Փաստ ինֆո

ԼՂՀ պաշտպանության բանակի նախկին հրամանատար Սամվել Բաբայանի և մյուսների գործով այսօրվա դատական նիստում հարցաքննվեց Ռոբերտ Աղվանյանը, ով հայտարարեց՝ զենիթահրթիռային համալիրը Վրաստանից չի բերվել, դա եղել է Էջմիածնում գտնվող իր տանը, «եթե «Իգլան» Վրաստանից բերեր, ինքն այսօր ՀՀ վերաքննիչ դատարանում կանգնած չէր լինի»:

Հիշեցնենք, որ Աղվանյանը հետախուզվում էր ՀՀ իրավապահների կողմից «Իգլա» տեսակի դյուրակիր զենիթահրթիռային համալիրի ռազմամթերք հանդիսացող հրթիռի մաքսանենգության և դրա ապօրինի շրջանառության համար և հայտնաբերվելով Վրաստանում՝ 2017թ. դեկտեմբերի 25-ին տեղափոխվել է Հայաստան:

Աղվանյանին դատարան հրավիրելու և հարցաքննելու միջնորդությամբ հանդես էր եկել Սամվել Բաբայանը, ով առաջին ատյանի դատարանում ողջ դատաքննության ընթացքում հայտարարում էր, որ ապացուցել է՝ «Իգլան» Վրաստանից չի տեղափոխվել Հայաստան:

Այսպիսով, Աղվանյանը ճանաչեց ամբաստանյալներից միայն Արմեն Պողոսյանին: Նրա խոսքով՝ Պետրոսյանն Էջմիածնում է բնակվել՝ ինչպես որ ինքը, սակայն մի քանի անգամ նրան հանդիպել է Վրաստանում:

Ըստ նրա՝ զենիթահրթիռային համալիրը հայտնաբերել է իր՝ Էջմիածնում գտնվող տանը՝ 2010թ., երբ տունը ցանկացել է վաճառել, այդ ժամանակ էլ հայտնաբերել է. «Հայրս պատերազմի ժամանակ մեծ օգնություն է ցուցաբերել, որի ժամանակ էլ «Իգլան» մնացել է մեր տանը»:

«Իգլայի» վաճառքին անդրադառնալով՝ նա նշեց, որ Վրաստանում պատահաբար հանդիպել է Հրաչյա Մայիլյանին, զրույցի ժամանակ էլ ասել է, որ «Իգլա» կա:

Մայիլյանն էլ ցանկացել է ձեռք բերել այն և հարցրել է, թե որտեղ է գտնվում, ինքն էլ ասել է՝ Վրաստանում և արժի 25 .000 դոլար:

Զենիթահրթիռային համալիրի համար Մայիլյանն իրեն վճարել է 4000 ԱՄՆ դոլար, իսկ մնացած գումարը խոստացել է վճարել հետագայում, սակայն գումարի մյուս մասն այդպես էլ իրեն չեն վճարել. Մայիլյանը զանգահարել է և հայտնել, որ հրաժարվել է «Իգլան» ձեռք բերելուց:

Նա նաև նշեց, որ զենիթահրթիռային համալիրի իրենց տանը եղել է 2 հատ, երկրորդն այս գործով նախաքննության ժամանակ, երբ հասկացել է, թե ինչ է տեղի ունենում ապրիլին նվիրաբերել է բանակին: Նա հստակ չնշեց 2016, թե 2017 թվականի ապրիլին:

Աղվանյանը նշեց որ ինքը որևէ մեկի դեմ ցուցմունք չի տվել, իր դեմ են ցուցմունք տվել, ինչից հետո հետախուզում են հայտարարել ու Վրաստանից բերել են Հայաստան, ինչ պատիժ էլ դատարանն իր նկատմամաբ սահմանի, ինքը պատրաստ է կրել, և որ իրողությունն է պատմում, ոչ ավել է ասում, ոչ՝ պակաս, ոչ մեկից էլ չի վախենում:

Նա նաև հայտնեց, որ իրեն ասել են, թե Հայաստանից դուրս պետք է տանեն զենքը, դրա համար է ինքը վաճառել մտածել է, որ «կարող էր քրդերին պետք գալ՝ թուրքերի հերն անիծելու համար»:

Մեղադրող Արամյանի հարցին, թե ինչ պայմաններում է Իգլան փոխանցել Մայիլյանին, Աղվանյանը պատասխանեց, որ իր տանից Հրաչյա Մայիլյանի ավտոմեքենայով «Իգլան» տեղափոխել են Մայիլյանի տուն, ինչից հետո ինքը գնացել է:

Նշենք նաև, որ Սամվել Բաբայանն էլ իր հերթին հայտարարեց, որ զենիթահրթիռային համալիրը Աղվանյանենց տանը ոչ թե 2010թ.-ից, այլ՝ 1992 թվականից:

Վերաքննիչ բողոքով դատաքննության ավարտ հայտարարվեց, և դատարանն անցավ դատական վիճաբանությունների փուլին:

Հաջորդ՝ փետրվարի 26-ին կայանալիք նիստում ճառով հանդես կգան կողմերը:

Աղբյուր` Փաստինֆո