Փաստ ինֆո

«Սասնա ծռեր-2»-ի գործով նախագահող դատավոր Արթուր Օհանյանն այսօրվա դատական նիստում հանրային պաշտպաններին գործում ներգրավելու որոշում կայացրեց և նրանց մասնակցությամբ շարունակվեց գործի նյութերի հետազոտումը:

Փաստաբանները դատավորի գործողությունները գնահատեցին որպես անօրինական, քանի որ դատարանն այդ որոշումն ընդունել է առանց իմանալու պաշտպանյալների դիրքորոշումն այդ կապակցությամբ: Դա կարելի էր պարզել դատական նիստերի դահլիճից հեռացված պաշտպանյալներին նիստերի դահլիճ վերադարձնելու և նրանք դիրքորոշումը իմանալու միջոցով, ինչը դատարանի կողմից չի արվել:

Հնչեցին դիտարկումներ նաև առ այն, որ 11 հոգու պաշտպանությունը երեք հոգի չի կարող իրականացնել, մանավանդ որ նրանք գործին ծանոթ չեն: Նշվեց, որ հանրային պաշտպան Արմինե Ֆանյանն է միայն ծանոթ գործի նախաքննական փուլին, իսկ թե ինչ է կատարվել մինչ օրս դատարանում, նա դրան նույնպես ծանոթ չէ:

Քանի որ տվյալ պահի դրությամբ գործում ներգրավված պայմանագրային պաշտպանները տեղյակ չէին իրենց մասնակցության վերաբերյալ պաշտպանյալների դիրքորոշումից, նրանք հարկ չհամարեցին մասնակցել դատական նիստին:

«Փաստինֆո»-ի լրագրողի հետ զրույցում փաստաբան Երվանդ Վարոսյանը նշեց, որ դատական պրոցեսն անհասկանալի վիճակում է գտնվում այն առումով, որ հարկադրաբար ներգրավվում են հանրային պաշտպաններ: «Ընդ որում, այն պարագայում, որ այդ անձինք ծանոթ չեն քրեական գործի նյութերին, և երկրորդը իրենց «պաշտպանյալները» որևէ կերպ կամարտահայտություն չեն արել, թե ցանկանում են, որ նրանք պաշտպանեն իրենց շահերը: Այդ պարագայում ակնհայտ է, որ ձևական պրոցեսի հետ գործ ունենք, և դատավորի միակ ցանկությունն է, այսպես ասած՝ արագ պրոցեսը առաջ գնա, արդյունքում բոլորովին անտեսելով մեղադրվող անձանց իրավունքները»,- ասաց Ե.Վարոսյանը՝ հավելելով, որ իրավիճակն աբսուրդային է համարում նաև այն առումով, որ գերծանրաբեռնված հանրային պաշտպանի գրասենյակը ոչ ոք իրավունք չունի նման կերպ օգտագործել: «Հանրային պաշտպանները հազար գործեր ունեն, որոնցով պիտի պաշտպանեն օրենքով անվճարունակ քաղաքացիների շահերը և նրանց կտրել, ձևականորեն բերել-նստեցնել պրոցեսում իբրև թե ձև տալու, թե անձանց իրավունքները պաշտպանված են, դա ուղղակի աբսուրդ է»,- ասաց Ե.Վարոսյանը:

Նույն քաղաքական ամբիցիաները տեղափոխվում են դատարան, ստացվում է, որ կրկեսի վերածելու դատարան ունենք,- «Փաստինֆո»-ի լրագրողի հետ զրույցում իրավիճակն այսպես բնորոշեց փաստաբան Հարություն Բաղդասարյանը: Ըստ նրա, դատարանը խախտում է սկզբունքային, օրենսդրական մի շարք պահանջներ, որոնցից մեկն է՝ եթե պաշտպանյալները հրաժարվում են պաշտպանից, ուրեմն դատարանը պետք է ընդամենն արձանագրի, ընդ որում եթե լինում է կամային հրաժարում՝ պաշտպանի ներկայությամբ: Այդ դրույթները նախորդ դատական նիստում իրականացվել են, այդուհանդերձ, դատարանը պաշտպաններին թողել է որպես պաշտպան, ընդգրկել հանրային պաշտպաններ: «Այսինքն՝ պայմանագրային պաշտպանների ներկայությամբ առկա են նաև հանրային պաշտպանները, ինչը ոչ օրենքը, ոչ էլ որևէ այլ կարգավորում չի նախատեսում, որ մարդը պետության հաշվին պաշտպան ունենա և ունենա իր հայեցողությամբ պաշտպան: Եվ ամենակարևորը՝ ցանկացած պաշտպանի ընդգրկում պետք է լինի պաշտպանյալի համաձայնությամբ»,- ասաց Հ.Բաղդասարյանը:

Ըստ փաստաբանի, հանրային պաշտպան Արմինե Ֆանյանը ճիշտ էր ասում՝ հայտարարելով, որ այստեղ չկա զենքերի հավասարություն, վերջինս, ըստ Հարություն Բաղդասարյանի, կարող է լինել միայն ռեալ պաշտպանության դեպքում:

Աղբյուր` Փաստինֆո