Փաստ ինֆո

Հայաստան-Եվրամիություն նոր` Համապարփակ եւ ընդլայնված գործընկերության համաձայնագրի իրականացումը հնարավոր է` սկսվի մայիսի 1-ից կամ հունիսի 1-ից: «Արմենպրես»-ի հաղորդմամբ` տարեկան ամփոփիչ ասուլիսի ժամանակ այս մասին հայտարարեց ՀՀ արտգործնախարար Էդվարդ Նալբանդյանը:

«ԵՄ հետ համապարփակ և ընդլայնված գործընկերության համաձայնագիրը լուրջ և կարեւոր հանգրվան է Հայաստանի և Եվրամիության միջեւ հարաբերություններում: Այսօր մենք պետք է ամփոփենք այն ձեռքբերումները, որոնք կատարվել են Եվրամիության հետ եւ դրանց հիման վրա նախանշենք անելիքները գալիք տարիների համար:

Այսօր մենք կենտրոնանում ենք այդ կարևոր շրջանակային փաստաթղթի վավերացման գործընթացի վրա: Հայաստանը հայտարարել է, որ քայլեր են ձեռնարկվում, որ այն վավերացվի մինչև ապրիլ: Բայց մենք մեկ քայլ առաջ ենք նայում: Իհարկե, հուսով ենք, որ այն կվավերացվի ԵՄ երկրների կողմից առանց խոչընդոտների», - ասաց ՀՀ արտգործնախարարը` ընդգծելով, որ արդեն մեր վավերացումից կարող է ժամանակավոր սկսել համաձայնագրի իրականացումը:

Նա հավելեց, որ շարունակելու են իրականացնել Եվրամիության հետ իրականացվող նախկին, ինչպես նաեւ միասնական ավիացիոն գոտի ստեղծելուն վերաբերող ծրագրերը:

«Կարեւոր է, որ առավել ջանքեր գործադրվեն եվրոպական միության երկրների հետ` ուղղված հարաբերությունների առավել ընդլայնմանը, զարգացմանն ու ամրապնդմանը»,- եզրափակեց նա:
Հայաստան-Եվրամիություն Համապարփակ եւ ընդլայնված գործընկերության համաձայնագիրը կնքվեց 2017 թվականի նոյեմբերի 24-ին Բրյուսելում կայացած Արեւելյան գործընկերության գագաթնաժողովի շրջանակում: Այն արդեն վավերացրել է Էստոնիան:

Աղբյուր` Փաստինֆո