Փաստ ինֆո

Առանձնապես խոշոր չափերով կաշառք ստանալու ինչպես նաև պաշտոնեական լիազորությունները չարաշահելու մեջ մեղադրվող Լոռու մարզի Քննչական վարչության նախկին պետ, կալանքի տակ գտնվող Թաթուլ Շուշանյանն իրեն առաջադրված մեղադրանքը չի ընդունում: Այդ մասին «Փաստինֆո»-ի թղթակցի հետ զրույցում հայտնեց նրա պաշտպան Կարեն Թումանյանը՝ հայտնելով նաև, որ Շուշանյանը հրաժարվել է ցուցմունք տալ:

Պաշտպանը վերաքննիչ դատարան է բողոքարկել առաջին ատյանի դատարանի որոշումը՝ Շուշանյանի նկատմամբ որպես խափանման միջոց կալանավորումն ընտրելու վերաբերյալ, սակայն դեռևս հայտնի չէ առաջին դատական նիստի օրը:

«Կաշառքի գումարի չափն էլ մեղադրանքում նշվում է 5000 ԱՄՆ դոլար»,- ասաց Կարեն Թումանյանը՝ հավելելով, որ այս պահին լրացուցիչ այլ տեղեկություններ չի կարող հայտնել:

Հիշեցնենք, որ Քննչական կոմիտեն հայտարարել էր, որ բազմակողմանի քննության արդյունքում տվյալներ են ստացվել առ այն, որ սպանությունը պատվիրելու մեջ մեղադրվող Վահագն Աբգարյանի և սպանությունը կատարելու մեջ մեղադրվող Վլադիմիր Դավթյանի օգտին ապօրինի գործողություններ կատարելու համար պետական հատուկ ծառայություն իրականացնող ՀՀ քննչական կոմիտեի պաշտոնատար անձանցից մեկն իր լիազորությունների շրջանակներում ստացել է առանձնապես խոշոր չափերի կաշառք, իսկ մի շարք այլ պաշտոնատար անձինք, շահադիտական և անձնական այլ շահագրգռվածությունից ելնելով, իրենց պաշտոնեական դիրքն օգտագործել են ծառայության շահերին հակառակ:

Նշված քրեական գործով բազմակողմանի քննության արդյունքում տվյալներ են ստացվել՝ ՔԿ առանձին ծառայողների կողմից այդ քրեական գործով թույլ տրված հնարավոր չարաշահումների վերաբերյալ, և դրանց հիման վրա քննչական կոմիտեում հարուցվել է քրեական գործ, որն ուղարկվել է ՀՔԾ:

Վահագն Աբգարյանից առանձնապես խոշոր չափերով կաշառք ստանալու և պաշտոնեական լիազորությունները չարաշահելու համար Թաթուլ Շուշանյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով և 308-րդ հոդվածի 1-ին մասով մեղադրանք է առաջադրվել և նա կալանավորվել է:

Այդ գործի շրջանակներում պաշտոնական լիազորությունները չարաշահելու մեղադրանքով կալանավորել է նաև Լոռու մարզային քննչական վարչության քննիչ:

Աղբյուր` Փաստինֆո