Փաստ ինֆո

ՀՀ Սյունիքի մարզի ընդհանուր իրավասության դատարանը՝ դատավոր Ն.Օհանյանի նախագահությամբ, ճանաչել և հռչակել է ամբաստանյալ Արամ Խաչատրյանի անմեղությունը ՀՀ քրեական օրենսգրքի 296-րդ հոդվածի 2-րդ մասի 3-րդ կետով՝ ծառերի ապօրինի հատումը՝ խոշոր վնաս պատճառելով, և նրան արդարացրել` արարքում հանցակազմի բացակայության հիմքով:

Արամ Խաչատրյանի նկատմամբ ընտրված չհեռանալու մասին ստորագրություն խափանման միջոցը վերացվել է:

ՀՀ Սյունիքի մարզի դատախազության ներկայացրած քաղաքացիական հայցը` Արամ Խաչատրյանից 418 500 ՀՀ դրամ հօգուտ պետական բյուջեի բռնագանձման պահանջի մասին, թողնվել է առանց քննության:

Դատարանը գտել է, որ գործով ձեռք բերված ապացույցներով չի հիմնավորվել նախաքննության մարմնի կողմից Արամ Խաչատրյանին ՀՀ քրեական օրենսգրքի 296 հոդվածի 2-րդ մասի 3-րդ կետով առաջադրված մեղադրանքը:

Արամ Խաչատրյանին մեղադրանք է առաջադրվել առ այն, որ նա՝ չունենալով ծառահատման թույլտվություն, իր անձնական օգտագործման բենզասղոցով 2017 թվականի մայիս ամսվա սկսզբից մինչև 2017 թվականի հուլիսի 22-ն ընկած ժամանակահատվածում Սյունիքի մարզի Սրաշեն և Ծավ համայնքների վարչական տարածքներում գտնվող և անտառային ֆոնդի մեջ չմտնող տարածքներում ապօրինի հատել է 8 տարբեր տրամագծերի բոխի, թխկի, հացենի տեսակի կենսունակ ծառեր` պատճառելով 418 500 ՀՀ դրամի խոշոր վնաս:

Դատաքննությամբ հաստատված փաստական հանգամանքների հիման վրա, դատարանն արձանագրել է, որ Արամ Խաչատրյանի կողմից ապօրինի հատված ծառերի հետևանքով պետությանը պատճառվել է 139 500 ՀՀ դրամ վնաս:

Դատարանը փաստել է, որ նախաքննության մարմինը Արամ Խաչատրյանին մեղադրանք առաջադրելիս նրա կողմից հատված 139 500 ՀՀ դրամ արժեքի ծառերի եռապատիկն ընդունելով որպես պատճառված խոշոր վնաս, թույլ է տվել նյութական նորմի կիրառման խախտում: Այսպես, «Բնապահպանական իրավախախտումների հետևանքով կենդանական և բուսական աշխարհին պատճառված վնասի հատուցման սակագների մասին» ՀՀ օրենքը կարգավորում է նշված իրավախախտումների հետևանքով պատճառված վնասի հատուցման իրավահարաբերությունները, ինչը որևէ իրավական հետևանք չի կարող ունենալ ՀՀ քրեական օրենսգրքի համապատասխան հոդվածում նախատեսված վնասի չափը հաշվարկելիս: Այլ կերպ ասած, տվյալ դեպքում որպես պատճառված վնաս պետք է հաշվարկվեր նշված ծառերի սակագինը` դրանց արժեքի միապատիկը:

Դատարանն արձանագրել է, որ Արամ Խաչատրյանը կատարել է 8 տարբեր տրամագծերի բոխի, թխկի, հացենի տեսակի կենսունակ ծառերի ապօրինի հատում, ինչի հետևանքով պատճառվել է 139 500 ՀՀ դրամ վնաս, որը ՀՀ քրեական օրենսգրքի 296 հոդվածի 4-րդ մասի համաձայն` զգալի վնաս չի համարվում: Դրա հիման վրա դատարանը հաստատված է համարել, որ Արամ Խաչատրյանի գործողություններում բացակայում է ՀՀ քրեական օրենսգրքի 296 հոդվածի 2-րդ մասի 3-րդ կետով նախատեսված հանցագործության հանցակազմի օբյեկտիվ կողմը, հետևաբար պետք է ճանաչել և հռչակել Արամ Խաչատրյանի անմեղությունը, նրա նկատմամբ կայացնել արդարացման դատավճիռ` ՀՀ քրեական դատավարության օրենսգրքի 35 հոդվածի 1-ին մասի 2-րդ կետով` արարքում հանցակազմի բացակայության հիմքով:

Մեղադրողն արդեն բողոք է ներկայացրել Վերաքննիչ դատարան: Նա միջնորդում է բեկանել Սյունիքի մարզի ընդհանուր իրավասության դատարանի արդարացման դատավճիռը, Արամ Խաչատրյանին մեղավոր ճանաչել ՀՀ քրեական օրենսգրքի 296-րդ հոդվածի 2-րդ մասի 3-րդ կետով նախատեսված հանցագործության կատարման մեջ և նշանակել համաչափ պատիժ:

Աղբյուր` Փաստինֆո