Փաստ ինֆո

Մարաշի զինված խմբի գործով այսօրվա դատական նիստում լուծվեց ամբաստանյալ Վաղինակ Ստեփանյանի պաշտպանի հարցը՝ Հանրային պաշտպանի գրասենյակի ղեկավարի որոշմամբ որպես նրա պաշտպան վերանշանակված փաստաբան Լյուդվիգ Ավետիսյանը ներգրավվեց գործում:

Պաշտպանը կիրականացնի նաև ամբաստանյալ Արթուր Եղիազարյանի պաշտպանությունը:

Դատարանը լուծում տվեց նաև ամբաստանյալների՝ մերձավոր հարազատների հետ տեսակցությունների խնդրին՝ այժմ տեսակցելու թույլտվություն ունեն երեքական մերձավոր ազգական, այսուհետ ամբաստանյալները հնարավորություն կունենան տեսակցել ավելի ընդլայնված՝ օրենքով նախատեսված մերձավոր ազգականների հետ:

Ամբաստանյալ Գառնիկ Մարգարյանի պաշտպան Հովիկ Արսենյանը նշեց, որ ժամանակին որպես իրավունքի սահմանափակման հիմքերից մեկը նշվում էր այն, որ գործից մաս է անջատված ու ընթանում է նախաքննություն: Մեղադրողը պատասխանեց, որ այդ հիմքը պահպանվում է, անջատված մասը նախաքննության փուլում է: Դատարանը բավարարեց պաշտպանական կողմից միջնորդությունները, համապատասխան գրություններ կուղարկվեն քրեակատարողական հիմնարկներին:

Դատարանում շարունակվեց գործի 12-րդ և 13-րդ հատորներում ներառված գրավոր ապացույցների հետազոտումը:

Դրանցից մեկում, մասնավորապես, արձանագրվել էր, որ ամբաստանյալ Արթուր Վարդանյանը վիճաբանության է բռնվել խցում՝ մեկ այլ կալանավորի հետ, վեճը կանխվել է ՔԿՀ աշխատակցի կողմից, դրա մասին նախապատրաստվել են նյութեր:

Ըստ ամբաստանյալ Գառնիկ Մարգարյանի տան խուզարկության արձանագրության, նա մինչև խուզարկություն սկսելը ներկայացրել է երկու որսորդական հրացան:

Գործով ամբաստանյալ, ՀՀ նախկին վարչապետ ու Պաշտպանության նախկին փոխնախարար Վահան Շիրխանյանի պաշտպան Հայկ Ալումյանը դատարանի ուշադրությունը հրավիրեց այն հանգամանքի վրա, որ Գ.Մարգարյանի տանը խուզարկություն կատարելու որոշումն, ըստ նյութերի, ընդունվել է հունվարի 13-ին, սակայն խուզարկվողին այն ներկայացվել է հունվարի 14-ի ամսաթվով:

Դատարանում հրապարակվեց նաև Հ-1 հեռուստաընկերության գրությունն առ այն, որ գործով երեք կին ամբաստանյալները մուտք են գործել հեռուստաընկերության տարածք «Երգ երգոց» հաղորդաշարի հաղորդմանը մասնակցելու նպատակով, նրանց ուղեկցել է ամբաստանյալ Տիգրան Բոյաջյանը: Ամբաստանյալ Նելլի Մինասյանը զանգահարել է հաղորդման ադմինիստրատորին, հայտնել հաղորդման նկարահանմանը մասնակցելու ցանկության մասին, նա էլ համապատասխան գրանցում է արել:

Պաշտպան Ինեսսա Պետրոսյանը հայտարարեց, որ Տիգրան Բոյաջյանն այնտեղ չի եղել, այդ հանգամանքը հետագայում պարզվել է: Տ.Բոյաջյանն իր հերթին նույնպես ասաց, որ ինքը հեռուստաընկերությունում չի եղել, մինչդեռ «առաջին խափանման միջոցը երկարացվել է այդ հիմքով»:

Ամբաստանյալ Արթուր Վարդանյանը հայտարարեց, որ Մարաշի տան խուզարկությունից հետո իրեն չեն վերադարձվել ամուսնական մատանին, ժամացույցը ու շորերը: Դատարանը նշեց, որ ապացույցների հետազոտումից հետո ինքը կարող է անդրադառնալ այդ հարցին:

Դատական նիստն հետաձգվեց՝ Վահան Շիրխանյանի համար շտապօգնություն հրավիրվեց, իսկ վերջերս մայրացած Նելլի Մինասյանը ուներ իր փոքրիկին կերակրելու խնդիր:

Հաջորդ դատական նիստին ապացույցների հետազոտումը կշարունակվի:

Լուսանկարը՝ Ֆոտոլուրի

Աղբյուր` Փաստինֆո