Փաստ ինֆո

Մերձմոսկովյան քննիչները բացահայտել են Պոդմոսկովիեի Օդինցովյան շրջանում «Օպլոտ» ուկրաինական ընդդիմադիր կուսակցության առաջնորդ Եվգենի Ժիլինին սպանած քիլլերին: Այդ մասին հաղորդում է «Ռոսբալտ»-ը:

Պարբերականի տվյալներով, հանցագործության կատարողը Ուկրաինայի քաղաքացի Նիկոլայ Դիդկովսկին է: «Անհերքելի ապացույցներ են ձեռք բերվել, նաև նրան ճանաչել է հարձակման ժամանակ տուժած, Ժիլինի ընկեր ու պահնորդ Անդրեյ Կոզարը»,- հայտնել է իրավապահ մարմիններում աղբյուրը:

Ըստ նրա, Կոզարին մի շարք քաղաքացիների լուսանկարներ են ներկայացվել, և նա վստահաբար մատնացույց է արել Դիդկովսկու պատկերը: Լուսանկարով նրան որպես քիլլեր ճանաչել են նաև «Վետերոկ» ռեստորանի աշխատակիցները, որտեղ տեղի է ունեցել հանցագործությունը, հակառակ այն բանին, որ մարդասպանը հարձակման ժամանակ ունեցել է արհեստական բեղեր, իսկ աչքերին գլխարկ է քաշած եղել:

Դեռ մինչև քննիչների ու օպերատիվ աշխատողների՝ նրա հետքի վրա դուրս գալը, Դիդկովսկին կարողացել է լքել Ռուսաստանի սահմանները: Նրան հեռակա ՌԴ քրեական օրենսգրքի մի քանի հոդվածով մեղադրանքներ են առաջադրվել, ներկայումս նրա նկատմամբ միջազգային հետախուզում է հայտարարվել:

Ժիլինը սպանվել է 2016թ. սեպտեմբերի 19-ի երեկոյան մերձմոսկովյան Գորկի-2 ավանի տարածքում գտնվող ռեստորանում, նրան ուղեկցած համախոհը ստացել է ծանր վնասվածքներ: Քննչական կոմիտեի վարկածով ակտիվիստին կարող էին սպանել կոմերցիոն գործունեության պատճառով, այլ տվյալներով, «Օպլոտ»-ի առաջնորդը կարող էր խոշոր գումար պարտք արած լինել:

Աղբյուր` Փաստինֆո