Փաստ ինֆո

Երևան քաղաքի ընդհանուր իրավասության դատարանի նախագահի պաշտոնի թափուր տեղի համար մրցույթ է հայտարարվել և երկու շաբաթ անց հայտնի կլինի, թե ով է զբաղեցնելու այդ պաշտոնը: Միևնույն ժամանակ այսօր հայտնի դարձավ, որ այդ պաշտոնում ժամանակավորապես նշանակվել է Ռուբեն Վարդազարյանը:

Այսօր արդեն դատական օրենսգրքում լրացումներ և փոփոխություններ կատարելու մասին օրենքի ուժով Երևանի տարբեր վարչական շրջանների արդեն իսկ նախկին դատարանների նախագահները և դատավորները կշարունակեն քննել իրենց վարույթում գտնվող գործերը:

Այդպիսին է օրենքի պահանջը, Հայաստանի Հանրապետության դատական օրենսգրքում լրացումներ և փոփոխություններ կատարելու մասին օրենքի 7-րդ հոդվածի համաձայն՝ սույն օրենքն ուժի մեջ է մտնում պաշտոնական հրապարակման օրվան հաջորդող տասներորդ օրը։

2-րդ մասի համաձայն՝ օրենքն ուժի մեջ մտնելու օրվանից Երևան քաղաքի վարչական շրջանների ընդհանուր իրավասության դատարանները շարունակում են գործել որպես Երևան քաղաքի ընդհանուր իրավասության դատարան, իսկ դատարանների նախագահները և դատավորները շարունակում են պաշտոնավարել Երևան քաղաքի ընդհանուր իրավասության դատարանի դատավորի պաշտոնում և շարունակում են քննել իրենց վարույթներում եղած գործերը:

Նշենք, որ Հայաստանին Հանրապետության դատական օրենսգրքում լրացումներ և փոփոխություններ կատարելու մասին օրենքի պահանջի համաձայն՝ այսուհետ Երևան քաղաքում կգործի մեկ միասնական դատարան, ինչը նշանակում է, որ Երևանի 7 վարչական շրջանների ընդհանուր իրավասության դատարաններն այսուհետ կհամարվեն Երևանի ընդհանուր իրավասության դատարանի նստավայրեր՝ իրենց դատավորներով և մեկ ընդհանուր նախագահով:

Ուստիև՝ այս առնչությամբ արհեստականորեն բարձրացված աղմուկն անտեղի է:

Աղբյուր` Փաստինֆո