Փաստ ինֆո

Ծանրացուցիչ հանգամանքներում իրանահայ գործարարի սպանության գործի ապացույցներն օգտագործման համար անթույլատրելի ճանաչելու, իսկ գործը կարճելու մասին ամբաստանյալի միջնորդությանը դատարանը կանդրադառնա խորհրդակցական սենյակում վերջնական դատական ակտ կայացնելիս: Այսպիսի որոշում այսօր կայացրեց գործը քննող դատարանը՝ հետաձգելով միջնորդության վերաբերյալ որոշման կայացումը:

Նախորդ դատական նիստում ամբաստանյալ Գեորգի Սաֆարյանը միջնորդել էր անթույլատրելի ճանաչել նույն գործի շրջանակում ավելի վաղ դատապարտված անձանց ցուցմունքները և կարճել քրեական գործի վարույթը: Ըստ ամբաստանյալի, գործի քննությամբ նախաքննական մարմինը ձեռք չի բերել ապացույցների բավարար ամբողջություն:

Իսկ այսօրվա դատական նիստում մեղադրողը առարկեց միջնորդության դեմ՝ այն գնահատելով որպես վաղաժամ արված միջնորդություն: Ըստ մեղադրողի, հնարավոր չէ լուծում տալ միջնորդությանը, քանի դեռ չեն հետազոտվել գործի ապացույցները:

Տուժողի իրավահաջորդի ներկայացուցիչն իր հերթին որպես անհիմն որակեց միջնորդությունը:

Այսօրվա դատական նիստին չէին ներկայացել գործով մի շարք վկաներ, նրանք հաջորդ դատական նիստին բերման կենթարկվեն դատարան, իսկ գործով դատապարտյալը կծանուցվի դատական նիստի օրվա ու ժամի մասին:

Ամբաստանյալը միջնորդեց հրապարակել վկաների ցուցմունքները՝ «երրորդ տարին կալանքի տակ եմ, կինս հիվանդ է, երեխաս՝ անչափահաս»: Դատարանն ամբաստանյալին պարզաբանեց, որ վկաների ցուցմունքները հրապարակվում են այն դեպքում, եթե սպառվել են նրանց ներկայությունը դատարանում ապահովելու բոլոր հնարավորությունները: Դատարանն ընդգծեց, որ վկաների դատարան ներկայանալը բխում է ամբաստանյալի շահերից, քանի որ վկաների ներկայանալու պարագայում կապահովվի ամբաստանյալի հակընդդեմ հարցման իրավունքը:

Հիշեցնենք, որ 1995 թվականի հունվարի 26-ին տեղի ունեցած սպանության երեք մասնակիցներ ավելի վաղ՝ անցյալ դարի 90-ականներին, դատապարտվել են: Իսկ ներկայումս դատարանում քննվող այդ գործով միակ ամբաստանյալ Գեորգի Սաֆարյանը ծանրացուցիչ հանգամանքներում կատարված սպանության և ավազակային հարձակման մեղադրանքներով 20 տարի հետախուզման մեջ է գտնվել:

Նույն` 95 թվականի մայիսի 30-ին նրա նկատմամբ հայտարարվել էր միջպետական, իսկ 99 թվականի նոյեմբերի 30-ին` միջազգային հետախուզում: 2014 թվականի հունվարին ոստիկանները օպերատիվ տեղեկություն էին ստացել, որ Գեորգի Սաֆարյանն ուրիշի անվան տակ բնակություն է հաստատել Ռուսաստանի Դաշնության Նովոկուզնեցկ քաղաքում, օպերատիվ տեղեկությունը հաստատվել են լուսանկարներով ու մատնահետքերով:

Ըստ դեպքի մասին ոստիկանության հաղորդագրության, նախապես հանցավոր համաձայնության գալով, չորս ընկեր գնացել էին Երևանի Կոմիտասի պողոտա, որտեղ բնակվում էր Իրանի Իսլամական Հանրապետության ազգությամբ հայ մի քաղաքացի` Հայկ Աբրահամյանը, որի հետ ընկերները մտերմություն էին հաստատել դեռևս 94 թվականին:

Տեղեկանալով, որ գործարարն Իրանից վերադարձել է մեծ գումարով և նպատակ ունի ասֆալտի գործարան կառուցել, երեկոյան ութն անց կեսին ընկերներից մեկը մնացել է շենքի մոտ, մյուս երեքը՝ մտել տուն:

Հայկի գարեջրի բաժակում թույն էին խառնել, «բայց գյուղինստիտուտի ուսանող Գեորգի Սաֆարյանի բերած թույնը միայն քնեցրել էր Հայկին»: Տղաները գործի էին դրել պահեստային տարբերակը` երկուսը բռնել էին Հայկին, իսկ Գեորգին, իր հետ բերած մետաղալարով խեղդամահ էր արել նրան: Տնից հափշտակելով միայն թանկարժեք իրեր` հանցախումբը հեռացել էր, նշվում է ոստիկանության հաղորդագրության մեջ:

Աղբյուր` Փաստինֆո