Փաստ ինֆո

Տավուշի մարզի ընդհանուր իրավասության դատարանում անց է կացվել պաշտոնյայի, մասնավորապես, Տավուշի մարզային վարչության Իջևանի բաժնի քրեական հետախուզության բաժանմունքի պետի կողմից խոշտանգման վերաբերյալ գործով առաջին դատական նիստը:

Դատարանի ինքնաբացարկի, մեղադրողի բացարկի, պաշտպանին վարույթից հեռացնելու հետ կապված ընթացակարգային հարցերը լուծելուց հետո նոր միայն պարզվել է, որ մեղադրողը ծանոթ չի գործի նյութերին:

Այդ մասին մեղադրողը բարձրաձայնել է միայն այն ժամանակ, երբ պաշտպանական կողմը երկու միջնորդություն է ներկայացրել դատակոչի ցուցակում չընդգրկված վկաներին հարցաքննելու և տուժողի բացատրությունն որպես այլ փաստաթուղթ ճանաչելու մասին: Առաջին միջնորդության վերաբերյալ դատարանը խորհրդակցական սենյակում կորոշի չդատակոչված վկաների ցուցմունքները ապացույց գնահատել, թե ոչ:

Իսկ երկրորդ միջնորդության քննարկման ժամանակ դատախազը անակնկալ կերպով հայտարարել է, որ ծանոթ չէ գործի նյութերին և ժամանակ է խնդրել՝ դրանց ծանոթանալու համար, և դատարանը բավարարել է դատախազի միջնորդությունը ու դատական նիստը հետաձգել:

«Փաստինֆո»-ի լրագրողի հետ զրույցում տուժողի ներկայացուցիչ, «Ընդդեմ իրավական կամայականության» ՀԿ փաստաբան Արա Ղարագյոզյանը պարզաբանեց, որ մեղադրական եզրակացությունը հաստատվել է Գլխավոր դատախազության կողմից, սակայն գործով մեղադրանքը պաշտպանելու համար լիազորվել է մարզային դատախազության դատախազը:

«Ակնհայտ է, որ դատախազը մեղադրանքը չի պաշտպանում: Հայտնի է, որ մարզերում դատախազները կաշկանդված են»,- ասաց Արա Ղարագյոզյանը:

Հիշեցնենք, որ ՀՀ հատուկ քննչական ծառայությունում քննված քրեական գործի նախաքննության ընթացքում ձեռք բերված բավարար ապացույցներով հիմնավորվել է, որ ՀՀ ոստիկանության Տավուշի մարզային վարչության Իջևանի բաժնի քրեական հետախուզության բաժանմունքի պետ Գերասիմ Մարդանյանը 2017 թվականի հոկտեմբերի 4-ին խոշտանգել է Տավուշի մարզի բնակիչ Ժ․ Ս․-ին:
ՀՀ ոստիկանության Տավուշի մարզային վարչության Իջևանի բաժնի ծառայողները 2017 թվականի հոկտեմբերի 4-ին Տավուշի մարզի Այգեհովիտ գյուղի բնակիչ Վ․ Ս․-ին ապօրինի ծառահատում կատարելու կասկածանքով բերման են ենթարկել ոստիկանության Իջևանի բաժին: Ոստիկանության աշխատակիցների պահանջով Վ. Ս․-ի եղբայրը՝ Ժ․ Ս․-ը, ՀՀ ոստիկանության Իջևանի բաժին է տեղափոխել եղբոր վարած ավտոմեքենան, որից հետո ոստիկանները նրան ուղեկցել են Իջևանի բաժնի աշխատասենյակներից մեկը:

Այնուհետև աշխատասենյակ է մտել հիշյալ բաժնի քրեական հետախուզության բաժանմունքի պետը, և ենթադրելով, որ Ժ․ Ս․-ը նույնպես մասնակցել է ապօրինի ծառահատմանը, եղբոր հետ գտնվել է նույն ավտոմեքենայում ու չի ենթարկվել ավտոմեքենան կանգնեցնելու` ոստիկանների պահանջին, այդ արարքի համար պատժելու նպատակով խոշտանգել է վերջինիս. ապտակել է դեմքին, ոտքերով հարվածել որովայնին և ոտքերին՝ պատճառելով մարմնական վնասվածքներ:

Գերասիմ Մարդանյանին մեղադրանք է առաջադրվել ՀՀ քրեական օրենսգրքի 309.1 հոդվածի՝ Խոշտանգումը, 1-ին մասով:

Լուսանկարում՝ փաստաբան Արա Ղարագյոզյանը

Լուսանկարը՝ Ֆոտոլուրի

Աղբյուր` Փաստինֆո