Փաստ ինֆո

Լոռու մարզի Քննչական ապարատում աղմկահարույց կալանավորման և ձերբակալման գործով Գլխավոր դատախազը վստահեցնում է՝ ամեն ինչ անելու են` բացահայտելու և դեպքին հնարավոր անձանց առնչությունը պարզելու ուղղությամբ:

Այսօր՝ լրագրողների հետ հանդիպման ժամանակ, ի պատասխան նշված դեպքին առնչվող հարցերին՝ ասաց ՀՀ գլխավոր դատախազ Արթուր Դավթյանը:

Փիրուզյանի սպանության գործով նախաքննությունն ավարտվել էր և մեղադրական եզրակացությունն ուղարկվել էր դատախազին, սակայն դատախազը չի հաստատել, խնդիրներ է տեսել գործի քննությունը, լրիվությունը, բազմակողմանիությունը ապահովվելու ուղղությամբ և ուղարկել է լրացուցիչ նախաքննության: Ինչից հետո քրեական գործը Լուռու մարզի քննչական վարչությունից ուղարկվել է Քննչական կոմիտե՝ նախաքննությունը ՀԿԳ վարչությունում իրականացնելու նպատակով:

Գլխավոր դատախազի խոսքով՝ այդ ժամանակ էլ նշված բացահայտումները կատարվեցին Քննչական կոմիտեի Հատկապես կարևորագույն գործերով քննության վարչությունում կատարված քննության արդյունքներում: Ապա հարուցվեց քրեական գործ, ինչի շրջանակներում երկու անձ ունի դատավարական կարգավիճակ. պաշտոնատար անձանցից մեկի նկատմամբ մեղադրանք է առաջադրվել և որպես խափանման միջոց է ընտրվել կալանավորումը, ևս մեկ պաշտոնատար անձ էլ ձերբակալված է:

Հարցին, թե, մամուլում շրջանառվող տեղեկությունների համաձայն, կալանավորված պաշտոնատար անձը՝ Լոռու մարզային քննչական վարչության պետ Թաթուլ Շուշանյանն է, Գլխավոր դատախազը անուն չտվեց, սակայն չհերքեց. «Ժամանակը կգա բոլորի անուններով կհրապարակենք, եթե պաշտոնապես իրավաչափ գնահատեինք, դատախազության հաղորդագրության մեջ կալանքի տակ գտնվող անձի անունը կնշվեր»:

Ապա նաև հարց հնչեց, թե Շուշանյանի աները ՀՔԾ-ում է ծառայում, կարո՞ղ է գործի քննությունը օբյեկտիվ ընթանալ՝ հաշվի առնելով այդ հանգամանքը: Ի պատասխան՝ Գլխավոր դատախազը վստահեցրեց, որ ՀՔԾ-ում, անկախ ցանկացած բարեկամական կապերից, իրականացվելու է լրիվ, օբյեկտիվ բազմակողմանի նախաքննություն:

Լուսանկարը՝ Ֆոտոլուրի

Աղբյուր` Փաստինֆո