Փաստ ինֆո

Կեսարյան հատման ենթարկված ծննդկանի մահվան վերաբերյալ «Սլավմեդ» բժշկական կենտրոնի երկու բժշկի դեմ գործով այսօր հարցաքննվեցին ամբաստանյալների գործընկեր վկաները:

Բժիշկ-սոնոգրաֆիստ Ա.Ղազարյանը հայտնեց, որ գործով ամբաստանյալ Կարեն Բաղդասարյանը, ով բարդություն էր հայտնաբերել կեսարյան հատման ենթարկված բուժվող հիվանդի մոտ, գիշերն իրեն զանգահարել է և հրավիրել կլինիկա:

Հետազոտությամբ հաստատվել էին կասկածները: Ըստ բժշկուհու, ինքը արյունահավաք է հայտնաբերել, դրա չափերից ելնելով կարող էր հավաքված լինել 250 միլիլիտր արյուն, ինչը կյանքին սպառնացող չէր: Հայտնաբերվել էր նաև քսան միլիլիտր ազատ հեղուկ, որը վտանգավոր չի նման վիրահատությունների պարագայում:

Բացառո՞ւմ եք, որ արյունահավաքի չափ մառլյա թողնված լիներ որովայնում ու չհայտնաբերվեր հարցին բժշկուհին պատասխանեց՝ այդ չափի մառլյան բաց չէի թողնի:

Վկա, հիվանդանոցի բժիշկ-անեսթեզիոլոգ Յու.Խաչատրյանը հայտնեց, որ ի սկբանե ծննդկանը գանգատվում էր որովայնի ցավերից, նա չափավոր գունատ էր, սակայն սառը քրտինք չի նկատել, արյան ճնշումը կայուն է եղել, զարկերակային անոթազարկն արագ է եղել: Կեսարյան հատումից հետո առաջացած բարդության վերացման ուղղությամբ կատարված վիրահատության ժամանակ ինքը վիրահատող բժշկից իմացել է, որ ծննդկանը երկու լիտր արյան կորուստ ունի, հետո թոքերի այտուց է առաջացել: Բժշկի կարծիքով, թոքի այտուցը կարող էր առաջանալ պլազմայի ներարկման ռեակցիայի հետևանքով:

Հաջորդ դատական նիստում կհարցաքննվեն բժիշկ փորձագետները:

Ըստ մեղադրանքի, Կարեն Բաղդասարյանը՝ աշխատելով «Սլավմեդ» ԲԿ-ում որպես մանկաբարձ-գինեկոլոգ, կեսարյան վիրահատության ենթարկված և հիվանդասենյակ տեղափոխված ծննդկան Տաթևիկ Գասպարյանի բժշկական օգնությունը և սպասարկումը կազմակերպելու ժամանակ իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի մահը։

Ըստ Լիանա Դաղբաշյանին առաջադրված մեղադրանքի, նա աշխատելով «Սլավմեդ» ԲԿ-ում որպես մանկաբարձ-գինեկոլոգ, 25.12.2015թ․ հաշվառման է վերցրել և վարել Տաթևիկ Գասպարյանի հղիությունը։ Կեսարյան հատումից հետո հետվիրահատական սրահ տեղափոխված ծննդկանի բժշկական օգնությունը և սպասարկումը կազմակերպելու ժամանակ իր մասնագիտական պարտականությունների նկատմամբ անփույթ և անբարեխիղճ վերաբերմունքի հետևանքով դրանք իրականացրել է ոչ պատշաճ, որն անզգուշությամբ առաջացրել է բուժվող հիվանդի մահը։

Աղբյուր` Փաստինֆո