Փաստ ինֆո

Փորձագետ Կարեն Վարդանյանի սպանության գործով վերաքննիչ բողոք է ներկայացրել մեղադրողը և սպանության գործով առաջին ատյանի դատարանի դատավճռով 24 տարվա ազատազրկման դատապարտված Գևորգ Զոհրաբյանը:

Մեղադրողը վերաքննիչ բողոքով պահանջել է բեկանել Գևորգ Զոհրաբյանի և Արթուր Միհրանյանի վերաբերյալ առաջին ատյանի դատարանի 09.11.2017թ. դատավճիռը, կայացնել գործն ըստ էության լուծող նոր դատական ակտ` նրանց երկուսի նկատմամբ վերջնական պատիժ նշանակելով ցմահ ազատազրկում:

Իսկ Գևորգ Զոհրաբյանը պահանջել է բեկանել իր վերաբերյալ դատական ակտը, արդարացնել իրեն, ճանաչել և հռչակել իր անմեղությունը կամ քրեական գործը վերադարձնել նույն դատարան՝ ըստ էության նոր քննության:

Ավելի վաղ «Փաստինֆո»-ն տեղեկացրել էր, որ Գևորգ Զոհրաբյանը մեղավոր է ճանաչվել ՀՀ քրեական օրենսգրքի 104-րդ հոդվածի 2-րդ մասի 3-րդ, 7-րդ և 8-րդ կետերով, 131-րդ հոդվածի 2-րդ մասի 1-ին կետով և 177-րդ հոդվածի 2-րդ մասի 1-ին կետով նախատեսված հանցանքներում և պատիժների համակցությամբ դատապարտվել 24 տարվա ազատազրկման և 1.000.000 դրամ տուգանքի, իսկ Արթուր Միհրանյանը մեղավոր է ճանաչվել ՀՀ քրեական օրենսգրքի 104-րդ հոդվածի 2-րդ մասի 3-րդ, 7-րդ և 8-րդ կետերով, 131-րդ հոդվածի 2-րդ մասի 1-ին կետով և 177-րդ հոդվածի 2-րդ մասի 1-ին կետով նախատեսված հանցանքներում և պատիժների համակցությամբ դատապարտվել 22 տարվա ազատազրկման և 1.000.000 դրամ տուգանքի:

Ըստ մեղադրանքի՝ Գևորգ Զոհրաբյանը և Արթուր Միհրանյանը նախնական համաձայնությամբ, խմբի կազմում վստահությունը չարաշահելու և խաբեության միջոցով, Գ.Զոհրաբյանը գաղտնի առևանգել է Կարեն Վարդանյանին այնուհետև նույն անձի հետ խմբի կազմում շահադիտական դրդումներով դիտավորությամբ ապօրինաբար զրկել կյանքից, որից հետո նույն անձի հետ նախնական համաձայնությամբ խմբի կազմում գաղտնի հափշտակել Կարեն Վարդանյանի զգալի չափի գույքը:

Այսպես, 2016թ. մարտի 28-ին «Իրազեկ Քաղաքացիների Միավորում» Խորհրդատվական ՀԿ-ի ծրագրերի համակարգողը գրավոր հաղորդում էր ներկայացրել առ այն, որ նշված ՀԿ-ի փորձագետ Կարեն Արշակի Վարդանյանը 2016թ. մարտի 17-ին իր՝ Երևան քաղաքի Լենինգրադյան փողոցի 31/8-րդ շենքի 32-րդ բնակարանից դուրս է եկել՝ 1 շաբաթով արտասահման գործուղման մեկնելու նպատակով, սակայն մինչ օրս չի վերադարձել:

Անմիջապես ձեռնարկվել են անհրաժեշտ միջոցառումներ՝ Կ.Վարդանյանին հայտնաբերելու ուղղությամբ և պարզել, որ Կ.Վարդանյանը դարձել է հանցագործության զոհ։

Ձեռք բերված բավարար ապացույցների համաձայն՝ Կ.Վարդանյանն իր՝ Երևան քաղաքի Լենինգրադյան 31/8 շենքի 32-րդ հասցեի բնակարանը նվիրաբերել է 23-ամյա Գ.Զոհրաբյանին, որի դիմաց պետք է ստանար դրամական փոխհատուցում։ Պայմանավորված գումարը Կարեն Վարդանյանին չտալու համար Գ.Զոհրաբյանն առաջարկել է նրան Վրաստանով մեկնել Դուբայ՝ շրջագայության՝ մտադրվելով Վրաստան ուղեկցելու ճանապարհին սպանել նրան։ Նշված մտադրության մասին Գ.Զոհրաբյանը հայտնել է 1973թ. ծնված Ա.Միհրանյանին, ով 2016թ. հունվար ամսից օրավարձով վարել է Գ.Զոհրաբյանին պատկանող «Օպել Վեկտրա Բ» մակնիշի ավտոմեքենան՝ խոստանալով դրա դիմաց որոշակի գումար:

Նախնական պայմանավորվածության համաձայն՝ 2016թ. մարտի 17-ին երեքով, Ա.Միհրանյանի վարած «Օպել Վեկտրա Բ» մակնիշի ավտոմեքենայով Գ.Զոհրաբյանը և Կ.Վարդանյանն ուղևորվել են դեպի Սևան քաղաք՝ Կ.Վարդանյանին Վրաստանի Հանրապետություն ուղեկցելու պատրվակով՝ նման կերպ գաղտնի առևանգելով վերջինիս:

Հասնելով Սևանի Աղթամար թերակղզու մոտ՝ քարով բազմաթիվ հարվածներ են հասցրել ավտոմեքենայի հետևի նստատեղին գտնվող Կ.Վարդանյանի գլխին։ Տեսնելով նրա անշնչացած մարմինը և հասկանալով, որ արդեն մահացել է՝ Կ.Վարդանյանին թողել են ավտոմեքենայի սրահի հետնամասում, նույն ավտոմեքենայով վերադարձել Երևան, որտեղ դիակը տեղափոխել են Գ.Զոհրաբյանին պատկանող ավտոտնակ և թաղել։ Բացի այդ էլ Կարեն Վարդանյանի դիակը ավտոտնակում թաղելուց առաջ նշված երկու անձինք զննել են նրա հագուստները և հափշտակել հայտնաբերված 40.000 ՀՀ դրամը։

Աղբյուր` Փաստինֆո