Փաստ ինֆո

ՀՀ ՊՆ N զորամասի բուժկետի պետի կողմից կաշառք պահանջելու և տալու գործով կայացվել է դատական ակտ:
Դատարանը ՝ նախագահությամբ դատավոր Դավիթ Բալայանի, գործով անցնող 7 ամբաստանյալներից 6-ին արդարացրել է՝ հանցակազմի բացակայության հիմքով, մասնակի արդարացվել է նաև բուժկետի պետ, մայոր Ալինա Հովսեփյանը:

Ըստ մեղադրանքի՝ բուժկետի պետ, մայոր Ալինա Հովսեփյանը հանդիսանալով պաշտոնատար անձ, 2014թ. սեպտեմբերից մինչև 2015թ. ապրիլ ամիսներն ընկած ժամանակահատվածում, մի շարք դեպքերում պահանջել և անձամբ ստացել է տարբեր չափերի կաշառք:
Գևորգ Պողոսյանին մեղադրանք է առաջադրվել Ալինա Հովսեփյանին անձամբ 80.000 ՀՀ դրամ կաշառք տալու համար` վերջինիս լիազորությունների շրջանակում իր օգտին գործողություն կատարելու համար:

Նելսոն Պողոսյանին էլ մեղադրանք է առաջադրված այն բանի համար, որ օժանդակել է որդուն` Գևորգ Պողոսյանին՝ 80.000 ՀՀ դրամ կաշառք տալու հարցում:
Ըստ Գևորգ Ասատրյանին առաջադրած մեղադրանքի համաձայն՝ նա Ալինա Հովսեփյանին անձամբ 80.000 ՀՀ դրամ կաշառք է տվել` իր օգտին գործողություն կատարելու համար:
Վարդան Ասատրյանին մեղադրանք է առաջադրվել այն բանի համար, որ նա օժանդակել է որդուն` Գևորգ Ասատրյանին որպեսզի Ալինա Հովսեփյանին կաշառք տա:
Սերգեյ Մկրտչյանն էլ մեղադրվել է առաջադրվել մայոր Ալինա Հովսեփյանին անձամբ 80.000 ՀՀ դրամ կաշառք տալու մեջ՝ իր օգտին գործողություն կատարելու համար:
Ըստ Սմբատ Մկրտչյանին առաջադրված մեղադրանքի՝ նա էլ օժանդակել է իր որդու` Սերգեյ Մկրտչյանի կողմից Ալինա Հովսեփյանին կաշառք տալուն:

Մայոր Ալինա Հովսեփյանին մեղադրանք է առաջադրվել ՀՀ քրեական օրենսգրքի 311-րդ հոդվածի 1-ին մասով, Գևորգ Պողոսյանին, Գևորգ Ասատրյանին և Սերգեյ Մկրտչյանին՝ 312 –րդ հոդվածի 1-ին մասով, իսկ Նելսոն Պողոսյանին, Վարդան Ասատրյանին և Սմբատ Մկրտչյանին՝ 38-312-րդ հոդվածի 1-ին մասով:
Այսպիսով, դատարանը վճռել է՝ Ալինա Հովսեփյանին ՀՀ քրեական օրենսգրքի 311-րդ հոդվածի 1-ին մասով առաջադրված՝ 4 արարքների կատարման մեղադրանքում արդարացնել հանցակազմի բացակայության հիմքով: Մասնավորապես Հովսեփյանն արդարացվել է 2015թ. հունվարի 19-ից 21-ն ընկած ժամանակահատվածում Գուրգեն Բաբայանից 41 000 ՀՀ դրամ կաշառք ստանալու, մարտի 2-ին՝ Սերգեյ Մկրտչյանից 80 000 դրամ կաշառք ստանալու, 2015թ. մարտի 31-ին Գևորգ Պողոսյանից 80 000 դրամ կաշառք ստանալու և 2015թ. ապրիլի 13-ին Գևորգ Ասատրյանից 80 000 դրամ կաշառք ստանալու դրվագներով:

Միևնույն ժամանակ Ալինա Հովսեփյանը մեղավոր է ճանաչվել երկու դրվագներով՝ 2014թ. սեպտեմբերին Ալիտա Մանուշյանից 80 000 դրամ կաշառք ստանալու և 2014թ. հոկտեմբերին Հովհաննես Խաչատրյանից ևս 80 000 դրամ կաշառք ստանալու համար: Դատարանը նրա նկատմամբ վերջնական պատիժ է նշանակվել տուգանք 700 000 դրամի չափով, սակայն ՀՀ քրեական օրեսգրքի 69-րդ հոդվածի 5-րդ մասի համաձայն՝ նրա նկատմամաբ նշանակված պատիժը մեղմացվել է՝սահմանելով տուգանք 550 000 դրամի չափով:
Գործով մյուս ամբաստանյալները՝ Գևորգ Պողոսյանը, Գևորգ Ասատրյանը և Սերգեյ Մկրտչյանը, Նելսոն Պողոսյանը, Վարդան Ասատրյանը և Սմբատ Մկրտչյանը արդարացվել են հանցակազմի բացակայության հիմքով:

Աղբյուր` Փաստինֆո