Փաստ ինֆո

ԱՄՆ երկու կուսակցությունների շահերը ներկայացնող մի խումբ սենատորների հաջողվել է համաձայնության գալ միգրացիային առնչվող որոշ խնդիրների շուրջ, չորեքշաբթի հաղորդել է The Hill ամերիկյան թերթը:

«Ես կարծում եմ, որ մեր խումբը պայմանավորվել է մոտեցման շուրջ»,- մեջբերում է պարբերականը Մեն նահանգից հանրապետական սենատոր Սյուզան Քոլլինզի խոսքերը:

Իր հերթին Հարավային Կարոլինա նահանգից նրա գործընկեր Լինդսի Գրեմը հաղորդել է, որ սենատորների կողմից քննարկվող համաձայնությունը վերաբերվելու է երկու հարցի՝ անլեգալ միգրանտներին ու սահմանների անվտանգությանը:

Արիզոնա նահանգից հանրապետական սենատոր Ջեֆֆ Ֆլեյքն իր հերթին հայտարարել է, որ երկկուսակցական խմբի որոշումը կհրապարակվի չորեքշաբթի օրը:

Նշվում է, որ նախօրեին ԱՄՆ նախագահ Դոնալդ Թրամփը հայտարարել էր DACA (հետաձգված միջոցներ ներգաղթյալ երեխաների նկատմամբ) ծրագրի ապագայի հարցով սենատում դեբատներ սկսելու մասին: Ծրագիրը լուրջ տարաձայնություններ էր առաջացրել Հանրապետական ու Դեմոկրատական կուսակցությունների ներկայացուցիչների միջև:

«DACA-ի հարցով բանակցությունները սկսվել են: Հանրապետականները ցանկանում են գործարք կնքել, և դեմոկրատները հաստատում են, որ ցանկանում են այն կնքել: Հրաշալի կլիներ, որ մենք այդքան տարի անց լուծեինք DACA փազլը»,- գրել է Թրամփը իր թվիթերյան էջում:

Ըստ Ինտերֆաքսի, ավելի վաղ հաղորդվում էր, որ ամերիկյան սենատորները քննարկելու են ինչպես վաղ մանկության տարիներին ԱՄՆ անօրինական մուտք գործած ներգաղթյալների ապագան, այնպես էլ ավելի լայն սպեկտրի բարեփոխումները, որոնք կարող են փոխել ԱՄՆ միգրանտներ ընդունելու կարգը:

Աղբյուր` Փաստինֆո