափարը:

Գրքի գլխավոր պատմվածքը «Հորիզոնին չհասածն» է, որն էլ հետագայում հեղինակի կողմից ընտրվել է որպես գրքի անվանում: Սեփական ուժերով մասնագիտական և աշխատանքային լուրջ հաջողությունների հասած հեղինակավոր քննիչի մասին է պատմվածքը, ով հանիրավի մեղադրվելով կաշառակերության մեջ որոշում է հեռանալ կյանքից, սակայն մինչ այդ որդուն ուղղված նամակով փոխանցում է այն կարևոր ուղենիշերը, որոնք պետք է ամեն տեսակի հարստության փոխարեն ավելի կայուն և ապահով դարձնեն նրա կյանք:

Ինքնասպանությունից առաջ գրված նամակում քննիչը խորհուրդ է տալիս խաղաղվել. «Գիշերը, երբ մենակ մնաք, անպայման նայե՛ք ձեր մեջ, խո՛րը նայեք… հետ բերեք երեխային, մանուկին, պատանուն, ճամփորդին, անհաշտին: Խոսե՛ք հետը, կրկին ընկերացե՛ք, նրանից վերցրեք տարիների հետ ձեր կորցրածը, ժպտացե՛ք իրար: Հետո զանգահարեք ձեր ծնողներին, շնորհակալություն հայտնեք, որ կաք, խոստացե՛ք՝ ձեր զավակներին պատմել ձեր մեջի երեխայի, մանուկի, պատանու, ճամփորդի, անհաշտի մասին: Դրանից հետո խաղաղվեք…, սերն ատելությունից հզոր է, խաղաղվե՛ք»: Դե իսկ հայոց բանակի քաջարի մարտիկների հերոսությունները, ապրումները, հայրենասիրությունն ու կարոտն իր ողջ դրսևորումներով ամփոփվում է «Հաղթելուն դատապարտվածները» պատմվածքում:

«Հորիզոնին չհասած» գրքում ընդգրկվել է 6 պատմվածք՝ որոնք թեպետ կարևորվող, գնահատվող արժեհամակարգով նույնական են, բարու և չարի հավերժական պայքարը կոնկրետացված է հայ մարդու կենցաղում, սակայն սյուժետային կառուցվածքով խիստ տարբեր՝ զգայական պատմությունների կողքին կան կայծակնային արագությամբ զարգացող սյուժետային կտրուկ փոփոխություններով ընթերցողին շնչակտուր սպասման մեջ պահող պատմվածքներ:

Ի դեպ՝ փետրվարի 24-ին՝ ժամը 14-ին, Երևանի «Զեյթուն մշակութային կենտրոնում» տեղի կունենա գրքի շնորհանդեսը, իսկ գիրքն արդեն կարելի է գտնել գրախանութներում:

Աղբյուր` Փաստինֆո