Փաստ ինֆո

Երևանի Աջափնյակ և Դավթաշեն վարչական շրջանների դատարանի շենքում, սակայն արդեն Երևան քաղաքի դատարանում այսօրվա դատական նիստում ցուցմունքներ տվեց 22-ամյա ապագա բժիշկ Լևոն Սահակյանի աղմկահարույց սպանության գործով ամբաստանյալ, «Պատանի լրագրողներ» դպրոցի տնօրեն Վահան Ղազարյանը:

Ըստ մեղադրանքի, Վահան Ղազարյանը Թերլեմազյան փողոցի 3-րդ հասցեում, Լևոն Սահակյանի նշանածին աշխատավարձ չվճարելու հարցի շուրջ Լ.Սահակյանի հետ վիճաբանության և քաշքշուկի մեջ է մտել, որի ժամանակ իր մոտ առկա ծալովի դանակով մեկ անգամ հարվածել է վերջինիս ոտքին և մեկ անգամ կրծքավանդակի շրջանին, որի հետևանքով Լ.Սահակյանը մահացել է:

Ամբաստանյալը հայտարարեց, որ ինքը թիկունքով պատին սեղմված, կողքի վրա գետնին ընկած վիճակում մի ձեռքով գրպանում բացել է դանակը: Ինչ-որ մեկը կարծես թե իրեն ասեր՝ գրպանումդ դանակ կա. 96թ.-ից այդ դանակն իր գրպանից դուրս չի եկել, հավելեց նա: Ըստ Վ.Ղազարյանի, ինքը հարվածել է Լևոնի ոտքին, իսկ կրծքավանդակի ձախ հատվածին՝ սրտին, հարվածը չի հիշում` ինչպես է տեղի ունեցել, այն ժամանակից մինչև հիմա Լևոնի որովայնի վնասվածքն իր համար հանելուկ է մնացել:

«Չեմ մտածել, չեմ ցանկացել որովայնին խփել»,- ասաց Վահան Ղազարյանը՝ հավելելով, որ ընդհանրապես նպատակ չի ունեցել Լևոնին կյանքից զրկել: Ավելին, զենք՝ դանակ, օգտագործելու միտքն, ըստ նրա, առաջացել է 15 վայրկյանի ընթացքում: Ըստ ամբաստանյալի, երբ ինքը գետնին ընկած է եղել, Լևոնն իրար հետևից 5-10 շատ ուժեղ հարվածներ է հասցրել իրեն:

Մեղադրողի դիտարկմանն առ այն, որ ըստ փորձագետի եզրակացության, ամբաստանյալը ստացել է թեթև վնասի հատկանիշներ չպարունակող վնասվածքներ, ամբաստանյալը, միևնույն է, պնդեց, որ տուժողն իրեն ուժեղ է խփել:

Ի պատասխան տուժողի իրավահաջորդի ներկայացուցիչ Արայիկ Պապիկյանի հարցի, ամբաստանյալը նշեց, որ երբ տուժողը զանգահարել է իրեն և պայմանավորվել հանդիպել, ինքը կռահել է, որ խոսքը փողի մասին է գնալու: Հանդիպմանն ինքը սկզբից ևեթ ասել է, որ այդ պահին 20 հազար դրամ կարող է տալ, և այն դրված է եղել սեղանին, իսկ մնացած 80 հազարը կտա առաջիկա երկուշաբթի օրը, սակայն Լևոնն ամբողջ պարտքն է պահանջել: Եթե երկու օրից գային ու ողջ գումարը չստանային, այդ ժամանակ արդեն, ըստ ամբաստանյալի, թող պարտքի դիմաց ֆոտոխցիկը վերցնեին, դրա իրավունքը կունենային, և ինքը այն կտար Լևոնին: Տուժողի իրավահաջորդի ներկայացուցչի այն հարցին, թե սկզբնապես հեռախոսազրույցում ինչու չի ասել նույնը Լևոնին, հետևեց պատասխանը՝ «ես չեմ պատկերացրել, որ դանակակռիվ է տեղի ունենալու»:

Վահան Ղազարյանը չի հիշում, որ ինքը գոռացել է՝ զենքս բերեք, իսկ գազային ատրճանակով սպառնացե՞լ եք հարցին հնչեց պատասխանը՝ միանշանակ ոչ: Զենքով շենքից դուրս գալ, ըստ ամբաստանյալի, ընդհանրապես չի եղել:

Ամբաստանյալը Լևոնին բնութագրեց որպես կոռեկտ, հավասարակշռված անձնավորություն, այդ ինչի՞ց է, որ տուժողը հանկարծ դարձել է արգրեսիվ հարցին ամբաստանյալը պատասխանեց՝ «այդ օրը Լևոնը Լևոնը չէր, ես Լևոնին ոչ մի անգամ այդպես չեմ տեսել»:
Տուժողի իրավահաջորդի ներկայացուցչի միջնորդությամբ կհրապարակվեն ամբաստանյալի նախաքննական ցուցմունքները՝ դատաքննական ցուցմունքների հետ էական հակասությունների պատճառով:

Հրապարակումը և հակասությունների շուրջ հարցաքննությունը Երևան քաղաքի դատարանը կքննի արդեն հաջորդ դատական նիստում, այլ վարչական շենքում: Ըստ ամենայնի քրեական գործով նիստ Աջափնյակ-Դավթաշեն վարչական շրջանների դատարանում վերջին անգամ էր անցկացվում, այնտեղ կքննվեն քաղաքացիական գործեր:

Աղբյուր` Փաստինֆո