Փաստ ինֆո

Հրազդանի քաղաքապետի որդին ենթարկվել է վարչական պատասխանատվության և կգտնվի հսկողության ներքո։

«Փաստինֆո»-ն ավելի վաղ տեղեկացրել էր, որ փորձագետները ճանապարհային երթեւեկության կանոնների խախտում չէին արձանագրել Հրազդանի քաղաքապետի որդու գործողություններում, թեև նախաքննական մարմինը քրեական գործով 4 անգամ նշանակել էր փորձաքննություն։

Ըստ փորձագետների՝ վարորդը վրաերթը կանխելու տեխնիկական հնարավորություն չի ունեցել և տվյալ իրադրությունում ՃԵԿ-ին հակասող գործողություններ թույլ չի տվել, ուստի՝ քրեական գործի վարույթը կարճվել էր։

Սակայն ՔԿ-ն, նակտի ունենալով, որ դեռահասը մեքենան վարել էր առանց վարորդական իրավունք ունենալու, գրություններ էր ուղարկել ոստիկանություն՝ նրան վարչական պատասխանատվության ենթարկելու և անչափահասների գործերով բաժանմունքում նրան հաշվառելու համար։

«Փաստինֆո»-ի տեղեկություններով՝ ի կատարումն քննիչի գրության՝ Հրազդանի քաղաքապետի որդին ճանապարհային ոստիկանության կողմից ենթարկվել է վարչական պատասխանատվության:

Հիշեցնենք, որ հունիսի 8-ին Հրազդանի քաղաքապետարանին պատկանող «Նիսսան Տիանա» մակնիշի, 444 LL 70 համարանիշի ավտոմեքենան, որն սպասարկում է Հրազդանի քաղաքապետ Արամ Դանիելյանին, նախկին կաթի գործարանի մոտ, վրաերթի է ենթարկել ճանապարհը հատող հետիոտն, նույն քաղաքի բնակիչ, 1959թ. ծնված Վալերի Թորոսյանին։ Վերջինս մարմնական վնասվածքներով տեղափոխվել է «Հրազդան ԲԿ» ՓԲԸ, որտեղ էլ գիտակցության չգալով մահացել է:

Քրեական գործով 4 անգամ դատաավտոտեխնիկական փորձաքննություն է նշանակվել։

Առաջին երեք փորձաքննությունների կատարումը հանձնարարվել է տարբեր փորձագիտական կենտրոններին, որոնք պատասխան , ըստ էության չեն տվել՝ ասելով, որ չեն կարող ասել խախտում եղել է, թե ոչ։ Իսկ չորրորդ անգամ նշանակվել է հանձնաժողովային դատաավտոտեխնիկական փորձաքննություն, որի կատարումը հանձնարարվել է նախորդ եզրակացությունները տված բոլոր երեք կազմակերպությունների փորձագետներին:

2017թ. դեկտեմբերի 25-ին ստացված եզրակացության համաձյան՝ փորձագետները ասել են, որ վարորդ տվյալ իրադրությունում ՃԵԿ-ին հակասող գործողություններ թույլ չի տվել:

Աղբյուր` Փաստինֆո