Փաստ ինֆո

Դատարանն այսօր մերժեց քննիչ Միքայել Զադոյանի պաշտպանների միջնորդությունը՝ Զադոյանի նկատմամբ որպես խափանման միջոց ընտրված կալանավորումը փոփոխելու վերաբերյալ:

Հիշեցնենք, որ պաշտպաններ Հրանտ Անանյանը և Սիմոն Ամիրխանյանը միջնորդել էին փոխել իրենց պաշտպանյալի նկատմամբ ընտրված կալանավորումը և ընտրել անազատության հետ չկապված խափանման միջոց կամ կալանավորումը փոխարինել գրավով՝ գրավի չափ սահմանելով 1 մլն դրամ կամ այն գումարը, որը կսահմանի դատարանը:

Էրեբունի և Նուբարաշեն վարչական շրջանների քննչական բաժնի ավագ քննիչ Միքայել Զադոյանը և փաստաբան Գայանե Գալոյանն իրենց առաջադրված մեղադրանքները չեն ընդունում, սակայն մեղադրանքն ընդունեց գործով մյուս ամբաստանյալ Բաբկեն Գասպարյանը:

Այդ մասին նրանք հայտարարեցին գործով դատաքննությունը սկսվելուց և մեղադրող Մնացականյանի կողմից մեղադրական եզրակացության եզրափակից մասի հրապարակումից հետո:

Ըստ մեղադրանքի՝ ՔԿ Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնում քննված քրեական գործով ՀՀ քաղաքացի Սոս Գասպարյանը որպես մեղադրյալ է ներգրավվել՝ ՀՀ քրեական օրենսգրքի 112-րդ հոդվածի հատկանիշներով նախատեսված հանցանքի կատարման համար, սակայն վերջինիս հայրը` Բաբկեն Գասպարյանը, նախաքննության ընթացքում այցելել է հիշյալ քննչական բաժին և տվյալ գործով վարույթն իրականացնող քննիչ Միքայել Զադոյանին առաջարկել առանձնապես խոշոր չափերով` 3000 ԱՄՆ դոլար կաշառք` որդուն առավել մեղմ քրեական պատասխանատվության ենթարկելու համար:

Մեղադրանքի համաձայն՝ քննիչն ընդունել է կաշառք ստանալու առաջարկը և իր հանցավոր մտադրությունն իրականացնելու նպատակով մեղադրյալի հորն ուղարկել փաստաբան Գայանե Գալոյանի մոտ` նրա միջոցով կաշառքի գումարն ստանալու և քրեական գործի ընթացքն ուղղորդելու համար` նախապես այդ մասին զգուշացնելով փաստաբանին: ՀՀ քննչական կոմիտեի պաշտոնատար անձի հետ նախապես ձեռք բերված պայմանավորվածության համաձայն` Գալոյանը, քննիչի համար վերացնելով անձամբ կաշառատուից գումարն ստանալու պարագայում հավանական բացահայտման խոչընդոտը, Բաբկեն Գասպարյանից 2016թ. դեկտեմբերի 29-ին ստացել և քննիչ Զադոյանին է փոխանցել 1.450.950 ՀՀ դրամին համարժեք, առանձնապես խոշոր չափերով` 3000 ԱՄՆ դոլար կաշառքի գումարը:

Միքայել Զադոյանին մեղադրանք է առաջադրվել նախնական համաձայնությամբ, փաստաբան Գայանե Գալոյանի օժանդակությամբ և միջոցով Բաբկեն Գասպարյանից առանձնապես խոշոր չափերով կաշառք ստանալու համար:

Պետական հատուկ ծառայություն իրականացնող պաշտոնատար անձի կողմից նախնական համաձայնությամբ առանձնապես խոշոր չափերով կաշառք ստանալուն օժանդակելու համար փաստաբան Գայանե Գալոյանին մեղադրանք է առաջադրվել ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով:

Նախնական համաձայնությամբ առանձնապես խոշոր չափերով կաշառք ստանալու համար քննիչ Միքայել Զադոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, իսկ առանձնապես խոշոր չափերով կաշառք տալու համար Բաբկեն Գասպարյանին մեղադրանք է առաջադրվել ՀՀ քրեական օրենսգրքի 312-րդ հոդվածի 3-րդ մասի 1-ին կետով:

Քննիչ Զադոյանի և փաստաբան Գալոյանի նկատմամաբ որպես խափանման միջոց է ընտրվել կալանավորումը, իսկ Բաբկեն Գասպարյանի նկատմամբ՝ չհեռանալու մասին ստորագրությունը:

Նշենք նաև, որ մինչև դատաքննությունն սկսվելը փաստաբան Գալոյանը միջնորդեց անթույլատրելի ապացույց ճանաչել իր աշխատասենյակում ԱԱԾ-ի կողմից կատարված արտաքին և ներքին դիտման տեսաձայնագրությունը: Ըստ Գալոյանի՝ դրանք ձեռք են բերվել օրենքի խախտմամբ:

Փաստաբան ամբաստանյալի խոսքով՝ վստահորդի հոր՝ Բաբկեն Գասպարյանի հետ իր աշխատասենյակում գործի վերաբերյալ զրույց է ունեցել և զրույցի բովանդակությունը նախաքննական մարմինը դրել է մեղադրանքի հիմքում: Այն դեպքում, երբ վճարովի փաստաբանական ծառայություն է մատուցել անձին: Նման պայմաններում փաստաբանական գաղտնիության երաշխավորություն է խախտվել:

Միջնորդության լուծումը հետաձգվեց, դատարանը՝ դրան կանդրադառնա խորհրդակցական սենյակում՝ դատական ակտ կայացնելիս:

Դատարանի կողմից սահմանված ապացույցների հաջորդականության համաձայն՝ նախ կհարցաքննվեն վկաները, ապա կհետազոտվեն գործում առկա փաստաթղթերը, իսկ վերջում կհարցաքննվեն ամբաստանյալները:

Վկաներից այսօր հարցաքննվեց Քննչական կոմիտեի կենտրոնական ապարատի քրեական գործերով քննության աջակցության ՀԿԳ ավագ քննիչ Էդուարդ Սիրականյանը, ով դեպքի ժամանակ զբաղեցրել է Էրեբունի և Նուբարաշեն վարչական շրջանների քննչական բաժնի պետի պաշտոնը:

Վկայի կարգավիճակ ունեցող Էդուարդ Սիրականյանը նշեց, որ իր՝ բաժնի պետ եղած ժամանակ ընդունված է եղել ծանր և առանձնապես ծանր հանցագործությունների վերաբերյալ գործերով իր աշխատասենյակում քննարկում կազմակերպել: Այդ գործերից մեկն էլ եղել է ավագ քննիչ Զադոյանի վարույթում եղած Սոս Գասպարյանի գործը:

Ըստ Սիրականյանի՝ իր աշխատասենյակում քննարկմանը ներկա են եղել Զադոյանը և վերջինս անմիջական ղեկավար Բունիաթ Եղիազարյանը, իրեն ներկայացվել են գործի հանգամանքները:

Վկան նշեց նաև, որ գործը ՀՀ քրեական օրենսգրքի 116-րդ հոդվածի տարրեր է պարունակել, այդ կապակցությամբ էլ հեռախոսազրույց է ունեցել վարչական շրջանի դատախազի հետ: Սակայն նախաքննության ժամկետները մոտեցել են և 112-րդ հոդվածով հաստատել է մեղադրանքն ու ուղարկել դատախազին՝ այն հաստատելու և դատարան ուղարկելու համար:

Միևնույն ժամանակ վկան նշեց, որ եթե ամբողջությամբ պարունակեր 116-րդ հոդվածի հատկանիշներ, անկախ նրանից, թե ինչ դիրքորոշում ուներ դատախազությունը, ինքը կվերաորակեր:

Վկայի ցուցմունքներն անավարտ մնացին, հաջորդ դատական նիստում այն կշարունակվի, սակայն նախագահող դատավորն ակնարկեց, որ արդեն իսկ առկա են հակասություններ նախաքննության ընթացքում տված ցուցմունքների հետ:

Աղբյուր` Փաստինֆո