Փաստ ինֆո

Հայաստանի Հանրապետության արդարադատության նախարարի առաջին տեղակալ Արթուր Հովհաննիսյանը դատական նիստերի ընթացքում փաստաբանների նկատմամբ կարգապահական տույժ կիրառելու մեջ վտանգ չի տեսնում. Փոխնախարարը նշում է, որ բարեխիղճ փաստաբանների համար դա խնդրահարույց չի լինի: Ազգային ժողովում լրագրողների հետ զրույցում նշեց, որ նորմալ է վերաբերվում փաստաբանների նկատմամբ դատական սանկցիա կիրառելուն:

«Դատական տուգանքը, կարծում եմ, կարող է արդյունավետ աշխատել դատական նիստի բնականոն գործընթացը ապահովելու համար։ Ավելի խիստ պատժամիջոցներ էին քննարկում, որոնց ես ինքս դեմ եմ եղել։ Երկրներ կան, որտեղ կալանք պատժամիջոցն է կիրառվում»,- «Արմենպրես»-ի հաղորդմամբ՝ նշեց նա։ Պաշտոնյան նկատեց, որ միայն փաստաբանների նկատմամբ չէ, որ սանկցիան կիրառվում է. այդպես է լինելու նաև դատախազների նկատմամբ։

Դիտարկմանը, թե դատախազներն ի պաշտոնե կաշկանդված են, բողոքի նշաններ ցույց չեն տալիս, մինչդեռ փաստաբաններն արդեն երկու օր է՝ գործադուլ են իրականացնում, Հովհաննիսյանը արձագանքեց, թե փաստաբանների կողմից դատական նիստերին չներկայանալը նշանակում է, որ նրանք պատշաճ և բարեխիղճ չեն կատարել իրենց պարտականությունները։

«Օրենքով նախատեսված է փաստաբանի երդումը, որ պարտավոր է պատշաճ ու բարեխիղճ կատարել իր պարտականությունները, պաշտպանել իր վստահորդի օրինական շահերը, Հիմա գործադուլը մի կողմից, մյուս կողմից էլ վստահորդի շահերը, արդյոք այստեղ խնդիր չկա՞», -նկատեց փոխնախարարը։

Նա հավելեց, որ փաստաբանի տեսանկյունից նայելով, ինքը որևէ խնդիր չի տեսնում, որովհետև փորձը ցույց է տալիս, որ եթե փաստաբանը կարող է իր վստահորդի շահերը լավ պաշտպանել՝ առանց խախտելու դատավարական կանոնները, որևէ խնդիր չի առաջանա։ Նրա խոսքով՝ դատարանը արհեստական սանկցիաներ երբևէ չի կիրառել, դրա համար բարեխիղճ փաստաբանի համար այս սանկցիաները բացարձակապես վտանգ չեն ներկայացնում:

Աղբյուր` Փաստինֆո