Փաստ ինֆո

Փաստաբան Հայկ Ալումյանը համակարծիք է դատարանի կողմից փաստաբանների նկատմամբ մինչև 100 000 դրամ տուգանքի վերաբերյալ դրույթը ՀՀ դատական օրենսգրքից հանելու կոչով հանդես եկած փաստաբանների հետ: Այս մասին փաստաբանը հայտնեց «Փաստինֆո»-ի լրագրողի հետ հարցազրույցում: 

Հայկ Ալումյանը նշեց, որ ինքը համակարծիք լինելու երկու պատճառ ունի՝ առաջին պատճառը տուգանքի չափն է:

Փաստաբանն ընդգծեց, որ Մարդու իրավունքների եվրոպական դատարանի վճիռներից հայտնի է, որ Մարդու իրավունքների եվրոպական կոնվենցիայի իմաստով եթե պատիժը ներպետական իրավունքում խիստ է և հետապնդում է կանխարգելիչ կամ ահաբեկման նպատակ, որպեսզի անձն ինչ-որ մի գործողություն չանի, ապա այդպիսի պատիժը համարվում է քրեական պատիժ՝ նույնիսկ եթե ներպետական իրավունքում, ենթադրենք, չի համարվում այդպիսին: Ուստի այդ պարագայում այդպիսի պատիժ անձի նկատմամբ սահմանելիս պիտի պահպանվեն Եվրոպական կոնվենցիայի 6-րդ հոդվածով՝ Արդար դատաքննության իրավունք, նախատեսված բոլոր երաշխիքները:

100 000 դրամ պատիժը Մարդու իրավունքների եվրոպական կոնվենցիայի իմաստով քրեական պատիժ է, որովհետև այն բավականին խիստ է մի երկրի համար, որտեղ նվազագույն սպառողական զամբյուղը 60 հազար դրամից քիչ է, այսինքն՝ մի երկրում, որտեղ տուգանքը կազմում է նվազագույն սպառողական զամբյուղի համարյա կրկնապատիկը: Եթե այդպիսի տուգանք ինչ-որ մեկի նկատմամբ պիտի նշանակվի, ապա պիտի նշանակվի Կոնվենցիայի 6-րդ հոդվածով նախատեսված երաշխիքներն ապահովելով: Այսինքն՝ անձին պետք է մեղադրեն, նա պետք է իմանա ինչում է մեղադրվում, պաշտպանվի անձամբ կամ պաշտպանի միջոցով, պետք է տեղի ունենա դռնբաց դատական նիստ, պետք է ապահովվեն այլևայլ, մի շարք մեծ ու փոքր երաշխիքներ:

«Ի՞նչ է տեղի ունենում ըստ մեր օրենսգրքի. փաստաբանն, ով դատական նիստում, դատարանի գնահատմամբ, կարգ է խախտել, դատարանը կարող է տեղնուտեղը մուրճը խփել սեղանին և ասել, որ Դուք տուգանվեցիք հարյուր հազար դրամով: Սա նշանակում է, որ Եվրոպական կոնվենցիայով նախատեսված երաշխիքներից ոչ մեկը չպահպանվեց. քրեական պատժի ենթարկվեց փաստաբանը, բայց առանց Կոնվենցիայի 6-րդ հոդվածով նախատեսված երաշխիքների պահպանման»,- ասաց Հայկ Ալումյանը՝ համոզմունք հայտնելով, որ մոտակա ժամանակներս հենց որ մի այդպիսի տուգանք նշանակվի, իր գործընկերներից մեկը կդիմի Եվրոպական դատարան և «բավականին կարճ ժամանակ հետո այստեղ կհասկանան, որ այդպես չի կարելի»:

Հայկ Ալումյանը նշեց, որ ինքը նախկինում այն տեսակետին է եղել, որ եթե տուգանքները լինեին ցածր, խնդիր չէր առաջանա, որ սա քրեական պատիժ է, միգուցե դա նորմալ կլիներ, եթե դատավորը տուգաներ փաստաբաններին: «Այն ժամանակ ես այդպես էի կարծում, մինչև որ փաստաբան և շատ լավ իրավաբան Դավիթ Խաչատուրյանը բերեց մի փաստարկ, որն ինձ վերջնականապես համոզեց, որ իրոք ընդհանրապես այդ դրույթը պետք է դուրս գա: Փաստարկի էությունը հետևյալն է՝ ոչ ոք չի կարող իր գործով լինել դատավոր»,- ասաց Հայկ Ալումյանը՝ պարզաբանելով, որ եթե փաստաբանը դատավարության ընթացքում, իր վստահորդի շահերը պաշտպանելիս կատարել է մի հայտարարություն կամ գործողություն, որից դատավորը վիրավորվել է, դատավորը կամ դատարանը որպես տուժած կողմ չի կարող տեղնուտեղը դատավարություն ու արդարադատություն իրականացնել, տուգանել փաստաբանին: Հակառակ դեպքում կստացվի, որ դատավորը կամ դատարանն «իր սեփական գործով դուրս եկավ որպես դատավոր», այդպես չի կարող լինել:

«Այդ փաստարկով ինձ համար վերջնականապես հարցը փակվեց՝ այդ տուգանքները չպետք է լինեն», - հավելեց Հայկ Ալումյանը:

Փաստաբանը չբացառեց, որ գործընկերներից որևէ մեկը կդիմի Սահմանադրական դատարան, «չեմ բացառում, նույնիսկ համոզված եմ, որ շատերը կդիմեն Եվրոպական դատարան»: Հայկ Ալումյանը համոզված է, որ Փաստաբանների պալատը կլինի հետևողական, մինչև վերջ կգնա: Ըստ նրա, հնարավոր են նաև զանգվածային ակցիաներ, ինչպես օրինակ, նախազգուշական ակցիաներ անցկացվեցին Լոռիում ու Շիրակում, միգուցե լինեն ավելի մեծ ծավալի:

Միանալո՞ւ եք այդ դրույթի դեմ փաստաբանների մեծամասնութան նախաձեռնությանը մեր հարցին Հայկ Ալումյանը պատասխանեց. «Ցանկացած գործողություն, որն ուղղված կլինի տուգանքների վերաբերյալ դրույթը վերացնելուն, իհարկե, կմիանամ»: Նա միաժամանակ նշեց, որ փաստաբանությունն ուժեղ է հենց նրանով, որ ամեն մեկը ինչ-որ մի սեփական ճանապարհ էլ է փորձում գտնել, դա կենտրոնացած ճանապարհից ավելի արագ է բերում արդյունքի: «Մենք կհասնենք նրան, որ տուգանքները կամ կհանվեն, կամ ինչպես հաճախ է պատահում, կասեն, դե, լավ, թողեք մնա, բայց խոստանում ենք, որ չի կիրառվի»,- ասաց Հայկ Ալումյանը:

Աղբյուր` Փաստինֆո