Փաստ ինֆո

Պետական մեղադրողը դատարանին խնդրել է շորթումների գործով Շաքրո Մոլոդոյ մականվամբ «օրենքով գող» Զախարի Կալաշովին դատապարտել 10-ը տարվա ազատազրկման խիստ ռեժիմի գաղութում: Այդ մասին հաղորդում է ՌԻԱ Նովոստիի թղթակիցը Մոսկվայի Նիկուլինսկի դատարանի դահլիճից:

Դատախազը նաև պահանջել է Շաքրոյի նկատմամբ նշանակել տուգանք 700 հազար ռուբլու չափով: Գործի մյուս ֆիգուրանտների համար մեղադրանքի կողմը խնդրել է ազատազրկում 7- 12 տարի ժամկետներով:

Կալաշովը հերքում է շորթումներ կազմակերպելու ու «օբշչակ» պահելու մեղադրանքը:

Երկու շորթումների վերաբերյալ միացյալ գործով անցնում է 14 մարդ: Երկուսը դատի ներքո են հայտնվել հետմահու, 11 մեղադրյալներ՝ ներառյալ Կալաշովն ու Անդրեյ Կոչույկովը (Իտալյանեց), 2016թ. ամռանից պահվում են քննչական մեկուսարանում:

Եվս մեկ ամբաստանյալ՝ Կոչույկովի մասնավոր պահնորդական ձեռնարկությունում աշխատած, ՆԳՆ նախկին աշխատակից, գնդապետ Եվգենի Սուրժիկովը գտնվում է տնային կալանքի տակ:

Ամբաստանյալները բաժանվում են երկու խմբի՝ շորթման երկու դրվագով: Դրանցից մեկով տուժողը Elements ռեստորանի տնօրեն Ժաննա Կիմն է, մյուսով՝ ձեռնարկատեր Լև Գարամովը: Քննության վարկածով, այդ գործով բոլոր մեղադրյալները գործել են Շաքրո Մոլոդոյի ղեկավարության ներքո:

Կալաշովը կալանավորվել էր հուլիսի 13-ին Elements ռեստորանի սեփականատիրոջից խոշոր գումարի շորթման գործով: 2015թ. դեկտեմբերին այդ հաստատության մոտ «ռազբորկաների» ժամանակ կողմերը փոխհրաձգություն էին սարքել, որի ընթացքում երկու մարդ էր սպանվել՝ հենց նրանք էին ավելի ուշ մտել այդ գործով մեղադրյալների ընդհանուր թվի մեջ:

Դատախազության տվյալներով, Կալաշովը գլխավորել է հանցավոր խումբը 2013թ. որպես Դեդ Հասան հայտնի «օրենքով գող» Ասլան Ուսոյանի զոհվելուց հետո: Շաքրո Մոլոդոյը ղեկավարում էր հանցավոր հանրույթը և համակարգում դրա մասնակիցների գործողությունները: Նաև, պետական մեղադրողի կարծիքով, Կալաշովը «օբշչակ» էր պահում, որտեղ հատկացումներ էին անում խմբավորման անդամները:

Կալաշովի ձերբակալության ժամանակ իրավապահ մարմինների աշխատակիցները զենք էին առգրավել:

Աղբյուր` Փաստինֆո