Փաստ ինֆո

«Ղ-Տելեկոմ» ՓԲԸ-ում առանձնապես խոշոր չափերի յուրացման գործով վեց տարվա ազատազրկման դատապարտված, Սյունիքի մարզում՝ Կապանում, «Ղ-Տելեկոմ» ՓԲԸ նախկին պատասխանատու Աշոտ Կույումջյանի պաշտպան Կարեն Մեժլումյանն այսօր վերաքննիչ բողոքում միջնորդեց իր պաշտպանյալին արդարացնել:

Պաշտպանը ներկայացրեց բողոքի հիմքերը, որոնցից առաջինի համաձայն, մեղադրական եզրակացությունը չի համապատասխանում օրենքով սահմանված իմպերատիվ պահանջին, մասնավորապես, մեղադրական եզրակացության եզրափակիչ մասում նշված չէ, թե Աշոտ Կույումջյանը Քրեական օրենսգրքի ո՛ր հոդվածով է մեղադրվում: Մինչդեռ, ըստ պաշտպանի, օրենքը հստակ ասում է, որ պետք է նման նշում լինի: Օրենսդրական այդ պահանջը նաև նրա համար է, որպեսզի անձն իմանա, թե ինչից է պաշտպանվում: Այդ մասին Վճռաբեկ դատարանի նախադեպային որոշումներ կան, վերջերս էլ Սահմանադրական դատարանն է որոշում կայացրել, որում նշվում է, որ այն պետք է համապատասխանի օրենքով նախատեսված պահանջներին:

«Մի խոսքով մենք ասում ենք՝ եթե չկա մեղադրական եզրակացություն, պարզապես գործը պետք է կարճվի, իսկ այն, ինչ որ ուղարկվել է դատարան, մեղադրական եզրակացություն չէ»,- «Փաստինֆո»-ի լրագրողի հետ զրույցում նշեց Կարեն Մեժլումյանը:

Վերաքննիչ բողոքի երկրորդ հիմքն առնչվում է քրեաիրավական որակմանը: Եթե, ենթադրենք, Աշոտ Կույումջյանը ստացել է այդ լիցքավորման քարտերը, ե՞րբ է համարվում յուրացումն ավարտված: Պաշտպանական կողմը նշեց, որ ըստ տեսության ու դատական պրակտիկայի, յուրացումն ավարտված է համարվում, երբ որ գույքն անցնում է անձի տնօրինության տակ, և անձն է որոշում ինչ անել: Կարեն Մեժլումյանն ընդգծեց, որ մեղադրողը Վերաքննիչ դատարանում ընդունել է, որ իրենք ընդհանրապես փաստեր չունեն, թե Աշոտ Կույումջյանը գումարը ստացել է, թե ոչ: Այսինքն՝ եթե փաստ չունեն, ինչպես են որոշակի գումարի յուրացման մեղադրանք առաջադրում:

«Եթե ենթադրաբար ընդունենք, որ յուրացում է, քանի որ մեղադրական եզրակացության մեջ չկար յուրացում, ապա սխալ քրեաիրավական որակում են տվել: Ավելին, մենք վերաքննիչ բողոքի հիմքում դրել ենք նաև այն, որ մեղադրողը մեղադրական եզրակացության մեջ չէր գրել, թե անձը որ հոդվածով է մեղադրվում, իսկ առաջին ատյանի դատարանում էլ իր ճառում նա միջնորդել էր մեղավոր ճանաչել խարդախության հոդվածով՝ Քրեական օրենսգրքի 178-րդ հոդվածի 3-րդ մասի 1-ին կետով»,- ասաց Կ.Մեժլումյանը:

Ըստ բողոքի մեկ այլ հիմքի, խախտվել է հրապարակային դատաքննության իրավունքը՝ գործով դատաքննությունն անց է կացվել դռնփակ՝ առևտրային գաղտնիքի հետ կապված: Կարեն Մեժլումյանը նշեց, որ առևտրային գաղտնիքի հետ կապված հիմք ոչ Մարդու իրավունքների եվրոպական կոնվենցիան (6-րդ հոդվածի՝ արդար դատաքննության իրավունք, 1-ին մասը) է նախատեսում, ոչ էլ ՀՀ սահմանադրությունը:

Պաշտպանի գնահատմամբ, ամենակարևորը հիմքերից այն է, որ կատարված խախտումներին զուգահեռ, սխալ են գնահատվել ապացույցները՝ չնայած նրան, որ առաջին ատյանի դատարանի դատավճռում նշվել են համարյա բոլոր, այդ թվում՝ արդարացնող ապացույցները:

Աշոտ Կոյումջյանը նախաքննությունից սկսած անընդհատ հայտարարում էր, որ եթե մի քարտ ակտիվանար և գումարը չմուտքագրվեր, վաճառք չձևակերպվեր, միանգամից իմանում էին ու հաջորդ օրը նամակ էին ստանում, որ քարտն ակտիվացել է, բայց չի մուտքագրվել, նախաքննության ժամանակ այդ հարցը որևէ մեկին չեն տվել: Իսկ դատարանում մի շարք անձինք հաստատել են Աշոտ Կույումջյանի նշած հանգամանքը: «Այսինքն՝ ասում եք 560 հազար քարտ է յուրացրել, ամեն մի քարտի ակտիվացման դեպքում, այդ նամակը կգար, և ընկերությունը չէր կարող չիմանալ, եթե այդպիսի բան լիներ, ուրեմն այդպիսի բան չի եղել»,- ասաց փաստաբանը:

Նշենք, որ բացի պաշտպանական կողմի այս բողոքից, վերաքննիչ բողոք է ներկայացրել նաև մեղադրողը՝ Սարգիս Արշակյանի մասով արդարացման դատավճռի դեմ՝ նա առաջին ատյանի դատարանի կողմից արդարացվել է ու անմեղ ճանաչվել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով՝ առանձնապես խոշոր չափերի յուրացմանն օժանդակելը, մեղադրանքում՝ մեղսագրված հանցանքի կատարմանը նրա մասնակցությունն ապացուցված չլինելու հիմքով:

Մեղադրողն իր վերաքննիչ բողոքում միջնորդում է բեկանել և փոփոխել առաջին ատյանի դատարանի դատավճիռը, Սարգիս Արշակյանին մեղավոր ճանաչել ՀՀ քրեական օրենսգրքի 38-179-րդ հոդվածի 3-րդ մասի 1-ին կետով և նրա նկատմամբ նշանակել համաչափ պատիժ:

Հաջորդ դատական նիստում մեղադրողի բողոքի վերաբերյալ իր դիրքորոշումը կներկայացնի արդարացվածի պաշտպան Սամվել Միրզոյանը:

Լուսանկարում՝ փաստաբան Կարեն Մեժլումյանն է

Աղբյուր` Փաստինֆո