Փաստ ինֆո

Քրեական հետապնդման մեջ չգտնվող դատավորների մասնակցությամբ քննչական գործողությունների դեպքում առավելագույնս ապահովվելու է քննչական գործողության գաղտնիությունը և
հարգանքը դատավորի ու անկախության հեղինակության նկատմամբ:

«Արմենպրես»-ի հաղորդմամբ` հունվարի 31-ին Պետական-իրավական և մարդու իրավունքների պաշտպանության հարցերի մշտական հանձնաժողովի նիստի ժամանակ այս մասին ասաց ՀՀ արդարադատության նախարար Դավիթ Հարությունյանը:

«Քրեական հետապնդման մեջ չգտնվող դատավորների մասնակցությամբ քննչական գործողությունների դեպքում սահմանվել են երաշխիքներ: Սա այն դեպքերում է, երբ դատավորը որպես վկա է ներգրավված լինում որևէ այլ քննչական գործով և այլն: Քննչական գործողությունը կարող է կատարվել միայն նախապես դատավորի հետ համաձայնեցնելու ժամանակ` առավելագույնս ապահովելով քննչական գործողության գաղտնիությունը և հարգանքը նրա անկախության ու հեղինակության նկատմամբ: Բացի այդ, նախատեսել ենք, որ Բարձրագույն դատական խորհուրդը նման դեպքերում ունի որոշակի գործիքակազմ և, ըստ անհրաժեշտության, եթե առկա են դատավորի գործունեությանը ուղղակի կամ անուղղակի միջամտության փորձեր, ապա բարձրագույն դատական խորհուրդը ունենալու է համապատասխան հնարավորություն արձագանքելու նման խախտումներին»-, նշեց Հարությունյանը:

Նախարարի խոսքով` Ազգային ժողովի կողﬕց ընտրված բարձրագույն դատական խորհրդի անդամների պաշտոնավարումը հավասարեցվել է դատավորի փորձառությանը:

«Ինչու ,որովհետև Բարձրագույն դատական խորհուրդը որոշակի դեպքերում գործում է որպես դատարան, և սա նաև հնարավորություն է տալիս գործել այլ դատարաններից անկախ և ունենալ համապատասխան երաշխիքներ: Հետագայում կադրային համապատասխան ռեսուրսը կկարողանանք օգտագործել նաև դատական համակարգում»-, ասաց Հարությունյանը:

Նախարարն ընդգծեց, թե հաղթահարվել է մի կարևոր հարց, որը կարող էր առաջանալ Բարձրագույն դատական խորհրդի՝ որպես դատարան գործելու որոշման ընդունման շեմի հետ կապված: «Բարձրագույն դատական խորհուրդն իր որոշումները պետք է ընդունի ձայների 2/3-ով: Պատկերացնենք մի իրավիճակ, երբ կա միջնորդություն, և բարձրագույն դատական խորհուրդը ձայների 2/3-ը չի հավաքում, միաժամանակ պետք է մերժման որոշում կայացնել, իսկ մերժման որոշման համար ևս այդ շեմը չի հաղթահարվել: Այդ իսկ պատճառով մենք նախատեսել ենք որոշակի մեխանիզմներ, ինչով միջնորդությանը դեմ արտահայտված անդամները ձևակերպում են դատական խորհրդի որոշումը, որովհետև հակառակ դեպքում որոշման հարցը կﬓար օդից կախված»,- ասաց Հարությունյանը:

Նախարարի խոսքով` ընդլայնվել է նաև դատավորի սոցիալական երաշխիքների շրջանակը:

«Օրինակ` ամրագրվել են դատավորի առողջության և դժբախտ պատահարներից ապահովագրության, բնակության վայրից դուրս պաշտոնի նշանակվելու դեպքում բնակարանի վարձի փոխհատուցման և մի շարք այլ հիմնադրույթներ»,- նշեց Հարությունյանը:

Աղբյուր` Փաստինֆո