Փաստ ինֆո

Էրեբունի և Նուբարաշեն վարչական շրջանների քննչական բաժնի ավագ քննիչ Միքայել Զադոյանի և փաստաբան Գայանե Գալոյանի գործով այսօր ներգրավվեց հանրային պաշտպան:

Հիշեցնենք, որ նախորդ դատական նիստում փաստաբան Գայանե Գալոյանը հրաժարվեց իր 5 պաշտպաններից և դատարանին խնդրեց իրեն հանրային պաշտպանով ապահովել:

Բանն այն է, որ, ըստ Գալոյանի հայտարարության, դեռևս նախաքննության փուլից սկսած գործընկներ փաստաբաններն անվճար իրականացրել են իր պաշտպանությունը, սակայն «Աբովյան» ՔԿՀ հասնելն այդքան հեշտ չէ, և քանի որ ինքը վճարունակ չէ, խնդրել էր իրեն ապահովել հանրային պաշտպանով:

Էրեբունի և Նուբարաշեն վարչական շրջանների ընդհանուր իրավասության դատարանում՝ նախագահությամբ Մեսրոպ Մակյանի, այսօր շարունակվեց գործի քննությունը՝ դատարան էր ներկայացել փաստաբան Անժելա Հոբոսյանը. փաստաբանը դատարանից 1 ժամ ժամանակ խնդրեց` գործի նյութերին ծանոթանալու նպատակով:

Նշենք, որ ավելի վաղ ամբաստանյալի կարգավիճակում գտնվող փաստաբան Գայանե Գալոյանը քաղաքացիական հիվանդանոց էր տեղափոխվել, բավարարվել էր նրա նկատմամաբ հանձնաժողովային դատաբժշկական փորձաքննություն նշանակելու վերաբերյալ միջնորդությունը, և փորձաքննությունն իրականացնելու նպատակով փաստաբանը որոշ ժամանակով գտնվում էր հիվանդանոցում, սակայն, ինչպես պարզվեց, նշված ժամանակահատվածը բավարար չի եղել՝ բոլոր հետազոտություններն անցնելու համար, և վաղը կրկին Գալոյանը կալանավայրից կտեղափոխվի քաղաքացիական հիվանդանոց՝ հետազոտությունները շարունակելու նպատակով:

Նշենք նաև, որ ավագ քննիչ Միքայել Զադոյանի պաշտպանությունն իրականցնում են փաստաբաններ Հրանտ Անանյանը և Սիմոն Ամիրխանյանը, իսկ Բաբկեն Գասպարյանինը՝ հանրային պաշտպան Սիրանուշ Հարությունյանը:

Ըստ մեղադրանքի՝ Բաբկեն Գասպարյանը ՀՀ քննչական կոմիտեի Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 112-րդ հոդվածի հատկանիշներով հարուցված և քննվող քրեական գործով որդու՝ Սոս Գասպարյանի օգտին իրենց լիազորությունների շրջանակում գործողություններ կատարելու դիմաց նշված քննչական բաժնի ավագ քննիչ Միքայել Զադոյանին և բաժնի պետի տեղակալ Բունիաթ Եղիազարյանին ՀՀ Փաստաբանների պալատի փաստաբան Գայանե Գալոյանի օժանդակությամբ և միջոցով տվել է առանձնապես խոշոր չափերով կաշառք:

Ըստ Գայանե Գալոյանին առաջադրված մեղադրանքի՝ նա օժանդակել է Սոս Գասպարյանի օգտին իրենց լիազորությունների շրջանակում գործողություններ կատարելու դիմաց նախնական համաձայնությամբ առանձնապես խոշոր չափերով կաշառք ստացող վերը նշված քննչական բաժնի ավագ քննիչ Միքայել Զադոյանին և նույն բաժնի պետի տեղակալ Բունիաթ Եղիազարյանին:

Միքայել Զադոյանին էլ մեղադրանք է առաջադրվել՝ իր վարույթում քննվող քրեական գործով նույն բաժնի պետի տեղակալ Բունիաթ Եղիազարյանի հետ նախնական համաձայնությամբ Բաբկեն Գասպարյանի որդու՝ Սոս Գասպարյանի օգտին իրենց լիազորությունների շրջանակում գործողություններ կատարելու դիմաց ՀՀ Փաստաբանների պալատի փաստաբան Գայանե Գալոյանի օժանդակությամբ և միջոցով Բաբկեն Գասպարյանից առանձնապես խոշոր չափերով կաշառք ստանալու համար: Խոսքը գնում է 3000 ԱՄՆ դոլար կաշառքի մասին:

Միքայել Զադոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, Գայանե Գալոյանին՝ 38-311-րդ հոդվածի 4-րդ մասի 2-րդ կետով, իսկ Բաբկեն Գասպարյանին՝ 312-րդ հոդվածի 3-րդ մասի 1ին կետով:

Միքայել Զադոյանի և Գայանե Գալոյանի նկատմամբ որպես խափանման միջոց է ընտրվել կալանավորումը, իսկ Գասպարյանի նկատմամբ՝ չհեռանալու մասին ստորագրությունը:

Նշենք նաև, որ բաժնի պետի տեղակալ Բունիաթ Եղիազարյանին ևս մեղադրանք է առաջադրվել՝ 311-րդ հոդվածի 4-րդ մասի 2-րդ կետով, սակայն գործով նրա մասն անջատվել է և դեռևս նախաքննություն է ընթանում:

Քննչական բաժնի պետի տեղակալի նկատմամբ դատարանը որպես խափանման միջոց է ընտրել չհեռանալու մասին ստորագրությունը:

Աղբյուր` Փաստինֆո