Փաստ ինֆո

Ծննդկան Մերի Մարգարյանի և նրա նորածնի մահվան գործով այսօր նախատեսվում էր մեղադրողի կողմից միջնորդության հրապարակում՝ կրկնակի դատաբժշկական փորձաքննություն նշանակելու վերաբերյալ:

Ներկայացվելիք միջնորդության վերաբերյալ նախորդ դատական նիստում դատախազ Արա Մնացականյանը դատարանից ժամանակ էր խնդրել, սակայն այսօրվա նիստում հայտարարեց, որ ուսումնասիրել է գործի ողջ նյութերը և հանգել է հետևության, որ կրկնակի դատաբժշկական փորձաքննություն նշանակելու դատավարական հիմքեր առկա չեն, ուստի` որոշվել է միջնորդությամբ հանդես չգալ:

Այսօրվա նիստում դատաքննությունը լրացնող միջնորդություններով հանդես եկավ Շուշանիկ Բախշյանի պաշտպան Ալեքսանդր Սիրունյանը:

Միջնորդությունները թվով 9-ն էին, ներկայացվեց Բախշյանի աշխատանքային զբաղվածության վերաբերյալ տեղեկանք, թե քանի՞ ժամ է օրվա ընթացքում նա աշխատում:

«Շենգավիթ» ԲԿ-ի կողմից պաշտպանի հարցմանն ի պատասխան հայտնել էին, որ նա աշխատում է 7 ժամից քիչ ավել և հերթապահություններին էլ ներգրավված չէ:

Բացի այդ, պաշտպանն Առողջապահության նախարարությանը գրավոր հարցրել էր, թե կեսարյան հատումն առաջնայի՞ն, թե՞ երկրորդային բժշկական օգնություն է, հարցին ԱՆ պատասխանել էր 2016թ. փետրվարի 17-ից հետո ընդունված հրամանի համատեքստում՝ այնինչ ինչպես դատարանը նկատեց՝ հրամանն ընդունվել է դեպքից 6 ամիս հետո, իսկ քննվող դեպքը տեղի է ունեցել 2015 թվականի հուլիսին:

Պաշտպանի հաջորդ միջնորդությունը վերաբերում էր Էրեբունի վարչական շրջանի քննչական բաժնին տրամադրված ինտերնետային կապին, ի պատասխան Քննչական կոմիտեի դեպարտամենտից պաշտպանին հայտնել էին, որ Էրեբունի քննչական բաժնին ինտերնետային կապ է տրամադրվել 2016թ. դեկտեմբերի 9-ից:

Թե ի՞նչ կապ ուներ, քրեական գործի հետ քննչական բաժնին տրամադրված ինտերնետային կապը, պաշտպանը խոստացավ հետագայում պարզաբանել, սակայն խնդրեց այդ փաստաթուղթը կցել գործի նյութերին:

Նախագահող դատավորն էլ հումորով արձագանքեց՝ հաջորդ միջնորդությունը վերաբերելու է նրան, թե քննիչն աթոռ ունեցե՞լ է, որ քրեական գործ հարուցի:

Միջնորդություններից մեկն էլ վերաբերում էր «Շենգավիթ» ԲԿ-ում հիվանդներին հոսպիտալացնելու կարգին: Պաշտպանը գրավոր դիմել էր ԲԿ-ի ղեկավարությանը, սակայն իրեն չեն տրամադրել տեղեկություններ: Ուստիև՝ դատարանին խնդրեց դիմել ԲԿ-ին և պահանջել հարցի պատասխանը: Դատարանը միջնորդությունը մերժեց:

Մեկ այլ միջնորդությամբ էլ պաշտպանը պահանջում էր այս գործից անջատված մասով կատարված դատաբժշկական փորձաքննության ժամանակ փորձագետներին ուղղված հարցերն իրենց տրամադրել:

Երևանի քննչական վարչությունը մերժել էր պաշտպանին տրամադրել տեղեկություններ՝ նախաքննական գաղտնիության հիմքով, սակայն դատարանը բավարարեց պաշտպանի միջնորդությունը և որոշեց Դատախազությունից պահանջել փորձաքննության եզրակացության եզրափակիչ մասը, ինչպես նաև՝ հարցերը, որոնք ուղղվել են փորձագետներին:

Հաջորդ դատական նիստը կկայանա փետրվարի 14-ին:

Լուսանկարը՝ Ֆոտոլուրի

Աղբյուր` Փաստինֆո