Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի գործով այսօրվա նիստը ևս հետաձգվեց. Բարսեղյանն ի վիճակի չէր եղել դատարան ներկայանալու:

Դատարանը ներկաներին տեղեկացրեց, որ գրություն է ստացվել Բարսեղյանից, որ իրեն լավ չի զգում, և խնդրել էր նիստը հետաձգել 20-25 օրով, որպեսզի նշանակված բուժումը ստանալուց հետո կարողանա մասնակցել դատական նիստին:

«Դատապարտյալների հիվանդանոց» ՔԿՀ-ի պետի կողմից ևս գրություն էր ստացվել, որ Բարսեղյանը կարողանում է ինքնուրույն տեղաշարժվել և հոգալ իր կարիքները:

Գրությունների վերաբերյալ պաշտպանական կողմը դատարանին խնդրեց բավարարել Բարսեղյանի միջնորդությունը՝ 20-25 օրով նիստը հետաձգելու վերաբերյալ, որպեսզի հնարավորություն տրվի նրան բուժման կուրսն ստանալուց հետո ներկայանալ դատարան:

Հարցի վերաբերյալ դատախազ Կարեն Բիշարյանը նկատեց՝ դատարանում հետազոտված բժշկական տեղեկանքում հստակ պատասխան չկար, թե Բարսեղյանի բուժման կուրսը որքան տևողություն է նախատեսում:

Դատարանը որոշեց նիստը հետաձգել և գրությամբ պարզաբանում ստանալ ՔԿՀ-ից, քանի որ հստակ պատասխան չի տրվել, թե Բարսեղյանը ներկա պահին ի վիճակի՞ է մասնակցել նիստին, թե՝ ոչ, բացի այդ, դատարանը հարց կուղղի ՔԿՀ-ին՝ Բարսեղյանի բուժման ընթացքի վերաբերյալ:

Այսպիսով, դատական նիստը հետաձգվեց և նշանակվեց փետրվարի 22-ին:

Ըստ մեղադրանքի՝ 2016թ. հոկտեմբերի 27-ին` ժամը 19.35-ին Երևան քաղաքի Արշակունյաց պողոտայի և Գարեգին Նժդեհի փողոցի խաչմերուկի գետնանցումում դատավոր Իշխան Բարսեղյանը հանդիպել է քաղաքացուն և վերջինիցս անձամբ ստացել 1000 ԱՄՆ դոլարը:

Իսկ հոկտեմբերի 28-ին` ժամը 01.45-ին դատավոր Իշխան Բարսեղյանը ձերբակալվել է խոշոր չափերով կաշառք ստանալու կասկածանքով:

Այսպիսով, ԱԱԾ-ի կողմից օպերատիվ օպերատիվ-հետախուզական միջոցառման արդյունքում Հատուկ քննչական ծառայությունը հարուցել է քրեական գործ, որի շրջանակներում դատավոր Իշխան Բարսեղյանին մեղադրանք է առաջադրվելով ՀՀ քրեական օրենսգրքի 311-րդ հոդվածի 4-րդ մասի 3-րդ կետով:

Ելնելով դատավորի կարգավիճակից, որ նա կարող է որոշակի ազդեցություն ունենալ մինչդատական վարույթում գործի օբյեկտիվ քննության վրա նախաքննական մարմնի կողմից դատավորի նկատմամբ խափանման միջոց կալանավորումն ընտրելու վերաբերյալ միջնորդությունը բավարարվել է:

Քրեական գործով մեղադրանք է առաջադրվել նաև փաստաբան Էլզա Զաքարյանին՝ ՀՀ քրեական օրենսգրքի 313-րդ հոդվածի 1-ին մասով, և նրա նկատմամբ որպես խափանման միջոց կիրառվել՝ չհեռանալու մասին ստորագրությունը:

Լուսանկարը՝ Hetq.am-ի

Աղբյուր` Փաստինֆո