Փաստ ինֆո

58-ամյա Եղիշե Խաչատրյանի դաժան սպանության գործով այսօր դատարանում հարցաքննվեց նրա կինը՝ լեզվաբան Փառանձեմ Մեյթիխանյանը, ով գործով տուժողի իրավահաջորդի կարգավիճակ ունի:

Ըստ տուժողի իրավահաջորդի՝ դեպքի օրը՝ 2016թ. հունիսի 4-ին, ամուսինը և սկեսուրը ուշ երեկոյան՝ ժամը 22.30-ից մինչև 23.00-ն ընկած ժամանակահատվածում, ուղևորվել են գյուղ: Կարճ ժամանակ անց իր դուստրը հեռախոսազանգ է ստացել, ինչից հետո դուստրը լացակումած դուրս է նետվել տանից: Այդ ամենից հետո ինքը ևս տանից դուրս է եկել և հարևանուհու հետ գնացել դեպի դեպքի վայր:

Դեպքի վայրում կինն ամուսնու դին հայտնաբերել է ասֆալտին՝ մեջքի վրա պառկած վիճակում, ըստ տուժողի իրավահաջորդի՝ ամուսնու մարմինը տաք է եղել, սակայն շտապօգնության բժիշկն ասել է, որ այլևս չկա, մահացել է: 

Դեպքի վայր հասնելով՝ Մեյթիխանյանը նկատել է, որ սկեսուրը գլուխը հարվածում է իրենց «ֆորդ» մակնիշի ավտոմեքենային:

Մեյթիխանյանը կարծել է, թե վթար է եղել, անմիջապես սկեսուրին հարցրել է, թե ի՞նչ է տեղի ունեցել, ինչին ի պատասխան՝ վերջինս ասել է՝ «խփեցին, խփեցին, փախան»:

Միևնույն ժամանակ տուժողի իրավահաջորդը նշեց, որ այդ ժամանակ նկատել է՝ ամուսնու վերնաշապիկը վերև է բարձրացած, իսկ որովայնի հատվածում եղել է կապտուկ, բացի այդ, գլխի վրա՝ քունքային հատվածում, բաց, խորը վերք է եղել, քունքից եկած արյունն էլ լճացած է եղել ամուսնու գլխի հատվածում:

Ըստ տուժողի իրավահաջորդի՝ դեպքի հաջորդ օրերին սկեսուրի հետ խոսակցությունների ժամանակ, վերջինս պատմել է, որ մեքենայով ընթանալու ժամանակ իրենց դեմդիմաց է հայտնվել մեկ այլ մեքենա, և Եղիշե Խաչատրյանը շրջանցել է՝ այդկերպ կանխելով վթարը, որից հետո ասել է՝ «անասուն, ոչխարներ այդ ինչ էինք անում», ինչից հետո էլ թեև մայրը որդուն խնդրել է ավտոմեքենայից չիջնել, սակայն Եղիշե Խաչատրյանն իջել է, իսկ մյուս ավտոմեքենայից իջել են 3 երիտասարդներ և հայհոյանքներով հարձակվել են Եղիշե Խաչատրյանի վրա:

Այդ տղաների հետ եղել է նաև մի աղջիկ, ում հետ Էմմա Աբրահամյանը փորձել է բաժանել վիճաբանողներին, սակայն եկել է մյուս եռյակը, և այս անգամ բոլորով են ծեծել Խաչատրյանին:
Տուժողի իրավահաջորդի խոսքով՝ սկեսուրը նաև պատմել է, որ այդ երիտասարդների վրայից խմիչքի հոտ է եկել, բացի այդ էլ նրանց վարքագիծն է տարօրինակ եղել, թռչկոտել են, խփել իր որդուն:

Մեյթիխանյանը նաև նշեց, որ սկեսուրի ոտքերի ազդրերի հատվածում ևս կապտուկներ են եղել:

- Ենթադրաբար բաժանելու ժամանակ է երևի հարվածներ ստացել ոտքերին,- ասաց Մեյթիխանյանը:

Ինչ վերաբերում իր ամուսնուն հարվածողներին ճանաչելուն, ապա Մեյթիխանյանը նշեց, որ սկեսուրն ասել է, որ առաջին եռյակում խոզի դեմքով մեկը կար, որ տեսնի կճանաչի, մյուս եռյակում մեկն ավելի բարձրահասակ էր քան մյուսները: Բացի այդ էլ երբ դեպքից հետո ամբաստանյալների նկատմամաբ հետախուզում է հայտարարված եղել, Մեյթիխանյանի դուստրը հեռախոսով ցույց է տվել Արտաշես Չիչոյանի և Արարատ Նիկողոսյանի նկարները, և սկեսուրը ճանաչել է:

Ինչ վերաբերում է Եղիշե Խաչատրյանին բութ առարկայով հարվածելուն, ապա, հարսի խոսքով, սկեսուրն ասել է, թե ինքը չի տեսել, որ ձեռքներում փայտ, երկաթ համ հրազեն լինի, բայց որդու գլխին երբ բռունցքով հարվածել են ու նա վայր է ընկել, հարվածողի ձեռքում ինչ-որ բան է եղել, որը ծավալով մեծ չի եղել և իր համար տեսանելի չի եղել:

Միևնույն ժամանակ, տուժողի իրավահաջորդի խոսքով՝ ինքը հանդիպել է դեպքի վայրից քիչ հեռու գտնվող մի սերվիսի տնօրենի, ով իրեն ասել է, թե տաքսի ավտոմեքենա է մոտեցել իրենց սերվիսին, և վարորդը իրեն ներս է գցել, իսկ նրան հետևել են մի քանի երիտասարդներ, իսկ հետո սերվիս են գնացել Արարատի, Արտաշեսի և Խաչիկի հայրերը, և նրանցից իրեն արժանապատիվ է պահել միայն Արարատի հայրը՝ ասելով. «Տղա են, արել են, թող պատասխան տան»:

Ըստ Մեյթիխանյանի՝ ամբաստանյալի աթոռին հայտնվածներից 3-ը խիստ պատժի պետք է դատապարտվեն, իսկ 1-2-ը պատահականության բերումով են հայտնվել դեպքի վայրում:

«Կապիկի տարին իր կապիկություն արեց մեր ընտանիքի նկատմամբ: Ես հավատում եմ մեր երկրի օրենքներին, և մեր երկում պետք է օրենքը գործի: Որդիներիս ևս ասել եմ, որ վրեժով լցված ոչինչ չանեն, մեր միակ մխիթարությունը կլինի արդար դատաքննությունը»,- ասաց Փառանձեմ Մեյթիխանյանը:

Նշենք, որ հաջորդ դատական նիստում նախատեսվում է տուժող Սանասար Բադալյանի հարցաքննությունը:

Բադալյանը գործով առաջին դատական նիստերից մեկում հայտարարել էր, որ ինքը տուժող չի և գործի մարդ է, իսկ դատարանը ամեն անգամ նրան ծանուցում և կանչում է դատարան:

Թերևս Բադալյանը դատաքննության ողջ ընթացքում դատարան է ներկայացել մեկ կամ երկու անգամ, և նման պայմաններում դատարանը գտավ, որ նա խուսափում է դատարան ներկայանալուց, և բերման որոշում կայացրեց:

Աղբյուր` Փաստինֆո