Փաստ ինֆո

Ծանոթ կնոջ սպանության մեջ մեղադրվող Ռոբերտ Հովհաննիսյանի գործով այսօր դատարանում հարցաքննվեցին դատահոգեբան փորձագետները:

Փորձագետները վերջերս անցկացված կրկնակի դատահոգեբանական փորձաքննության եզրակացությամբ գտել են, որ առհասարակ ամբաստանյալի մոտ կոմուլյատիվ աֆեկտ չի եղել: Միաժամանակ եզրակացությամբ փորձագետները հաստատել են, որ ամբաստանյալի հոգեվիճակը համապատասխանել է ֆիզիոլոգիական աֆեկտի առաջին փուլի՝ պրովոկացիայի առկայություն, և երկրորդ փուլի՝ գիտակցության նեղացում, չափանիշներին:

Հոգեբանները որպես աֆեկտի պրովոկացիա են որակում տուժողի կողմից ամբաստանյալի ոտքին դանակով հասցված հարվածը: Իսկ գիտակցության նեղացման մասին է վկայում, ըստ փորձագետների, որ ամբաստանյալը տուժողին դանակի 19 հարված է հասցրել: Փորձագետների համոզմամբ, 19 հարված չի կարող լինել նախապես պլանավորված, դրանք առավելապես պահի դրսևորում են:

Հոգեբույժներն ստանձնել են նաև հոգեբանների գործառույթները և եզրահանգել՝ աֆեկտը բացակայում է

Մեղադրողն արձանագրեց, որ իր նախաքննական ցուցմունքում ամբաստանյալը նշել է հստակ, կամային, իրար հետ կապված գործողություններ կատարելու մասին: Մինչդեռ հոգեբանները գտնում են, որ նշված ցուցմունքն իրենց չի տվել աֆեկտի առկայության կամ բացակայության մասին բավարար տեղեկատվություն, իրենք չեն ունեցել բավարար ու հավաստի նյութ աֆեկտի երրորդ փուլի՝ թուլության, առկայությունը հաստատելու համար:

Նշենք, որ սա գործի շրջանակում անցկացված արդեն չորրորդ փորձաքննության եզրակացությունն է: Առաջին փորձաքննությամբ եզրակացվել էր, որ առկա է կոմուլյատիվ աֆեկտ, երկրորդ փորձաքննությունը եզրակացրել է, որ կոմուլյատիվ աֆեկտի մասին խոսք չի կարող գնալ, իսկ ֆիզիոլոգիական աֆեկտ առկա չէ: Երրորդ փորձաքննությունն ինքնին արտառոց է եղել՝ հոգեբանական հասկացության՝ աֆեկտի, մասին դատողություններ են արել հոգեբույժները: Ըստ նրանց ստորագրած փորձաքննության եզրակացության, հոգեկան խիստ հուզմունքի վիճակը՝ աֆեկտը, բացակայում է, անգամ այն անհավանական է, առկա է եղել ընդամենը հոգեկան լարվածություն և ոչ ավելին, իսկ երկու հոգեբաններից մեկն առանձին եզրակացություն է գրել, որովհետև համամիտ չի եղել հանձնաժողովի հետ և գտել է, որ աֆեկտն առկա է, մյուս հոգեբանը նույնպես գտել է, որ աֆեկտը բացակայում է:

Հաջորդ դատական նիստում կսկսվի դատական վիճաբանությունների փուլի՝ մեղադրողի ու տուժողի իրավահաջորդի ներկայացուցչի մեղադրական ճառերով:

Հիշեցնենք, որ ըստ մեղադրական եզրակացության, Ռոբերտ Հովհաննիսյանը 2013թ. հոկտեմբերի 24-ին՝ ժամը 15.00-ից մինչև 17.00-ն ընկած ժամանակահատվածում, վիճաբանել է բնակարանի բնակչուհու հետ, որի ընթացքում նրան շահադիտական դրդումներով սպանելու դիտավորությամբ՝ սուր, ծակող-կտրող գործիքով մի շարք հարվածներ է հասցրել նրա մարմնի տարբեր մասերին՝ հասցնելով առողջության ծանր վնաս՝ կյանքին վտանգ սպառնացող և առաջացած արյան սուր կորստի հետևանքով ապօրինաբար կյանքից զրկել է կնոջը, ապա տիրանալով բնակարանում գտնվող 80.000 ՀՀ դրամ կանխիկ գումարին և թվով 5 հատ ոսկյա զարդերին՝ դեպքի վայրից դիմել է փախուստի: Ռ.Հովհաննիսյանին մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով՝ շահադիտական դրդումներով սպանություն:

Աղբյուր` Փաստինֆո